Bisumbu Bia Bantu Bidi Bisakidibua
1 Anu bu mu siekele wa kumpala, tshisumbu tshia bena nkristo tshidi lelu’eu mu didiunda dikena dianji kuenzeka. (Bien. 2:41; 4:4) Tshidimu tshishale, bayidi bapiabapia 366 579 bavua batambule, mmuomumue ne: muayene wa bantu bapite pa 1 000 badi batambula ku dituku! Bantu bapite pa muliyo mbatambule munkatshi mua bidimu bisatu bishale ebi. Bushuwa, Yehowa udi utungunuka ne kusakidila bisumbu bia bena kuitabuja.—Bien. 5:14.
2 Bapiabapia ba bungi, badi kabayi batambe kupiluka mu nsombelu wa Buena-nkristo, badi bakengela kupeta diambuluisha ne dishidimunyibua dia kudi aba badi bashindame mu ditabuja. (Lomo 15:1) Ku bena nkristo ba kumpala, bamue kabavua bakokeshe bua ‘kuya too ne ku [“dikola dia,” NW] tshishiki,’ nansha bidimu bivule kunyima kua batismo wabu. (Eb. 5:12; 6:1) Ke bua tshinyi Paulo wakela kashonyi, mu mukanda wende mufundila bena Ebelu, pa malu adi bena nkristo ne bua kulubuluka mu nyuma. Mmalu kayi, ne ndiambuluisha kayi didi mua kufidibua?
3 Dipeta bibidilu bimpe bia dilonga: Bilondeshile dilongesha dia Paulo, bua kuikala mulongi muimpe bidi bikengela kulonga mu mushindu muzanzamuke, kuambulula malu malonga ne kutumika ne ‘biakudia bikole’ bidi bulongolodi bua Yehowa bufila. (Eb. 5:13, 14; tangila Tshibumba tshia Nsentedi tshia dia 15 Tshimungu 1993, mab. 12-17.) Pa kuyukidilangana ne bapiabapia pa malu a mu nyuma ne pa kuabanyangana nabu biûma bia bulelela bitudi bafike ku dimanya mu didilongela dia muntu pa nkayende, kakuyi mpata, netubapeteshe dijinga dia kupeta bibidilu bimpe bia dilonga. Ku musangu ne ku mukuabu, tudi pamu’apa mua kubikila mupiamupia kampanda bua kuikalaye netu mu didilongela dietu dia muntu pa nkayende peshi dia mu dîku.
4 Dibuela pa tshibidilu mu bisangilu: Tshilejilu tshietu tshia lulamatu ne mêyi etu makankamiji mamba ne dinanga nebiambuluishe bena mu tshisumbu bapiabapia bua kuditabalela mu bualu bukuabu buleja kudi Paulo: “tshilele” tshia bamue tshia kupumbisha mu bisangilu bia bena nkristo. (Eb. 10:24, 25) Tubambuluishayi bua bamanye se: bisangilu ke njila wabu wa diyukidilangana dia mu nyuma ne tshisumbu. Tuangate dipangadika dia kuenza bua ne: badiumvue bakidila bimpe munkatshi mua bana betu.
5 Diambila Yehowa malu mu dimueyemena: Bua kutshimuna matekete a mubidi ne bilema bia bumuntu buetu, tudi ne bua kukeba diambuluisha dia Yehowa mu disambila, pa kumumanyisha ngenyi yetu miondoke ne malu atudi tupita kutatshila. Bapiabapia badi ne bua kumanya se: padibu basengelela Yehowa bua kubambuluishaye, bu mudi Paulo utukankamija, kabena ne bua kuteketa. (Eb. 4:15, 16; 10:22) Mu dilonda bitukadi tuetu bine bapetangane nabi mu bualu ebu, netukoleshe dituishibua diabu dia ne: Yehowa utu uteleja masambila adi afuma mu mutshima.
6 Dilama tshikondo bua mudimu wetu: Paulo mmuleje kabidi ne: pa ‘kufilafila kudi Nzambi mulambu wa kumutumbisha nawu’ tudi tudikolesha mu nyuma. (Eb. 13:15) Tudiku mua kulomba mumanyishi mupiamupia bua kudisangisha netu mu programe wetu wa ku lumingu wa buambi anyi? Pamu’apa tudi mua kudilongolola pamue bua kumanyisha mukenji anyi kukonkonona luseke kampanda lua mudimu lutuye kayi muanji kuteta.
7 Bisumbu bia bantu bidi bisakidibua bidi bijula disanka dinene. Pa kudifila bua kushidimuna ne kukankamija bena mu tshisumbu bapiabapia, netubambuluishe bua kudiibakilabu ditabuja dikole, didi dikengedibua bua ‘dilama dia anyima ne muoyo.’—Eb. 3:12, 13; 10:39, NW.