Tudi Tukuata Mudimu Wa Bungi Menemene Anyi?

¹ Paulo mmutukankamije bua ‘tuikale dîba dionso ne bivule bia kuenza mu mudimu wa Mukalenge.’ (1 Kol. 15:​58, NW) Tudi bakankamijibue bikole bua kulama programe wa dituku dionso wa dilonga dia muntu pa nkayende, bua kupatuka pa tshibidilu mu buambi, bua kubuela ne tshisumi mu bisangilu ne kuenza ne disuminyina midimu mitupesha mu tshisumbu. Katuyi tupua muoyo diambuluisha ditudi ne bua kutuadila aba badi badikengela. Bikale ne programe wa nunku, tudi imue misangu mua kudiumvua bapungile ne kudiambila munda munda ne: tudi mua kubilekela.

² Mu imue nsombelu, bidi mua kuikala dileja meji ne bia butshintshikidi bitualekela imue midimu peshi kuyikepesha. Bamue badi bela meji mudibu benza bionso bidibu babalombe bua kuenza. Dipanga butshintshikidi mu muanda eu didi mua kulua mpokolo wa disumpakana ne ditata bidi mua kufikisha muntu ku kabutu.

³ Tuleje butshintshikidi: Kutumikila mubelu wa Paulo pa ‘kukonkonona bintu bidi bitambe mushinga,’ ke nsapi wa dileja butshintshikidi. (Fil. 1:​10, NW) Mmumue ne: kudifila ne kasuki mu midimu idi ne mushinga menemene, pashishe kukumbaja midimu ya mushinga mushadile, bilondeshile nsombelu ne dîba didi ditushadile. Majitu etu a mu dîku adi pa muaba munême munkatshi mua midimu eyi ya mushinga. Tudi kabidi ne majitu makuabu a ku mubidi a kukumbaja. Yezu wakalongesha ne: dizangika malu a mushinga mukole ku onso didi ne bua kushindamena pa dîyi-diludiki edi: kebayi diambedi Bukalenge. Tudi ne bua kuenza diambedi tshidi tshikengedibue bua kukumbaja bitudi banyishe bua kuenzela Yehowa.​—⁠Mat. 5:3 ; 6:⁠33.

⁴ Ne lungenyi elu mu mutu, netukebe mua kupepeja ditumika dietu ne dîba, nansha mukadidi dinême bujitu ne midimu yetu, ne dijikija lutetuku ne majitu a patupu peshi matentekeja. Patudi tuenza programe wetu wa lumingu, tulame dîba dikumbane dia kuenza dilonga dia muntu pa nkayende, dia kupatuka mu buambi mu mushindu mutshintshikila, dia kubuela mu bisangilu ne dia kuenza malu onso adi masuikakaja buludi ku ntendelelu wetu. Dîba didi dishala nedikale mua kufidibua ku midimu mikuabu pikalayi ituambuluisha bua kukumbaja tshipatshila tshietu tshia kumpala, tshia kuikala bena nkristo bena butshintshikidi mu dikumbaja diambedi midimu ya Bukalenge.

⁵ Kadi, tudi mua kutungunuka ne kumona se: bujitu buetu mbutunemenene. Pikalabi nanku, tudi ne bua kuandamuna ku dibikila dia Yezu edi: “Vuayi kundi meme, nuenu bonso badi bakenga ne bazengele ne majitu, ne meme nennukankamije.” (Matayo 11:​28, NW) Tutangile kabidi kudi Yehowa ‘udi utuambuila majitu dituku dionso’ ne upetesha udi mupungile bukole. Kakulekela bua muakane kutetukaye, ke dilaya diende. (Mis. 55:22; 68:19; Yesh. 40:29) Tudi mua kuikala bashindike ne: masambila etu neanyishibue, nunku kutupetesha mushindu wa kunanukila pa kuikala ne nsombelu muule tente ne midimu ya teokrasi.

⁶ Bikalabi bia bushuwa se: ditungunuka ne kusadila bipatshila bia lumu bia Bukalenge didi dituina mu mudimu ne kasuki, tudi mua kusanka, bualu tudi bamanye se: mudimu wetu mukole kawena wa patupu bua bidi bitangila Mukalenge.​—⁠1 Kol. 15:⁠58.