Tualukilayi Kutangila Muntu Yonso Uvua Muangate Broshire
1 Mupostolo Paulo wakela bena Filipoi ka-lumbandi bualu ‘bakatabuluja ngenyi yabu bua bualu buende.’ (Fil. 4:10, NW) Bitualonda tshilejilu tshiabu mu buambi, netuikale mua ‘kutabuluja ngenyi yetu’ bua aba batudi tuambila lumu luimpe ne netudiumvue basakibue bua kualukila kubatangila.
2 Biwikala mushiye broshire wa “Bukalenge bualua kuasa Mparadizu,” tshilejilu udi mua kuamba nunku:
◼ “Mvua muele meji pa diyukidilangana dietu dituku adi, ne mvese ibidi mmimvuile mu lungenyi. Ndi musue kukulejayi. Udi uvuluka pamu’apa ne: tuvua bakule bua kukokeshibua kua buloba kudi Nzambi. Mu Bible, Yehowa Nzambi udi ulaya ne: nebikumbane. [Bala Danyele 2:44.] Udi wela meji ne: bidi mua kuenzeka anyi? [Lekela muntu andamune.] Teleja mudi Nzambi wamba pa bidi bitangila makokeshi ende bua kukumbaja malaya ende. [Bala Yeshaya 55:11.] Mvese eu kênaku mua kutukankamija bua kuteka dieyemena dietu mu Bukalenge bua Nzambi anyi? Bu mudibi nunku, ntshikondo kayi tshiakumbaja Nzambi malaya ende?” Wamba ne: newandamune ku lukonko elu mu dikumbulula dialonda.
3 Biwakumbula muntu uvua muangate broshire wa “Quand la mort frappe un être aimé. . . ,” udi mua kuidikija mbuelelu eu:
◼ “Bu mutuvua bakule dituku adi bua lufu lua munangibue wetu, ndi muenze madikolela a pa buawu bua kualukila kukutangila.” Leja tshimfuanyi tshia mu dibeji 30 pa kuamba ne: “Udiku uvuluka tshimfuanyi etshi tshia disanka, mutudi tumona babiishibue ku lufu bapetangana thiakabidi ne banangibue babu anyi? Mvua mukuebeje né udi mumanye muaba wenzekelabi, mmu diulu anyi mpa buloba. Pamu’apa uvua mupete mu dibeji 26 dia broshire eu, tshidi Bible wandamuna.” Tuadija diakula pa malu manene a mu tshikoso 3 too ne ku 5, ne uleje Yone 5:21, 28, 29. Biwikala ne dîba, ubale umue wa ku mvese mileja mu dibeji 26.
4 Nukadi batuadije kulonga broshire wa “Monayi ndi mvuija bintu bionso bipiabipia” anyi? Mu dikumbulula didi dilonda, udi mua kuenza nunku:
◼ Uye tshiakabidi mu dibeji 30 ne ujule lukonko elu: “Nku tshinyi kudi Bible mukanda wa pa buawu?” Bulula broshire mu mabeji 3 ne 4 ne nutangile mu tshikoso 1 too ne ku 4, pamue ne tshimfuanyi tshia pa tshizubu. Bala mvese umue peshi ibidi mitela mu note wa tshikoso 4. Wamba ne: Bible mmukanda umu’epele udi ufila ditekemena dipita bulenga dia nunku. Enza tshidi tshikengela bua dikumbula dialonda. Kunyima kua dikumbula disatu, bituikala bamona se: dilonga neditungunuke, netuikale mua kudifunda mu luapolo luetu.
5 Tudi mua kutungunuka ne diyukidilangana pa broshire wa “Le nom divin qui demeure à jamais” mushindu’eu:
◼ “Musangu mushale mvua mukuleje dîna dia Nzambi mu Bible. Kumanya dîna dia Yehowa ne kutumika nadi bidi tshitupa tshia mushinga mukole tshia ntendelelu wetu.” Bulula broshire mu dibeji 31, nukonkonone ngenyi minene ya mu bikoso binayi bia ndekelu, ne ubadile muntu Yone 17:3 ne Mika 4:5. Muambile ne: udi umulomba bua anyishe dilonga dia Bible diamufikisha ku dimanya se: dîna dia Nzambi nedisantuishibue ne bantu nebasanke bua kuikala ne muoyo mu mparadizu pa buloba.
6 Nenku tutabuluje ngenyi yetu bua aba batudi bapetangana nabu. Tudi ne bua kubakumbulula ne disuminyina ne kudilongolola bua kubamanyisha ngenyi mikankamiji. Nenku, netuikale bena nkristo ‘badi bavudija mamiinu’ mu mudimu wa kuenza bayidi bapiabapia.—Mat. 13:23.