Udi utumikila malu auvua mulonge mu mpungilu wa distrike wa “Balongeshi ba Dîyi dia Nzambi” anyi?
1 Muntu yonso uvua mubuele mu mpungilu wa distrike wa tshidimu etshi uvua mua kumona ne: bantu ba Yehowa badi ne tshipatshila tshia kukumbaja mudimu udibu babapesha wa kuikala balongeshi ba Dîyi dia Nzambi. (Mat. 28:19, 20) Pauvua mupingane ku nzubu, mmalu kayi masunguluke avuabu balongeshe auvua muangatshile dipangadika dia kutumikila mu nsombelu webe ne mu mudimu wa budimi?
2 Malu mafundisha ku nyuma wa Nzambi adi atuambuluisha bua kulongesha: Tshiena-bualu tshia dituku dia kumpala tshivua tshimanyine pa 2 Timote 3:16. Muyuki wa nshindamenu uvua muleje ne: bua kulua “Balongolola tshishiki bua kuikala balongeshi ba Dîyi dia Nzambi,” tudi ne bua kuangata Dîyi dia Nzambi ne mushinga wa bungi, kudinemeka kupita ngenyi yonso anyi bilele bia bantu ne kuenza nadi mudimu misangu yonso. Tudi kabidi ne bua kusambila dituku dionso bua kulomba spiritu munsantu wa Nzambi bua atuambuluishe mu mudimu wa diyisha ne kuikala ne dimuma dinene dia nyuma eu, didi dikale dinanga. Ne tudi ne bua kulekela bisangilu bidi bulongolodi bua Yehowa bua pa buloba bulongolole bitulongesha bua tulue bambi ba lumu luimpe.
3 Muyuki wa bitupa bisatu wa mu Ditanu wa: “Tudi tudilongesha patudi tulongesha bakuabu” wakatuleja ne: tudi ne bua kuikala bantu ba tshilejilu tshimpe mu (1) dilamata ku mikenji ya Nzambi mu malu onso a bikadilu bilenga bia bena Kristo, (2) dikala ne tshibidilu tshilenga tshia kulonga ne (3) dishimbula munda muetu ngikadilu ne meji bidi Diabolo mua kukuata nabi mudimu. Pashishe tuvua balonge mishindu miakanyine ya kukuba mêku etu ku tshipupu tshidi tshitangalake pa buloba bujima tshia dibandila dia bindidimbi bia bantu kabayi bilamba ta pornografi. Bavua bakankamije baledi bua kufila tshilejilu tshimpe pa kuepuka nansha ditapa dîsu patupu ku bindidimbi bia bantu kabayi bilamba ne kutangila bua kumanyabu bidi bana batangila ku Internet anyi ku televizion. Nngenyi kayi iuvua muteleje mu programe wa mu Ditanu iukadi mubange kuenza nayi mudimu?
4 Muyuki wa ndekelu wa mu Ditanu wakashindika dipangadika dietu dia kuanyisha butoke bua Yehowa, kushala balamate kasumbu ka bela manyi ba lulamatu ba Nzambi, ne kuenza malu bua kukeba ditalala munkatshi mua bantu ba Yehowa. Ukadi mubale mukanda mupiamupia wa: La prophétie d’Isaïe, lumière pour tous les humains II anyi?
5 Bakumbane bua kulongesha bakuabu: Tshiena-bualu tshia dituku dibidi tshivua tshimanyine patshi pa 2 Timote 2:2. Pauvua muteleje muyuki wa bitupa bisatu wa mu Disambombo mu dinda, uvuaku mukuate ngenyi ivuabu bafile ya mushindu wa: (1) kukeba bantu ba muoyo muimpe (2) kuvudija dijinga dia kumanya bia bungi divuabu baleje ne (3) kubalongesha bua kuenza malu onso avua Yezu muambe anyi? Udiku utumikila malu audi mulonge bua kuleja baudi uyisha mu buambi nansha bualu bumue mu Mukanda wa Nzambi ne kulongolola mushindu bua kulua kumutangila musangu walua anyi?
6 Tshitupa tshia dilolo tshiakimanyina pa mushinga wa kuidikija Mulongeshi Munene Yezu. Udi uditatshisha bua kutamba kufuana Yezu mushindu kayi? Ku biuvua muteleje mu Muyuki muibidi wa bitupa bisatu wa dituku adi wa: “Dilongesha dia Nzambi dikuambuluishe bikole menemene,” udi mumone se: nebikuambuluishe mushindu kayi? Nngenyi kayi iwudi mutumikile bua kukolesha ntema yebe paudi udilongela anyi paudi mu bisangilu?
7 Kakuyi mpata, mukanda utudi bindile wa Kalasa ka Mudimu wa Teokrasi kadi katuambuluisha neutukuatshishe bua kukolesha dimanya dietu bua kulua bakudi ne balongeshi ba Dîyi dia Nzambi. Netutambe kutuma ntema ya bungi ku ngikadilu milenga ya diakula nayi ivua isunguluja basadidi ba Nzambi ba lulamatu ba mu bikondo bitshivuabu bafunda Bible. Dilongesha dionso dia mu mukanda mupiamupia eu didi ne tuzubu tukese tudi tuleja malu masunguluke atudi ne bua kulonda menemene, tuleja bua tshinyi adi ne mushinga ne mushindu utudi mua kuatumikila. Kudi kabidi malu makanyine a kudibidija nawu. Bana betu ba bakaji nebikale ne mishindu 29 idibu mua kusungula bua kuenza midimu ya mu kalasa ikalabu ne bua kubapesha. Kunyima kua matuku, nekuenzeke mashintuluka atukadi bamana kuamba aa bua kalasa aka. Utu ne tshibidilu tshilenga tshia kulonga ne kudilongolola bua Kalasa ka Mudimu wa Teokrasi aka kakuambuluishe menemene lumingu luonso anyi?
8 Ikalayi balongeshi pa kumona tshikondo tshitukadi: Ebelu 5:12 ke uvua mvese wa dituku dia Dia lumingu. Muyuki wa bitupa bisatu wa mu dinda eu: “Mulayi wa Malaki udi utulongolola bua Dituku dia Yehowa” uvua mutukankamije bua kupesha Yehowa bietu bia mushinga mukole ne kukina ditungilangana tshitungu dia mishindu yonso bua tuetu kumona mua kupanduka mu dituku dinene ne didi dikuatshisha buôwa dia Yehowa. Drama wa “Tunemekayi bukokeshi bua Yehowa,” wakafila dilongesha dikole dia mudi lutambishi, dikeba lumu, mukawu ne lulamatu ludi kaluyi luakanyine bia mukulu wa tshisamba Kola ne bena diende bifikishe bantu ku ditombokela menemene anu Yehowa nkayende. Muyuki uvua ulonda dinaya adi wakaleja mudibi bikengela lelu’eu bua tuetu bonso kukokela Nzambi mu dîku ne mu tshisumbu. Muyuki wa patoke eu: “Mbanganyi badi balongesha bulelela mu matunga onso?” wakafila bijadiki bia ne: Bantemu ba Yehowa badi babulongesha, nanku bishilangane kule ne kule ne bena Bukua-buena-Kristo, badi bamba anu patupu mudibu balongesha bulelela bua mu Bible.
9 Bidi bimueneka patoke ne: Yehowa udi utulongesha bua tuikale balongeshi ba nsongo ba Dîyi diende. Tutumikilayi malu atudi balonge ‘bikale badimuke ku malu etu ne ku diyisha dietu bua tuetu kudisungila tuetu bine ne bobo kabidi badi batuteleja.’—1 Tim. 4:16.