Tumanyishayi Lumu Luimpe Lua Bukalenge Ku Diambuluisha Dia Broshire
1 Ndisanka kayipu dia kumanya bulelela ne kuikala munkatshi mua bamanyishi ba lumu luimpe ba lukunukunu! Bantu bakêna mu bulongolodi bua Nzambi badi ne dijinga dikole dia kumvua lumu luimpe lua Bukalenge. Bulelela pa Bukalenge mbuleja mu mushindu mupepele mu broshire ya Ikalayi ne muoyo wa kashidi ne disanka pa buloba! “Monayi, ndi mvuija bintu bionso bipiabipia” ne Bukalenge bualua kuasa Mparadizu. Idi yumvuija nsombelu wa pa buloba muinshi mua bukokeshi bua Bukalenge bua Nzambi bienza anu bu bavuapu ne, ku diambuluisha dia Dîyi Diende, idi ilombola mubadi ku malelela a Bukalenge. Pa tshibidilu, kushila muntu udi uleja dijinga dia kumanya bivule broshire nntuadijilu tshianana. (1 Kol. 9:23) Tupinganyinayi ne lukasa luonso bantu bavua bitabe broshire, ne tshipatshila tshia kubalomba dilonga dia Bible ku diambuluisha dia mukanda wa Dimanya didi difikisha ku muoyo wa kashidi. Mmunyi mutuafika ku dienza nunku mu ngondo wa Kabitende?
2 Broshire wa “Ikalayi ne muoyo wa kashidi ne disanka pa buloba!” udi mua kufidibua panyima pa mbuelelu muîpi menemene. Mona tshiudi mua kuamba pa kuleja tshizubu tshia broshire:
◼ “Ndi musue kukuleja tshintu kampanda tshidi ne mukenji mushême munda muatshi.” Bulula broshire wa Ikalayi ne muoyo wa kashidi ne disanka ne bala tshikoso tshia kumpala. Tungunuka ne: “Broshire eu udi wandamuna kabidi ku lukonko [bala ka-tshiena-bualu kakese kadi ku mutu kua tshimfuanyi tshia 8]: ‘Muntu udi ufua bua tshinyi?’ Neumone se: mbimpe bitambe bua kukonkonona bimfuanyi ne kubala mvese idi mifila mu broshire eu. Pawikala muanyishe, udi mua kushala ne broshire eu.” Pikala muntu muitabe broshire, umuambile dipa dia pa tshibidilu ne kabingila katudi tudilombela.
3 Newambe tshinyi paudi upinganyina muntu uvua muitabe broshire wa “Ikalayi ne muoyo wa kashidi ne disanka”? Udi mua kuteta mbuelelu eu:
◼ Leja tshimfuanyi tshia 49 tshia broshire wa Ikalayi ne muoyo wa kashidi ne disanka ne konka ne: “Tshimfuanyi tshimpe tshitambe, ki mmuomu’anyi? [Teleja diandamuna.] Mbroshire umvua mukushile musangu mushale. Ndi musue kukuela lukonko ludi mu dibeji didi dilonda.” Bala lukonko lua tshimfuanyi tshia 50: “ ‘Udi ujinga kuikala ne muoyo wa kashidi mu mparadizu eu mulenga anyi?’ [Lekela muntu andamune.] Pikalabi bushuwa dijinga diebe, mona tshiudi ne bua kuenza: ‘Pawikala muitabe, udi ne bua kulonga bivule pa bidi Nzambi wamba.’ [Bala Yone 17:3.] Nengikale ne disanka bua kulonga nebe Bible kuyi utula mfranga. Udi wela meji kayi?” Fila dîba dijalame dinuamonangana.
4 Biwikala uleja broshire wa “Monayi, ndi mvuija bintu bionso bipiabipia,” udi mua kutuadija kuleja tshimfuanyi tshia pa tshizubu pa kutshiolola ne kukonka ne:
◼ “Ku diebe dimona, ntshinyi tshidi tshikengela kuenza bua buloba bujima kufuananganabu ne nsombelu eu?” Teleja diandamuna. Zangika amue malu a pa tshimfuanyi maleja mu dibeji 3. Tungunuka ne: “Bantu bavule badi bela meji se: mbikole bua kushintulula nsombelu wa bantu mushindu eu. Kadi, bua Nzambi kabiena bikole nansha. [Ela nseka pa tshikoso tshia 43; pashishe bala Yeshaya 9:6, 7.] Nzambi mmulaye bua kujadika buloba bupiabupia, mparadizu mulenga muikala bantu ba bisamba bionso mua kusomba. Ndi musue bua ne: ubale broshire eu. Udi ukuleja mushindu uudi wewe ne dîku diebe mua kupeta diakalenga mu matuku atshilualua ku diambuluisha dia Nzambi.”
5 Mu dikumbula didi dilonda, pa kutumika ne broshire wa “Monayi,” udi mua kumvuija bua tshinyi bidi bia mushinga bua kumanya bivule pa Bible. Tshilejilu, bidi bikengela anu kuleja tshiakabidi tshizubu ne kuamba ne:
◼ “Musangu mushale, pamvua mukuleje tshimfuanyi etshi, tuvua bapetangane wewe ne meme, bua se: tudi basue kuikala ne muoyo mu buloba bulenga bua mushindu eu. Bushuwa, bua kuluabi bualu bulelela, kudi tshintu tshitudi ne bua kuenza tuetu bonso.” Bulula broshire wa “Monayi” ne bala tshikoso tshia 52, pamue ne Yone 17:3. Suikakaja lungenyi elu ku tshifuanyikijilu tshia mu tshikoso tshia 53 pa bidi bitangila dimanya dia Bible didi diakanyine, pashishe umvuija ne: Bantemu ba Yehowa badi bafila dilongesha bu nunku, kumbelu kua muntu ne kakuyi difuta mfranga. Lomba bua kuleja muntu mushindu udi ndongeshilu wetu wenzeka, ku diambuluisha dia mukanda wa Dimanya.
6 Biwikala uleja broshire wa “Bukalenge bualua kuasa Mparadizu,” udi mua kuamba nunku:
◼ “Ntu ngumvua bantu bavule bamba ne: mbasue kuikala mu mbulamatadi wikala ne bukokeshi—bua bushuwa—bua kujikija ntatu minene. [Tela malu adi alenga rejon wenu, bu mudi bulofua, divulangana dia dibunda bibawu anyi dinua dia bintu bia lulengu.] Bua muanda eu, ndi ndiebeja tshikala nsombelu wetu ne wa bantu batudi banange mu matuku atshilualua. Udi wela meji ne: nekuikale mbulamatadi kampanda wikala ne bukokeshi bua kujikija ntatu eyi anyi? [Teleja diandamuna.] Imue misangu ukadiku muambe ku muoyo Tatu Wetu. Pa nanku, uvuaku mujingulule ne: dîba adi uvua muikale usambila bua bukalenge buakane anyi?” Bulula broshire wa Bukalenge mu dibeji 3 ne bala bikoso bibidi bia kumpala. Pashishe pesha muntu broshire.
7 Pawikala uvua mushiye broshire wa “Bukalenge bualua kuasa Mparadizu,” udi mua kutuadija diyukidilangana musangu udi ulonda pa kuamba ne:
◼ “Musangu mushale, tuvua bayukile pa mushinga wa kuikala ne mbulamatadi muakane udi mua kujikija ntatu ya bukua-bantu. Broshire umvua mukushile udi ufunkuna Bukalenge bua Nzambi bu ditekemena dimuepele ditudi nadi. Bamue bantu badi badiebeja tshikale mbulamatadi au mua kuenza bua kuakaja nsombelu wetu. Bible udi uleja ne: Kristo ukadi mumane kuleja se: neatshimune muaba udi balombodi ba bukua-bantu bapangile.” Bulula broshire wa Bukalenge mu dibeji dia 29 ne bala bikoso binayi bia ndekelu. Sakidila ne: “Ki nnsombelu mulenga bua matuku atshilualua anyi? Udi musue kumupeta anyi?” Teleja diandamuna. Bala Yone 17:3. Kankamija muntu eu bua kumanya bia bungi ku diambuluisha dia dilonga dia Bible dia kumbelu.
8 Biwafila broshire mikuabu, udi mua kulonda bilejilu bidi ku mutu ebi bua kulongolola mbuelelu yebe. Pikalabi biakanyine, umvuija mukuteleji webe mu tshikoso bua tshinyi udi mumupeshe broshire ku dipa dikese. Tudilongololayi bimpe ne tulombayi dibenesha kudi Yehowa patudi tumanyisha lumu luimpe lua Bukalenge.