Kuditetesha Kudi Yehowa: Bua Tshinyi Kudi Ne Mushinga?

¹ Muntu yonso utu ujinga kuikala ne makanda a mubidi; nsombelu uvua mua kuikala muimpe mutambe. Nenku, nansha bantu badi ne makanda a mubidi batu baditetesha misangu yonso. Bua tshinyi? Batu batekemena kujingulula pa lukasa kasama konso bua kukuondopa. Bidi kabidi ne mushinga mukole bua kutabalela makanda etu a mu nyuma. Bua kuikala banyishibue kudi Yehowa, bidi bitukengela kuikala “bashindame mu ditabuja.”​—⁠Tito 1:​13, NW.

² Etshi ke tshikondo tshia kuditetesha kudi Yehowa. Bua tshinyi? Bualu Yehowa udi mu ntempelo wende munsantu ne udi ukonkonona mitshima ya bantu bonso. (Mus. 11:4, 5; Nsu. 17:3) Anu bu Davidi, tudi tulomba Yehowa bua kutuenzaye mateta onso nkong: “Tangila munda muanyi, Yehowa, untete; untete mu mutshima wanyi ne mu meji anyi.”​—⁠Mus. 26:2.

³ Bu mudi mubidi wetu mupange bupuangane, tudi ne bua kutabalela bintu bidi biluisha makanda etu a mu nyuma padibi munda muetu. Nsumuinu 4:23 udi ufila mubelu eu: ‘Ulame mutshima webe ne dilama dionso, bualu bua munda muawu mudi mupatuka mishimi yonso ya muoyo.’

⁴ Makanda etu a mu nyuma mmaluisha kabidi kudi bulongolodi ebu bunyanguke ne bua buenzavi budi butunyunguluke. Bituitaba bua kuikala batuangane nkundu ne ndongoluelu eu mubi wa malu, tudi bafuane kutuadija kuela meji bu yeye ne kuidikija ngikadilu ya benamu. Peshi tudi kabidi mua kuitaba dikala ne nsombelu udi ndongoluelu eu uzangika ne kututshimunabu kudi ngelelu wende wa meji.​—⁠Ef. 2:2, 3.

⁵ Bua kutunyanga mu nyuma, Satana udi mua kutumika ne ditukengesha anyi ne buluishi mu buludiludi. Kadi utu misangu mivule unayila ne budimu buonso pa malu a mu bulongolodi ebu adi mua kukoka ntema yetu. Petelo udi utubela bua ‘tuikale bapole, tutabale,’ bualu Satana udi “bu nyama wa ntambue udi ukungula,” “ukeba bantu ba kudieye.” Badi batulomba bua ‘kumutantamena bajalame mu ditabuja dietu.’​—⁠1 Petelo 5:8, 9.

⁶ Bidi ne mushinga mukole bua kukuba makanda etu a mu nyuma pa kulama ditabuja dishindame, dikontolola dituku dionso. Mupostolo Paulo udi utubela bua kuteta misangu yonso ditabuja dietu. Bitu bia meji bua kulonda mibelu miakanyine mifila kudi munganga muimpe; bia muomumue, bidi bitukengela kuteleja Yehowa padi diditetesha dia mu nyuma kudiye dituleja bualu kampanda budi butukengela kuondopa. Pa nanku tudi mua “kutumika bua dishala dietu batabale.”​—⁠2 Kol. 13:5, 11, NW.

⁷ Bushuwa, Yehowa ke Munganga mutambe buimpe udiku. Dijingulula diende dia disama ditu misangu yonso dijalame. Mmujadike bushuwa bitudi tukengela. Ku diambuluisha dia Dîyi diende ne “mupika wa lulamatu,” udi utufundila biakudia bia mu nyuma bidi bipetesha makanda. (Mat. 24:45; 1 Tim. 4:6) Pa kudia pa tshibidilu biakudia ebi bia mu nyuma bikoleshi, ku metu ne mu bisangilu bia tshisumbu, netuikale ne makanda a mu nyuma. Didibidija dia mu nyuma pa tshibidilu mu mudimu wa buambi ne midimu mikuabu ya buena-nkristo didi kabidi ne mushinga. Ke bua tshinyi tudifilayi kudi Yehowa pa tshibidilu mu diditetesha kudiye, bamanye se: neatupeshe makanda a mu nyuma adi matambe buimpe.