Dikeba Bampanda-njila Bambuluishi 100 000

Newikaleku mua kuenza bumpanda-njila buambuluishi

mu Luabanya? mu Tshisanga? mu Lumungulu anyi?

¹ “Dikeba bamanyishi 1 000.” Etshi ke tshivua mutu wa tshiena-bualu tshipatula mu Tshibumba tshia Nsentedi mu Tshisanga 1881. Tshivua tshilomba bantu balume ne bantu bakaji bonso baditshipe, “badi Mukalenge mupeshe dimanya dia bulelela buende,” bua kutumikabu muabu muonso ne dîba diabu bua kumuangalaja bulelela bua mu Bible. Aba bavua ne mushindu wa kufila mêba kaayi makepele ku tshiabibidi tshia dîba diabu dionso anu bua mudimu wa Mukalenge bavua bakankamijibue bua kuikala bena budisuile bua kulua bamuangalaji ba evanjeliyo bendakanyi​—⁠badianjidi ba bampanda-njila ba lelu.

² Bikala bikondo mbishintuluke kubangila ku bidimu bia 1800, bualu bumue ki mbushintuluke: basadidi ba Nzambi batu basue kutungunuka ne kutumika muabu muonso ne dîba diabu bua kumanyisha lumu luimpe. Pa kuikala bampanda-njila bambuluishi, bamanyishi ba mu tshisumbu badi badienzeja bua kufila dîba ditamba kuvula mu mudimu wa Bukalenge, ke tshidi tshibambuluisha bua kutamba kupatula bipeta bilenga.​—⁠Kolos. 4:17; 2 Tim. 4:⁠5.

³ Katshia mudimu wa bumpanda-njila buambuluishi watuadija, nkama ya binunu bia bana betu balume ne bakaji badi basunyinaku disanka. Mushindu eu wa mudimu wa bumpanda-njila mmukebeshe musangelu muvule, ne kuenzabi bua se: mu Tshisanga 1985 babale bungi bubandile bua bampanda-njila bambuluishi 100 000 mu États-Unis! Katshi’apu, biakenzeka misangu isatu bua se: bamanyishi bapite pa 100 000 bikale bampanda-njila bambuluishi mu ngondo wa Tshisanga: mu 1988, 1989 ne 1992. Mu Burundi, Congo, ne Zaïre, katuvua bafike peshi bapite pa bishiferi bia tshidimu tshia mudimu tshia 1995. Kudi kumueneka dipueka ne bungi budi bua 100 mu Burundi, 359 mu Congo ne 6 016 mu Zaïre mu tshidimu tshia mudimu 1996. Kakuyi mpata, kudi kabidi mushindu wa kuenzulula madikolela malenga aa mu ngondo ya Luabanya, Tshisanga ne Lumungulu. Mushindu mulenga wa kusonsola lungenyi lua bumpanda-njila ng’wa se: bakulu bafile tshilejilu, pa kuenza buobu bine mudimu eu, peshi nansha pa kuvudija dipatuka diabu mu buambi munkatshi mua tshikondo etshi.

⁴ Tudi tukukankamija bua kudifundila tshipatshila tshia kuikala mpanda-njila muambuluishi mu ngondo umue peshi ya bungi, mu Luabanya, mu Tshisanga ne mu Lumungulu. Bua tshinyi mu Luabanya? Bualu tshidimu etshi Tshivulukilu tshia lufu lua Kristo netshikale mu dia 23 Luabanya. Bualu butambe bulenga bua kuenza ki mbua kubabidila mbingu ya kumpala kua muanda eu bua kudifila ne lukunukunu mu mudimu wa bumanyishi bua Bukalenge mutuadija kudi Mukalenge ne Musungidi wetu Yezu Kristo anyi? Pa kuenza mudimu muvumvuke wa bumanyishi mu Luabanya, netuikale mua kubikila bantu bavule badi banyisha kudisangisha netu bua Tshivulukilu tshia lufu lua Kristo. Kabidi, ngondo eu udi ne matuku a Disambombo atanu ne a Dia lumingu atanu, ke tshidi tshipetesha mushindu wa kudifila bikole mu buambi ku ndekelu kua lumingu. Kakuyi mpata, bituatungunuka ne kuenza mudimu ne lukunukunu mu ngondo ya Tshisanga ne Lumungulu, netuikale mua kulama disankidila ditudi bajudije ne kutuadija malonga a Bible a ku nzubu ku diambuluisha dia broshire wa Ntshinyi tshidi Nzambi utulomba? Netunyunguluke kabidi teritware wetu mu buondoke, nangananga ku ndekelu kua lumingu, pa kuleja bibejibeji bia ndekelu bia Tshibumba tshia Nsentedi ne bia Réveillez-vous !

⁵ Nnganyi udi mua kuikala mpanda-njila muambuluishi? Mukanda wa Badilongolole bua kuenza mudimu wetu bimpe udi ujadika mu dibeji 113 ne: “Nansha biwikala mu nsombelu wa mushindu kayi, biwikala mutambule, ne muikale ne ngikadilu muimpe, ne mudilongolole bua kuenza mêba 60 ku ngondo mu mudimu wa buambi ne mudilongolole bua kuenza mudimu wa bumpanda-njila munkatshi mua ngondo umue nansha ya bungi, bakulu ba tshisumbu tshienu nebasanke bua kuanyisha dilomba diebe bua wewe kuenza mudimu eu.” Newikaleku mua kuanyisha muabi eu mu Luabanya? mu Tshisanga? mu Lumungulu anyi?

⁶ Bikala bakulu ne mmuenenu muimpe ne bamanyishi bakuabu bikale batua dipangadika edi nyama ku mikolo ne muoyo mujima, dibikila edi bua bampanda-njila bambuluishi 100 000 neditshimune. (Eb. 13:⁠7) Bamfumu ba mêku bonso mbakankamijibue bua kuela meji pa bungi bua bena mu nzubu yabu badi mua kubuela mu mulongo wa bampanda-njila bambuluishi munkatshi mua ngondo nansha umue kumpala eku.​—⁠Mus. 148:​12, 13; fuanyikija ne Bienzedi 21:​8, 9.

⁷ Kuambi lukasalukasa ne: mudimu wa bumpanda-njila buambuluishi mmupite makokeshi ebe anu bua mudimu webe wa ku mubidi wa ku dîba ne ku dîba, bua programe webe wa kalasa, bua majitu ebe a mu dîku peshi bua majitu makuabu a mu Bible. Bua bamue, kabiena pamu’apa mua kuikala bipepele bua kudituamu; kadi, badi mua kufika ku diwenza pa kudilongolola bimpe ne ku dibenesha dia Yehowa. (Mus. 37:5; Nsu. 16:⁠3) Ulekele dijinga dia kuditua mu mudimu wa bumpanda-njila dienzeje nsombelu webe; kulekedi nsombelu webe wenzeja dijinga diebe dia kuikala mpanda-njila nansha. (Nsu. 13:19a) Nenku, bikale ne dinanga diondoke bua Yehowa ne bua muntu nabu, ba bungi nebikale mua kushintulula programe wabu wa ku lumingu bua kualabaja mudimu wabu mu ngondo umue. (Luka 10:​27, 28) Masanka mavule mmindile aba badi benza madikolela a bungi mu mudimu wa Bukalenge.​—⁠1 Tim. 4:⁠10.

⁸ Tshidi bumpanda-njila buambuluishi bukumbaja: Madikolela menza ne anyima mujima kudi binunu bia basadidi ba Nzambi pa kuikala bampanda-njila bambuluishi adi musambu munene wa disamuna Yehowa. Bu mudi bamanyishi aba badifila bua kumanyisha lumu luimpe kudi bantu bavule, badi pabuipi menemene ne Yehowa. Bushuwa, badi balonga mua kumueyemena bikole bua kupeta spiritu wende ne bua kuikala babeneshibue.

⁹ Dikalaku dia bampanda-njila bambuluishi, ba pa tshibidilu ne ba pa buabu badi batumika netu didi dijula lungenyi lupialupia lua dizanzamuka mu tshisumbu. Bu mudibu bayukila ne bakuabu pa malu abu mamonamona mu buambi, musangelu wabu udi wambulukilangana. Abi bidi bikankamija bakuabu bua kukonkonona tshiakabidi midimu idibu bateka kumpala, pamue ne makokeshi abu a kuenza bipitshidile mu mudimu wetu wa mushinga mukole. Muanetu wa bakaji wakatambula ne bidimu 70 wakatuadija diakamue bumpanda-njila buambuluishi mu mushindu mutungunuke. Bakamuebeja panyima pa bidimu ne: bua tshinyi, bukole buende abu, uvua utungunuka ne kudifila bikole mu mudimu pa kuikala mpanda-njila muambuluishi ngondo yonso? Nunku Wakandamuna ne: uvua udiumvua bu munyange bidimu 70 bia kumpala bia muoyo wende ne kavua musue bua kuikalabi kabidi nanku bua bidimu bia muoyo bivua bimushadile!    

¹⁰ Mumanyishi yonso udi mpanda-njila muambuluishi udi ulua muzanzamuke mu mudimu. Ntemu kampanda nsonga wakitaba wamba ne: ‘Pamvua muana, mvua ne tshibidilu tshia kufila baledi banyi mu mudimu wabu wa buambi. Mvua mbimona bu dinaya. Kadi kunyima kua bikondo, ngakamona se: mu tulasa mvua nshilangana ne balongi nanyi. Ngakatuadija kumvua bibi bua kuyukila ne balongi nanyi pa bulelela. Bumanyishi bua ku nzubu ne ku nzubu buvua buntshinyisha bikole pamvua ngela meji ne: mvua mufuane kupetangana ne muntu kampanda wa mu kalasa. Ndi ngela meji ne: tshimvua natshi nditshina dia bantu. [Nsu. 29:25] Pangakajikija tulasa tuanyi, ngakasua kuteta bua kuikala mpanda-njila mu tshikondo kampanda. Tshipeta tshidi se: buambi buakansankisha mu mushindu mukuabu mushilangane ne umvua ngumvua kumpala. Tshivua kabidi mbuangata bu mudimu wa dinaya peshi bu bujitu busuyakaji. Pamvua mmona bantu bamvua ndonga nabu Bible balubuluka mu bulelela, mvua ndiumvua musankishibue bikole bua tshijadiki tshimueneke tshia muvua Yehowa Nzambi usanyika madikolela anyi.’ Nsonga eu mmutungunuke ne kusadila bu mpanda-njila wa pa tshibidilu.

¹¹ Mu nsombelu mulelela, padiku bampanda-njila bambuluishi ba bungi mu tshisumbu, badi mua kunyunguluka teritware mu buondoke. Muanetu utu wabanya teritware udi mua kulomba diambuluisha dia bampanda-njila bambuluishi bua kuyisha mu miaba mienzela mudimu mu mpukapuka. Bikalabu bambule biakudia ne benza mudimu dituku dijima, nebibapeteshe mushindu wa kuyisha nansha mu miaba ya kulekule ya mu teritware.

¹² Bakulu badi bangata mapangadika: Bua ngondo wa Luabanya, Tshisanga ne Lumungulu, nebikale bimpe bua kulongolola mishindu mivule ya bumanyishi mu mêba mashilashilangane a mu lumingu, pamue ne mu mêba masemene a mu mapingaja ne ku dilolo, bua bamanyishi bavule bamone mua kudituamu. Pa kumbusha bumanyishi bua pa tshibidilu bua ku nzubu ne ku nzubu, nebalongolole bikondo bia kufila bumanyishi mu misesu, kuyisha mu teritware ya bangenda ne kumonangana ne aba bavua kabayi ku mabu. Pa kuangata mapangadika a mushindu’eu bakulu nebambuluishe bampanda-njila bua kusadila pamue ne tshisumbu mu mêba mabakanyine. Tshisumbu tshidi ne bua kuikala tshimanye bimpe malongolola menza bua buambi. Bisangilu bia buambi bidi ne bua kulongolodibua bimpe. Kabidi, kudi ne bua kuikala teritware mikumbane, ne nebavuluke bua kudianjila kulombesha bibejibeji bikumbane ne mikanda mikuabu.

¹³ Enza programe webe nkayebe wa mudimu: Muanetu wa balume kampanda, uvua kumpala welakana bua kuikala mpanda-njila muambuluishi, wakamba ne: “Bidi bipepele kupita mumvua tshiyi mua kuela meji. Tshidi ne bualu nkuikala ne programe muimpe.” Mu dibeji dia ndekelu dia tshisakidila etshi, udiku umona tshilejilu tshia programe wa mpanda-njila muambuluishi udi mua kukuakanyina anyi? Bua kufikaku, bidi bikengela amu kuenza mêba 15 mu mudimu lumingu luonso.

¹⁴ Bitu misangu mivule bipepele bua bamamu ba nzubu ne bua aba batu benza midimu mu tusumbu dilolo bua kuikala bampanda-njila bambuluishi pa kudiakaja bua kuyisha mu dinda. Bansonga batu baya mu kalasa ne bamanyishi batu benza mudimu butuku badi mua kuangata mêba masemene a mu mapingaja bua kuya mu buambi. Bakuabu, batu benza mudimu wa ku mubidi wa ku dîba ne ku dîba, bakela meji ne: bavua ne mushindu wa kuangata dituku dimue dia diikisha ku lumingu, anyi kupitshisha matuku a ku ndekelu kua mbingu majima mu buambi, ne pa kufila kabidi bumanyishi ku dilolo. Munkatshi mua aba badi mua kuyisha pa kuamba anu ku ndekelu kua lumingu, ba bungi batu basungula ngondo idi ne matuku a ku ndekelu kua mbingu atanu majima. Bua tshidimu etshi, nebikale nanku bua ngondo ya Luabanya, Tshimungu ne Kasuabanga. Ku diambuluisha dia programe kayi muuja wa mu dibeji 6, ela meji bimpe ne mu disambila pa programe watamba kukumbanyina nsombelu webe.

¹⁵ Bulenga bumue bua mudimu wa bumpanda-njila buambuluishi mbujoboke buawu. Udi mua kudisunguila ngondo iwikala mpanda-njila, ne udi mua kuenza nanku misangu yonso iwajinga. Pamu’apa uvua muanyishe bua kuikala mpanda-njila muambuluishi mu mushindu mutungunuke, kadi kuyi ukumbana. Bua tshinyi kubenga kuenza nanku ngondo yonso padiku mushindu? Bishilangane, bamue badi mua kuikala bampanda-njila bambuluishi ku ngondo ne ku ngondo bua tshikondo tshile.

¹⁶ Tshitumpikilu bua kuikala mpanda-njila wa ku dîba ne ku dîba: Ba bungi badi ne lungenyi lua bumpanda-njila mbasue bua kuikala bampanda-njila ba pa tshibidilu kadi badi badiebeja bikala nsombelu wabu mua kubapetesha mushindu wa kuenza nanku ne bikalabu mua kupeta dîba dia bungi ne bukole bua kufikaku. Kakuyi mpata, bavule ba ku aba badi mpindieu bampanda-njila ba pa tshibidilu bavua kumpala bampanda-njila bambuluishi bua kuditeta bua mudimu wa ku dîba ne ku dîba. Pa kusakidila dîba dimue patupu ku dituku mu programe wa mpanda-njila muambuluishi, anyi kusakidila dituku dijima ku lumingu, kudi mushindu wa kuikala mpanda-njila wa pa tshibidilu. Bua kumona né bidi mua kukuakanyina, bua tshinyi kubenga kuteta kuenza mêba 90 mu buambi munkatshi mua ngondo nansha umue muudi mpanda-njila muambuluishi? Mu tshikondo tshimuetshimue etshi, neupete bantu ba kukumbula kabidi ne malonga a Bible, ne ke tshiavuija mudimu webe wa bumpanda-njila mushilashilangane ne wa nkatshinkatshi.

¹⁷ Muanetu wa bakaji kampanda uvua ne disanka dia kuikala mpanda-njila muambuluishi ngondo yonso munkatshi mua bidimu bisambombo. Tshipatshila tshiende tshivua tshia kutuadija bumpanda-njila bua pa tshibidilu. Bua bualu ebu, wakateta midimu inayi mishilangane ne ditekemena dia kuakaja nsombelu wamupetesha mushindu wa kufika ku tshipatshila tshia bampanda-njila ba pa tshibidilu tshia mêba 90. Ngondo yonso, uvua wenza programe umue anyi ibidi bua kumona né biakumbana. Kadi, pavuaye ukonkonona programe eyi, uvua udiambila ne: mudimu wa ku dîba ne ku dîba kauvua mua kumuakanyina. Pabi, wakatungunuka ne kulomba buludiki bua Yehowa. Ke dimue dituku, mu dilongolola tshisangilu tshiende tshia mudimu, kubalaye mu Mudimu wetu wa Bukalenge wa Kabitende 1991 (Mfual.) tshiena-bualu tshivua tshiamba ne: “Pamutu pa kuangata ne mushinga munekesha tshipatshila tshia mêba, bua tshinyi kubenga kutangija lungenyi luetu ku mishindu kabukabu idi mudimu eu utupetesha ya kuditua mu dinowa? (Yone 4:​35, 36)” Udi ulonda ne: “Ngakabalulula tshiambilu etshi njila itanu anyi isambombo ne mvua mujadike bushuwa ne: tshivua diandamuna dia Yehowa. Nenku ngakangata dipangadika dia kuikala mpanda-njila wa pa tshibidilu.” Nansha muvua mêba a mudimu wende wa ku mubidi ukena wa dituku dijima kauyi mutambe buimpe, wakenza dilomba dia bumpanda-njila bua pa tshibidilu. Kunyima kua lumingu lumue, mêba ende a mudimu akashintuluka ne aa avuabu bamupeshe avua mamukumbanyine bimpe. Udi ujikija pa kuamba ne: “Ki ntshianza tshia Yehowa anyi?” Ne usakidila ne: “Binualomba Yehowa bulombodi buende ne unupabu, kanububengi: nubuitabe.” Bikala dijinga diebe dia muoyo mujima dikale dia kulua mpanda-njila wa pa tshibidilu, panyima pa mumane kuikala mpanda-njila muambuluishi bua ngondo isatu mu Luabanya, mu Tshisanga ne mu Lumungulu pamu’apa newikale mutuishibue ne: wewe pebe udi mua kuenza mudimu wa ku dîba ne ku dîba.

¹⁸ Katuena tuela mpata bua se: Yehowa neabeneshe lukunukunu lua basadidi bende ne neakuatshishe madikolela abu bua kumanyisha lumu luimpe lua lupandu mu tshikondo etshi tshia mudimu wa pa buawu tshidi kumpala. (Yesh. 52:7; Lomo 10:15) Newandamune ku dibikila bua bampanda-njila bambuluishi 100 000 pa kuenza mudimu eu mu Luabanya? mu Tshisanga? mu Lumungulu anyi?

[Box on page 3]

Tshidi tshikengela kuenza bua kuikala mpanda-njila muambuluishi

■ Ikala ne mmuenenu muimpe wa malu

■ Sambila Yehowa bua kubeneshaye madikolela ebe

■ Lomba mumanyishi mukuabu bua kuikalaye mpanda-njila pamue nebe

■ Dienzele programe wa mudimu muakanyine

■ Lombesha bibejibeji bungi bukumbane

■ Utue mapangadika mangata kudi tshisumbu bua buambi nyama ku mikolo

■ Keba bikondo bia kufila bumanyishi bua mu mpukapuka

[Suggested programmes on page 6]

Programe Bua Kuikala Mpanda-njila Muambuluishi

Bilejilu bua kuenza mêba 15 mu buambi ku lumingu

Dinda​—⁠Dimue too ne ku Disambombo

Dia lumingu didi mua kupingana pa muaba wa dituku kayi dionso

DitukuDîbaBungi bua mêba

DimueDinda2:⁠30

DibidiDinda2:⁠30

DisatuDinda2:⁠30

DinayiDinda2:⁠30

DitanuDinda2:⁠30

DisambomboDinda2:⁠30

Mêba masangisha:15

Matuku majima abidi

Matuku abidi madisunguila mu lumingu

DitukuDîbaBungi bua mêba

DisatuDituku dijima7:⁠30

DisambomboDituku dijima7:⁠30

Mêba masangisha:15

Dilolo dia matuku abidi ne ndekelu wa lumingu

Dilolo dia matuku abidi madisunguila mu lumingu

DitukuDîbaBungi bua mêba

DimueDilolo1:⁠30

DisatuDilolo1:⁠30

DisambomboDituku dijima8

Dia luminguTshitupa tshia dituku4

Mêba masangisha:15

Mu lumingu mêba a mapingaja ne Disambombo

Dia lumingu didi mua kupingana pa muaba wa dituku kayi dionso

DitukuDîbaBungi bua mêba

DimueMu mapingaja2

DibidiMu mapingaja2

DisatuMu mapingaja2

DinayiMu mapingaja2

DitanuMu mapingaja2

DisambomboDituku dijima5

Mêba masangisha:15

Programe wanyi nkayanyi wa buambi

Pangadija bungi bua mêba a kuenza bua tshikondo tshionso

DitukuDîbaBungi bua mêba

Dimue

Dibidi

Disatu

Dinayi

Ditanu

Disambombo

Dia lumingu

Mêba masangisha:15