Batangidi bena ngendu—bakuatshishanganyi ba mudimu ne bakuabo mu bulelela
Mu tshisumbu tshia kumpala tshia bena nkristo, batangidi bena ngendu bavua bakumbula bisumbu bua kubikolesha. Bavua badifila ne muoyo mujima, kabayi bakeba difutu, bua kuambuluisha bena mu bisumbu bua kutungunukabo mu mushindu wa kulengelela Nzambi mu bionso.—Bienzedi 11:23, 24; 14:21, 22; 15:32; 20:2, 31-35; Filipoi 2:20-22, 29; 1 Tesalonike 2:5-12.
Lelu’eu, bisumbu bia Bantemu ba Yehowa bidi pabi bipeta mabenesha ku makumbula a batangidi bena ngendu. Balume aba badi ne bidimu bivule mu dimonamona dia mianda mu mudimu wa buambi ne wa butangidi. Mbalekele midimu yabo ya bianza ne majitu mavule mu mêku bua kudifila mu mudimu wa Nzambi wa ku dîba ne ku dîba Bikalabo basele, pa tshibidilu bakaji babo badi bapatuka nabo mu muine mudimu eu.
Mutangidi wa tshijengu udi ne bujitu bua tshijengu tshimue, tshidi ne bisumbu bitue ku 18 too ne ku 25. Udi ukumbula tshimue tshia ku biobi misangu ibidi ku tshidimu, kabidi kunyima kua bidimu bibidi anyi bisatu, badi bamutuma mu tshijengu tshikuabo. Nunku, mushindu’eu, bisumbu bidi mua kupeta mabenesha ku dimanya ne dimonamona dia mianda dia batangidi bena ngendu bashilangane.
Mutangidi wa tshijengu udi utabelela nsombelu wa mu nyuma wa tshisumbu ne ukonkonona mudimu watshi. Udi wenza miyuki mivule ne udisangisha ne bakulu ne basadidi ba midimu bua kumonabo mua kulengeja mudimu wabo mu tshisumbu.
Mu lumingu alu, mukajiende ne yeye muine, bikalaye musele, badi bapatuka mu mudimu wa budimi pamue ne bena mu tshisumbu bua kubambuluisha bua kudiundabo mu mudimu eu. Bubidi buabo badi bakumbula kabidi bantu bapiabapia badi basankidila bulelela bua kubakolesha mu ditabuja. Badi mua kukukumbula biwabalomba bua kuenza nunku.
Mutangidi wa distrike udi ne ngikadilu ya mu nyuma ne dimonanamona dia mianda bu mutangidi wa tshijengu. Udi ukumbula bijengu ku tshimue ku tshimue, ulongolola assemblée ku lumingu luonso. Mukajiende ne yeye muine badi pabo bapatuka mu buambi ne Bantemu ba Yehowa ba tshisumbu tshidiye ukumbula mu lumingu alu. Udi ulombola dilongolola dia ndekelu dia programme wa assemblée wa tshijengu, mudiye wenza miyuki mivule, ne diyuki dia patoke.
Padi batangidi bena ngendu bajikija dikumbula diabo mu tshisumbu anyi mu tshijengu, badi baya mu tshisumbu anyi tshijengu tshidi tshilonda, bilondeshile programme mujadika; too ne padibi bikumbudibua bionso munkatshi mua ngondo isambombo, pashishe batuadijilula dinyunguluka diabo.
Mu matunga mavule, batangidi bena ngendu badi ne mashinyi a luendu anyi bafutshila mashinyi bu bantu buonso. Badi mua kuenza luendu ku makalu anyi ku makasa. Société udi ubambuluisha ne makuta makese bua kufuta njila ne ubapesha, bobo ne bakaji babo makuta makese bua kupetabo bidibo bakengela. Pa tshibidilu, bena mu tshisumbu ke badi bangata bujitu bua kubapesha muaba wa kulala ne biakudia.
Mudimu eu udi ukengela lungenyi lua didifila ne didipangisha bintu bia ku mubidi. Batangidi bena ngendu ne bakaji babo mbapangadike bua kukuatshila bisumbu mudimu kabayi bakeba bua kubatekela majitu manene.—1 Tesalonike 2:9.
• Bua tshinyi kuvua batangidi bena ngendu mu tshisumbu tshia bena nkristo ba mu bidimu lukama bia kumpala?
• Lelu’eu, mmunyi mudi batangidi bena ngendu badivuije bakumbane ne badiepule ku amue majitu bua kukumbaja mudimu eu?
• Umvuija mudimu udi wenjibua kudi mutangidi wa tshijengu ne wa distrike. Badi bapeta bia kudiambuluisha nabi mushindu kayi?
[Miaku miumvuiji ya tshimfuanyi pa dibeji 20]
Mutangidi wa distrike wenza muyuki ku assemblée wa tshijengu
[Miaku miumvuiji ya tshimfuanyi pa dibeji 21]
Batangidi ba bijengu badi balongesha mu buambi ku nzubu ne ku nzubu, bayukila ne bakulu ba mu tshisumbu, bakumbula malonga a Bible mendesha ku nzubu ya bantu badi basankidila bulelela ne benza miyuki kumpala kua bisumbu