Utu webeja bantu bua dilonga dia Bible anyi?
1 Bamanyishi bavule badi bapeta mushindu wa kutuadija malonga a Bible pa kuebeja bantu buludiludi bua kukonkonona Bible. Muntu kampanda wakabenga mikanda yetu misangu mivule wakitaba ne disanka dilonga dia Bible. Wakamba ne: “Ntu amu njinga kulonga Bible.” Dilonga diakatuadija, ne dîku diende dijima diakalubuluka pa lukasa.
2 Tudi ne bua kukeba buonso mushindu wa kutuadija malonga a Bible. Bua bantu kulubulukabu ne tshipatshila tshia kulua bayidi ba Kristo, bidi bikengela kubalongesha. (Mat. 28:19, 20) Pabi, pakulonga Bible pamue nabo ke patuabalongesha. Misangu mivule, kudi mushindu wa kutuadija malonga a Bible amu pa kuebeja bantu bua kubaleja mushindu wa kuibidilangana ne Bible, kabidi ne malaya a Nzambi. Muanetu wa balume kampanda wakatuadija malonga atanu ne trakte wa: Nsombelu wa ditalala mu bulongolodi bupiabupia. Bu muvuaye kayi ne mushindu wa kulombola pa tshibidilu malonga bungi nunku, wakâfile kudi bamanyishi bakuabu.
3 Bituikala ne bupepele mu dituadija malonga a Bible, tudi mua kupatuka pamue ne bamanyishi bakuabu ne kubambuluisha bua kuatuadijabu pabu. Peshi tudi mua kufila amue a ku malonga etu kudi bena mu tshisumbu bakuabu. Biwajinga kulombola dilonga dia Bible, bua tshinyi kubenga kudiebeja bantu bawudi upeta mu buambi ku nzubu ne ku nzubu? Mumanyishi kampanda wakalukila kutangila mushikankunde kansanga uvua muleje dijinga dikese. Mumanyishi eu wakamuebeja bua dilonga dia Bible, yeye wakitaba. Ukadi mpindieu mutambule, yayende pamue ne bukonde buende badi batantshila bisangilu.—Gal. 6:6.
4 Buonso badi batuadija dilonga kabakunanukila. Buonso badi balonga kabakuakidila bulelela. Kadi bamue nebenze nanku. Bituabangisha malonga mavule, ku diambuluisha dietu, netuikale ne muabi wa kufikisha bantu ku ditendelela Yehowa.