Ntshipumbishi ku mudimu wa diyisha anyi?

¹ Bantu ba bungi badi ne malu mavule a kuenza. Nansha tuetu Bantemu ba Yehowa badi petu batubala mu bantu badi ne malu a bungi menemene a kuenza: tshilejilu, tudi tulonga Dîyi dia Nzambi, tuya mu bisangilu bia tshisumbu ne tupatuka mu buambi. Kabidi bamue badi ne mudimu wa bianza, ne midimu ya ku nzubu ta ya mu kalasa ne malu makuabu a bungi a kuenza, bionso ebi bidi biangata dîba dia bungi. Tshilumbu etshi ndutatu lukole nangananga bua bamfumu ba mêku.

² Bu mudi nsombelu mulue kukola miaba ya bungi, bua kupeta mfranga bidi bilomba bamfumu ba mêku bua kuenza mudimu mukole udi ubangata dîba dia bungi, bionso ebi anu bua kumona mua kupeta kantu ka kuambuluisha naku bena mu dîku diabu. Padi mudimu wabu wa bianza ubangata dîba ne makanda abu a bungi, badi bashala ne dîba dikese menemene dia kuyisha. Bamue badi mua kumona ne: bu mudibu ne bua kukebela bena mu mêku abu bintu bia kudiambuluisha nabi, pamu’apa badi mua kuela meji ne: kabena ne dibanza dia kuenza mudimu wa buambi wa bungi nansha. (1 Tim. 5:8) Ntshia bushuwa, mbikolele bantu ba bungi lelu’eu bua kupeta bidibu nabi dijinga bua kudikuatshisha nabi. Kadi nansha nanku, mudimu wetu wa bianza kawena ne bua kutupangisha bua kuyisha lumu luimpe to. (Mâko 13:10) Nunku, mbimpe tutangile nsombelu utudi nende mpindieu.

³ Bu mudi malu a pa buloba apa enda ashintuluka misangu yonso, mfumu wa dîku udi mua kujinga bua kuenza mêba a bungi menemene ku mudimu wende eu, ne tshipatshila tshia kupeta makuta a bungi a kulama bua bikondo bikole bidi imue misangu mua kubafikila. (1 Kol. 7:31) Nansha mudi mudimu wa bianza mua kupetesha muntu bintu bia bungi anyi kumupetesha mushindu wa kujikijaku lutetuku, udiku mua kuvudijila bena mu dîku diende disanka bikalawu umuangata dîba dionso dia kuenza nansha malu a mu nyuma anyi dia kuikala kubuela misangu yonso mu bisangilu anyi? Bushuwa, dijinga dietu ndia kuepuka bualu kayi buonso budi mua kutubueja mu njiwu ya mu nyuma. Kuteleja mubelu wa Yezu wa ‘kubumba mpetu mu diulu’ ne kuikala ‘mubanji ku mêsu kua Nzambi’ mbualu bua meji.​—Mat. 6:19-21, Mukanda wa Mvidi Mukulu [Katolike, MMM]; Luka 12:15-21.

⁴ Kebayi diambedi malu a Bukalenge: Yezu wakalongesha bayidi bende bua kuteka malu a mu nyuma kumpala kua makuabu onso. Wakabakankamija wamba ne: ‘Kanutambi kuelangana meji ne: netudie tshinyi? Netunue tshinyi? Netudiluatshishe tshinyi?’ Bua tshinganyi wakamba bualu bua nanku? Wakumvuija ne: ‘Tatu wenu udi mu diulu udi mumanye ne: nudi ne bintu ebi bionso bualu.’ Bituikala batuishibue menemene bua bualu ebu, kakuakuikala tshintu nansha tshimue tshiatupangisha bua kuenza bualu buakalua Yezu kuamba pashishe ne: ‘Kadi diambedi kebayi Bukalenge buende ne buakane buende, nunku nebanupe bintu [bidi ne mushinga] ebi bionso.’ Nzambi neenze muende muonso bua katupangidi tshintu to! (Mat. 6:31-33) Bushuwa, etshi ki ntshikondo tshia kulekela malu a dikeba nsombelu mulenga peshi dijinga dia kuikala ne muaba mulenga wa kusombela mu bulongolodi ebu buajimina mu katupa kîpi emu atubueja mu ditanaji.​—1 Pet. 5:7; 1 Yone 2:15-17.

⁵ Kenzela ka mudimu wa bianza mbua kupeta bintu bidi muntu mua kuikala nabi dijinga. Kadi mbintu kayi bitudi mua kuikala nabi dijinga? Mupostolo Paulo wakafunda ne: “Bituikala ne biakudia ne biakuvuala, tusanke bua bintu ebi.” Tutuku tukeba mua kupeta bikuabu bintu bia bungi kupitshisha too ne pa ebi anyi? Biobi bikale bidi nanku, tudi mua kuikala tuenda tupola bipeta bibi bivua Paulo mupeshile bantu mubelu eu: “Badi basue kulua babanji badi bapona mu ditetshibua, badi bakuatshibua mu buteyi ku nkuka ya bungi mipote ne mibi, idi inyanga bantu ne ibabutula.” (1 Tim. 6:8, 9, Muanda Mulenga Lelu; Mat. 6:24; Luka 14:33) Mmunyi mutudi mua kumanya bituikala tukadi tuenda tujinga bintu bia bungi bidi mua kutupangisha mua kuyisha?

⁶ Bituikala bua mudimu wetu wa bianza tukadi tuenza amu kakese mudimu wa buambi peshi katutshiyi nansha tumona ne: tudi ne bua kuenza muetu muonso bua kumanyisha lumu luimpe, nanku bidi bikengela tudikonkonone bua kumanya malu a mushinga atudi ne bua kuteka pa muaba wa kumpala. (Eb. 13:15, 16) Kuikala ne nsombelu wa budipope udi kayi ukengela makuta a bungi nekutuambuluishe bua kulekela malu adi atupangisha mua kuyisha. Dîba ne makanda etu, tudi ne bua kukuata nabi mudimu kumpalampala anu bua malu a Bukalenge.

⁷ Mudimu udi kauyi wa patupu: Mêyi a Paulo adi atukankamija bua kuikala misangu yonso ‘ne bivule bia kuenza mu mudimu wa Mukalenge, bamanye se: mudimu wetu mukole utudi tuenzela Mukalenge kawena wa patupu.’ (1 Kol. 15:58, NW) ‘Mudimu wa Mukalenge’ wa mushinga mukole ng’wa kuyisha Bukalenge ne kuvuija bantu bayidi. (Mat. 24:14; 28:19, 20) Bua kudifila muetu muonso mu mudimu eu, mbimpe tuikala balongolola dîba dia kupatuka mu buambi lumingu luonso ne kudienzeja bikole bua kubenga kudiangata bua kuenza malu makuabu. (Ef. 5:15-17) Nunku, ni mmudimu wetu wa bianza, ni mbualu bukuabu kayi buonso, kakuena tshikala mua kupumbisha mudimu wetu wa buambi nansha.

⁸ Patudi tudifila ku budisuile bua kumanyisha bakuabu bulelela bua mu Bible, tudi tupeta disanka didi dipite onso bualu tudi tufila. (Bien. 20:35) Patudi tutungunuka ne kuyisha Bukalenge, tudi mua kutekemena malu malenga mu matuku atshilualua, ‘bualu bua Nzambi kêna upanga buakane bua kupuaye muoyo mudimu wetu ne dinanga dituakaleja bua dîna diende.’​—Eb. 6:10.