Mandamuna Ku Nkonko Yenu

◼ Tshia kuenza ntshinyi padi muanetu udi ne bua kuenza muyuki wa patoke kayi mufike pa dîba mu tshisangilu?

Bitu bienzeka ne: malu kampanda akêna mapangadika apumbishe muanetu bua kufika pa dîba bua kuenzaye muyuki mulongolola. Bikalabu mua kuela meji ne: neafike mu katupa kîpi, bakulu badi mua kuangata dipangadika dia kubanga Tshisangilu ne Dilonga dia Tshibumba tshia Nsentedi; Tshisangilu tshia patoke netshilonde pashishe. Pikalabi bimueneke patoka ne: ngamba-malu kakulua, imue misangu ngamba-malu kampanda wa mu tshisumbu udi mua kuenza umue wa ku miyuki ikadiye mumane kuenza.

Programe mulongolola bimpe kumpala kua dîba neambuluishe bua kuepuka muanda eu. Muanetu muomekela bujitu bua kuenza programe wa miyuki ya patoke udi ne bua kumonangana ne ngamba-malu yonso lumingu lumue kumpala bua kumuvuluija mudimu wende. Neamuvuluijilamu diakamue dîba dia tshisangilu pamue ne adrese ne nimero ya telefone ya ku Nzubu wa Bukalenge, pa kumupesha mamanyisha onso adi ne mushinga bua kufikaku. Ngamba-malu udi ne bua kufunda mamanyisha aa onso ne ntema. Udi ne bua kuangata mudimu mumupesha ne mushinga mudibi bikengela ne kuangata mapangadika adi akengela bua kukumbaja bujitu ebu. Biapetanganaye ne malu akêna mapangadika, diakamue udi ne bua kumonangana ne muanetu muomekela bujitu bua programe wa miyuki ya patoke bua kulongolola mumupinganyi. Bionso bidi ne bua kuenjibua kumpala kua dîba bua kuepuka dishipa programe dia mu minute ya ndekelu. Pikala ngamba-malu mujingakane bua minute mikese patupu, neenze muende muonso bua ela nshinga ku Nzubu wa Bukalenge, bua bana betu kudimuijibua ne kumanya tshia kuenza.

Pikala bangamba-malu ba patoke bangata midimu yabu ne mushinga, kuikale programe mulongolola kumpala kua dîba, bituenza mavuluija mavule adi akengela pa dîba ne bituateya ntema milombibue bua muanda eu, kakuyi mpata tshisumbu netshipete lumingu luonso muyuki wa patoke udi ukolesha.