Tuikalayi Biibakianganyi
1 Bu mutudi mu tshikondo tshia “malu makole,” buonso buetu tudi tukengela kukankamijibua. (2 Tim. 3:1) Paulo wakadianjila kumona mushinga wa bualu ebu mu tshikondo tshiende, wakenza bua dipetangana diende ne bana babu dikala tshikondo tshia “kukoleshangana ku muoyo.” Wakabasengelela bua kuipatshila ‘malu adibu mua kudiundishangana n’au.’ (Roma 1:11, 12, MMM; 14:19) Madikolela aa ‘akakolesha mioyo ya bayidi, abakankamija bua kushalabu mu ditabuja.’ (Bienzedi 14:22) Tudi tukengela bikole kupeta dikankamijibua dia mushindu’eu lelu.
2 Mêyi etu adi mua kuibaka bakuabu ne, mamba ne tubingila tuimpe, kuikala “bu mamuma a tshiamu tshia or mu tshitekelu tshia argent.” (Nsum. 25:11) Pa kufila mumvuija mu bisangilu, tudi “tukoleshangana mitshima.” (Eb. 10:25) Tudi tutumika bimpe ne ludimi luetu patudi tulonda malu mamona mu buambi, tuela bana betu ka-lumbandi peshi tuyukidilangana pa malu a mu nyuma. Kuakula nunku ‘nkuimpe bua kuiibakangana bua kuvudijila bantu badi baumvua disanka.’—Ef. 4:29, NW.
3 Tuakulayi pa malu adi ibakangana: Mu Filipoi 4:8, Paulo mmufile mibelu miakanyine idi ileja mushindu muakane wa kuakula: kujalamija ntema yetu pa malu wonso adi malelela ne a bunême, malu wonso adi makane, a budipope ne a kunanga, malu wonso adi ne lumu luimpe, a bunonoke ne a kutemba ku bantu. Tudi mua kuikala bashindike se: malu atudi tuamba mmalelela ne mmibakianganyi bikalawu afumina mu Dîyi dia Nzambi. (Yone 17:17) Didilambula dietu kudi Nzambi, malu atudi tulonga mu bisangilu bia tshisumbu, mitalu itudi tuleja mu mudimu wa buambi ne malu makuabu a buena aa bidi bia bunême. Mayukidilangana pa bidi bitangila mêyi-makulu ne mêyi-maludiki bia mu Dîyi dia Nzambi nebituambuluishe bushuwa bua kulua ‘bena meji bua lupandu.’ (2 Tim. 3:15) Tulejayi dianyisha bua nsombelu wa budipope wa aba badi mu bulongolodi bukezuke bua Yehowa. Tutembayi bienzedi bilengele bia buimpe bia bana betu. (Yone 13:34, 35) Ku malu adi ne lumu luimpe kudi ngikadilu eyi milenga ya Buena-nkristo: ditabuja, disanka, ditalala ne muoyo-mule, ngikadilu idi imueneka kudi bana betu. Kuyukila pa biena-bualu bia bunonoke ne bia kutemba ebi ‘nkuimpe, bua kuibakibua’ kua bakuabu.—Lomo 15:2.
4 Bidi bitekesha ku muoyo bua kuakama matuku wonso bifimpakaji bia bulongolodi ebu. Mbulenga kayipu bua kuteka malu aa ku luseke pa kulabula dinanga dia buena-muntu! Mêba makese a mushinga atudi tupitshisha pamue ntshiuma tshitudi ne bua kunanga. Bituikala dîba dionso bakankamiji ne biibakianganyi, bakuabu nebikale mua kuamba bua bualu buetu ne: ‘Buobo bakakankamija nyuma wanyi.’—1 Kol. 16:18.