Tunemekayi bakuabu—Tshitupa tshia kumpala

¹ Tudi ne disanka pa kumona se: tshisamba tshia Yehowa tshidi tshilubuluka, ke bidi bituala divula dia bungi bua bisumbu. Mu imue rejon, nangananga mu bimenga binene, badi batumika ne Nzubu ya Bukalenge kakuyi diikisha, bualu imue misangu bisumbu bivule bidi bisangila amu mu nzubu umue umue au. Nsombelu eu udi ulomba ntema ya bungi kudi buonso badi bualu ebu butangila.

² Mbimpe bua tshisumbu ne tshisumbu tshidi tshisangila mu Nzubu wa Bukalenge tshimushiye ne mankenda ne mulongolola bua bana betu baalua pashishe. Nkuasa neikale milonga, pa mesa a mikanda kapayi mukanda nansha umue, ne tshintu tshionso tshidibu bashiya mu nzubu nebatshiangule. Bisokomenyi bidi ne bua kusukudibua, badi ne bua kutekamu nsabanga, dituàyà ne mabeji a mankenda, ne kushiya mu diyala mutupu.

³ Padibu balongolola bua bisangilu bibidi bilondangane kunyima kua lupolu lua dîba luîpi, badi bapatuka ba ndekelu mu etshi tshia kumpala kabajingakanyi tshianana, bualu badi mua kusuya malongolola a etshi tshidi tshilonda. Padi bamue balunguluja miyuki yabu ya bulunda, badi bakutakaja tshibuelelu ne banengesha bana betu badi balongolola tshisangilu tshidi tshilonda. Pamu’apa muaba wa kuimanyika mashinyi mmukepele; nunku bidi bimpe bua kudienzeja bua kuya lukasa bua se: badi balua bapete muaba wa kuimanyika mashinyi abu. Kabidi, aba badi balua bua tshisangilu tshidi tshilonda kabena ne bua kufika kumpala kua dîba menemene to, bualu badi mua kupatshisha tshianana tshibuelelu, tshitekelu tshia bilamba anyi tshimanyikilu tshia mashinyi.

⁴ Padi bualu ebu butangila bisumbu bia bungi, bidi bikengela nangananga kuambuluishangana bikole bua kuakaja dilama dia ku lumingu dia Nzubu wa Bukalenge. Pa tshibidilu, bisumbu bitu bishintakajangana. Padibi mpungi wa tshisumbu tshienu, suayi nuenze disukula edi bimpe ne pa lukasa. Nunku, bisumbu bikuabu kabiakupeta pa kunungena.

⁵ Ku musangu ne ku musangu, nebikengele bua se: tshisumbu ne tshisumbu tshishintulule dilondangana diatshi dia bisangilu, nangananga mu dikumbula dia mutangidi wa tshijengu. Nunku bakulu badi ne bua kumanyisha kumpala kua dîba bena mu tshikuabu anyi bikuabu bisumbu bua kumonabu mua kumanyisha bamanyishi kumpala kua dîba. Pashishe, pikalabu balongolole bua kutumika ne nzubu bua tshibiilu kampanda tshianyishibue, tshilejilu Kalasa ka bampanda-njila, tshisangilu tshia bakulu ba mu tshijengu, anyi dibaka, badi ne bua kumanyisha bisumbu pamue ne batangidi ba bijengu buonso badi bualu ebu butangile kumpala kua dîba bua se: kabalongolodi bua kutumika ne nzubu tshikondu tshimue tshimue etshi.

⁶ Mu nzubu ya bungi, mutu musangila bisumbu bia bijengu bishilangane. Bidi ne mushinga bua se: batangidi bena ngendu badi batangila bisumbu ebi bamanyishangane matuku adibu balongolole bua kufika. Mashintuluka a ndekelu adi mua kukengedibua anyi ntatu mikuabu idi mua kujuka padi batangidi bena ngendu babidi balongolola dikumbula diabu lumingu lumue.

⁷ Pa kuenza madikolela bua kuleja kanemu bua bakuabu, pa kuenza programe wabu kumpala kua dîba ne pa kuambuluishangana, bisumbu nebilame malanda masheme munkatshi muabi ne nebikumbane bua ‘kuenza bionso mu buakane ne mu bulongame.’—1 Kol. 14:40, NW.