Mandamuna Ku Nkonko Yenu

◼ Ntshinyi tshitudi ne bua kutabalela patudi tufundila bantu batutu katuyi tusangana ku mabu mikanda?

Bua tubingila kabukabu, tudi babambishe ne: bidi bienda bikola bua kusangana bantu ku mabu. Bamue bamanyishi batu bamona se: bidi ne dikuatshisha bua kubafundila, ne ngenzelu eu udi mua kupatula bipeta bimpe; kadi bidi bikengela kuvuluija amue malu atuepula ku ntatu:

Kutumiki ne adrese wa Société nansha. Ebi bidi mua kuelesha meji ne: mukanda mmufumine ku biro pabi kabiyi nanku, bidi mua kukebesha bilumbu ne kufikisha ku ditudisha mfranga tshianana.

Ikala mushindike se: adrese wa muntu uudi ufundila mmujalame ne mfranga mifuta bua dituma mukanda mmikumbane.

Kutuminyi muntu mukanda kauyi mufunda dîna diende.

Kushiyi mikanda ku biibi.

Mikanda mîpi mmitambe buimpe. Pamutu pa kufunda muyuki kauyi ndekelu, ubambakaje trakte peshi tshibejibeji ku mukanda.

Mikanda mifunda ku tshiamu mmipepele bua kubala ne idi ifila mmuenenu mulenga mutambe.

Mukanda kawena ne bua kubadibua bu dikumbulula nansha, amu biwikala uvua mumane kudifidila bumanyishi wewe muine kudi muntu uudi ufundila.

Biwafundila muntu ukavua muleje dijinga dia kumanya, udi ne bua kufunda adrese webe peshi nimero ya telefone ya muaba udiye mua kukupetela. Umvuija programe webe wa dilongesha Bible.

Bikila muntu mu bisangilu bia tshisumbu, pa kumumanyisha bimpe adrese ne dîba ditubi bienzeka.

Kufundidi kabidi bantu bavua kabayi ku mabu mikanda paukadi mupingaje teritware; mumanyishi udibu bapeshe teritware eu mpindieu ke wakuata mudimu wa kuyishamu.