Tudituayi Mu Mudimu Wikala Kauyi Mua kuenzeka Kabidi Nansha

¹ Mu bikondo bishilashilangane bia mu miyuki ya bantu, Yehowa wakakumbaja dilumbuluisha diende kudi baluishi bende. Kadi, bua luse luende, wakalongoluela bantu ba mitshima milulame njila wa lupandu. (Mus. 103:13) Ngandamuinu wabu uvua ne mushinga mukole bua tshivua ne bua kubafikila.

² Tshilejilu, kumpala kua mvula wa kabutu, mu 2370 Kumpala kua Bikondo Bietu ebi, Nowa uvua “muambi wa malu mimpe.” Aba bakabenga didimuija dia kudi Nzambi bakafua. (2 Pet. 2:5; Eb. 11:7) Kumpala kua dibutudibua dia Yeruzaleme, mu 70 Bikondo Bietu ebi, Yezu wakaleja patoke tshivua tshikengedibua kuenza bua kuepuka kabutu kavua ne bua kudituta pa tshimenga. Aba bonso bakabenga mukenji wende wa didimuija bakafika ku bipeta bibiabibi. (Luka 21:20-24) Mu bule bua miyuki ya bantu muakamueneka misangu mivule madimuija a mushindu eu ne malumbuluisha a kudi Nzambi.

³ Mudimu wa didimuija mu tshikondo tshietu: Kukadi tshikondo tshile, Yehowa wakamba ne: tshiji tshiende netshipongolokele ndongoluelu mubi wa mpindieu ne bena budipuekeshi nkayabu ke bapandishibua. (Sef. 2:2, 3; 3:8) Tshikondo tshidi tshishale bua kumanyisha didimuija edi tshidi tshipita lukasa menemene! “Dikenga dinene” dikadi pabuipi, ne disangisha dia bena budipuekeshi didi dienda dienzeka. Bushuwa, “madimi . . . mmatoke bua dinowa.” Nunku, kakuena mudimu udi ne mushinga ne wa kuenza pa lukasa bu eu nansha.​—⁠Mat. 24:14, 21, 22; Yone 4:​35, NW.

⁴ Lelu’eu, tudi ne bua kumanyisha didimuija edi kudi bantu netu, ‘nansha biumvuabu peshi biabengabu.’ Mbujitu bufila kudi Yehowa butudi katuyi ne bua kubenga. (Yeh. 2:4, 5; 3:17, 18) Pa kuditua mu mudimu eu tshishiki, tudi tuleja ne dituishibua dinanga dietu diondoke bua Yehowa, ditabalela dia muntu netu ne muoyo mujima ne ditabuja dietu dikena ditenkakana mu Musungidi wetu, Yezu Kristo.

⁵ Mpindieu ke tshikondo tshia kukuata mudimu: Mu tshikondo tshia kale, panyima pa malumbuluisha a Yehowa mamane kukumbana, bubi buvua bujuka tshiakabidi, bualu Satana ne ba-demon bende bavua amu batungunuke ne midimu yabu. Kadi, bua mpindieu, malu neashintuluke. Buenzeji bua Satana nebumbushibue. Kabiakukengela kabidi kufila dimanyisha dia pa buloba bujima pa bidi bitangila disemena dia “dikenga dinene.” (Buak. 7:14; Lomo 16:20) Tudi ne disanka dia pa buadi dia kuenza tshietu tshitupa mu mudimu wikala kauyi mua kuenzeka kabidi nansha. Ke tshikondo tshia kuenza muetu muonso mu mudimu etshi.

⁶ Ne dituishibua dinene, mupostolo Paulo wakamba pa bidi bitangila mudimu wende wa buambi ne: “Ndi mbingishibua ku mashi a bantu bonso.” (Bien. 20:26) Kayi ulengulula bua kumanyisha didimuija, kavua udiumvua mupie tshibawu tshia dibanza dia mashi. Bua tshinyi? Bualu wakafika ku diamba bua mudimu wende ne: “Bua bualu ebu kabidi ndi ngenza mudimu bikole, ndi ntshinta bikole.” (Kolos. 1:29) Tudituayi muetu muonso mutudi mua kuenza mu mudimu eu wikala kauyi mua kuenzeka tshiakabidi nansha, ne netusankishibue bu Paulo!​—⁠2 Tim. 2:15.