Tutumikayi Ne Broshire Kabukabu Mu Buambi
1 Bena tshikondo tshietu etshi batu bateya ntema ku biena-bualu bia mishindu yonso. Pawapatuka mu buambi mu Tshiongo, wangate broshire mivule bua umone mua kutumika ne eu wasankisha bena mu teritware webe. Idikijaku dimue dia ku maleja aa:
2 Bua difila dia broshire wa “Bukalenge bualua kuasa Mparadizu,” ebeja nunku:
◼ “Bua kuebe kumona, bulongolodi ebu buvua kuikala mushindu kayi bu Nzambi nkayende muikale muludiki? [Lekela muntu andamune.] Bua Nzambi adiangatshile nkayende bukokeshi bua buloba, ke tshitutu tulomba menemene mu disambila dia Tatu Wetu, disambila ditulongesha kudi Yezu Kristo. [Bulula broshire mu dibeji 3 ne ubale tshikoso 1, tshidi tshitela Matayo 6:10.] Biwasua kuikala ne muoyo mu bulongolodi bua buena ebu, udi ne bua kubala broshire eu.” Pashishe umulejaye.
3 Lungenyi luludiki bua dileja dia broshire wa “Quand la mort frappe un être aimé. . . ”:
◼ “Udiku wela meji ne: dimue dituku muntu nansha umue kakuikala mua kudila kabidi munangibue wende kampanda munyenga kudi lufu anyi? [Lekela muntu andamune.] Broshire eu mufunda bimpe bitambe ukadi mukoleshe miliyo ya bantu ku muoyo, bualu udi umvuija ne: dituku adi dikadi pabuîpi ne kabidi ndilaya dia bushuwa dia mu Bible. [Bulula broshire mu dibeji 5 ne bala tshikoso 5, nangananga 1 Kolinto 15:21, 22. Pashishe uleje tshimfuanyi tshia mu dibeji 30.] Apa muzodi mmupite kuleja disanka dituikala mua kupeta pa kuakidila ba pa muoyo betu bajimine pabiishibuabu ku lufu. Kadi bualu bua disanka ebu nebuenzekele penyi? Neupete diandamuna dia mu Bible mu broshire eu.” Bianyisha muntu bua kuangata broshire usakidile ne: “Nenganyishe kualukila bua tuetu kuyukila nebe mu buondoke pa tshiena-bualu etshi.”
4 Newanyishe pamu’apa bua kuleja broshire wa “Monayi, ndi mvuija bintu bionso bipiabipia” pa kulomba muntu buludi bua dilonga dia Bible:
◼ “Bantu bavule batu badiela nkonko pa bidi bitangila Bible. Lumue lua kudiyi lukadi pamu’apa lukuvuile mu lungenyi. [Bulula broshire mu dibeji 30.] Ba bungi batu bimanyina pa lukonko lua ndekelu elu: ‘Mmunyi muudi mua kudilongolola bua kuikala ne muoyo wa kashidi mu Mparadizu?’ ” Biwela nseke pa bikoso 57 ne 58 mu mabeji 29 ne 30 ne biwabala Buakabuluibua 21:3, 4, udi wasa tshishimikidi bua dilonga dia Bible. Ukomeshe pa kuleja broshire ne pa kuangata tshipungidi bua kulua kukonkonona nkonko mikuabu.
5 Peshi newidikije dileja dipepele edi dia broshire wa “Le nom divin qui demeure à jamais”:
◼ “Ku bintu bia kumpala bingakalonga mu Bible kudi dîna dia Nzambi. Utuku mudimanye anyi? [Lekela muntu andamune.] Ndi musue kukulejadi. Tshilejilu didi mu Musambu wa 83:18. [Bala mvese.] Broshire eu udi uleja mushindu udi dîna dia Nzambi, Yehowa, difundibua mu miakulu mishilashilangane. [Leja kazubu mu dibeji 8.] Biwasua kumanya bia bungi pa bidi bitangila Yehowa ne malongolola ende, sanka ubale broshire eu.” Uleje muteleji webe broshire eu.
6 Pa kuikala ne broshire milengele eyi kabukabu, tudi bushuwa ne biamu bia mudimu bua “kumanyisha badipuekeshi lumu luimpe.”—Yesh. 61:1, NW.