Tulongeshe Bakuabu Tshidi Nzambi Utulomba
1 Tudi anu mua kupeta kabidi bantu bavule badi bapange mushindu wa ‘kumvua mêyi a Yehowa.’ (Amo. 8:11) Bamue badi bitabuja ne: Nzambi udiku, kadi ki mbamanye malongolola ende peshi malu malomba ende. Nenku, tudi ne bua kubalongesha bulelela bupandishi bua Bukalenge. Bituikala bambule bia mudimu biakane ne badiakaje bua kufila bumanyishi mu tshikondo tshionso, netupete bantu badi ne dijinga dia kumanya tshidi Nzambi utulomba.
2 Mu Tshisanga ne mu Lumungulu, netuabanye Tshibumba tshia Nsentedi ne Réveillez-vous ! bikala ne biena-bualu biakanyine tshikondo etshi. Kabidi, netuleje bua musangu wa kumpala broshire wa Ntshinyi tshidi Nzambi utulomba? Bimfuanyi biende bilengele ne nkonko idi inana lungenyi bidi bimuvuija muakanyine bua bantu ba bungi. Mibelu idi ilonda eyi mmitupesha bua kutuambuluisha bua kutumika biakane ne mikanda eyi mitambe bulenga.
3 Tukebayi bantu: Mu teritware mutu bantu kabayi ku mabu patudi tuya ku nzubu ne ku nzubu, bidi bia meji bua kubakeba ne kuakula nabu muaba kayi wonso udibu. Tshisakidila tshia Mudimu wetu wa Bukalenge wa Kasuamansense 1996 ntshitukankamije bua kumanyisha lumu luimpe mu miaba yonso: mu misesu, mu mashinyi a diambula bantu, mu mpangu ya nyama, mu bimanyikilu bia mashinyi ne mu bijengu bia bungenda. Ntshitukankamije kabidi bua dikengedibua dia kukeba bikondo bia kuyisha mu mpukapuka. Tshilejilu, mpanda-njila kampanda wakaya mu lupangu lua nyama muikale ne bibejibeji bungi kansanga bia Réveillez-vous ! wa mu dia 8 Tshimungu 1996 udi ne tshiena-bualu tshia “ Espèces menacées : pourquoi s’en soucier ? ” (Bua tshinyi kuditatshisha bua nyama idi mu njiwu ya kujimina?) Mu lupolo lua dîba dimue, wakashiya bibejibeji 40 kudi bantu badi banange nyama bikole! Tukadiku bapatule bipeta bimpe mu dimanyisha lumu luimpe mu miaba yonso anyi? Tshibumba tshia Nsentedi, Réveillez-vous ! ne broshire wa Utulomba mbikumbanyine mishindu yonso ya difila bumanyishi, bu mudi malu adimu matangile nsombelu wa bantu ne ananyisha lungenyi.
4 Tutuadijayi diyukidilangana: Dibeji dia ndekelu dia Mudimu wetu wa Bukalenge wa Kasuabanga 1996 didi difila mamanyisha mashindika pa mushindu wa kulongolola dileja dietu nkayetu dia Tshibumba tshia Nsentedi ne dia Réveillez-vous ! Mibelu eyi idi kabidi ne mushinga bua dilongolola dia dileja dietu dia broshire wa Utulomba. Mêyi etu adi mua kuikala mipidija, biambilu bikese patupu, anyi adi mua kuikala malepesha bua kupatula lungenyi kampanda luangatshila mu mvese kansanga wa mu Mifundu. Bidi bikengela kusungula bimpe mêyi a ntuadijilu, bualu neasake pamu’apa muntu utudi tuyukila nende bua kutungunukaye ne kututeleja peshi kubenga. Bamue batu bapatula bipeta pa kutuadija nunku: “Ndi mubale tshiena-bualu tshidi tshinkankamije ne ndi njinga kukumanyishatshi.” Tudi kabidi mua kujula lukonko ludi lukoka ntema bua mutuyukidishi akule pende patudi tuyukidilangana.
5 Mu maleja ebe bua ngondo eu, bikalabi biakanyine mu teritware webe, udi mua kuteta bua kuela nkonko bu mudi eyi:
◼ “Lelu’eu, tudi tumona malu mafunda ku bimanu, bukoya ne dinyanguka dia buloba. Tshidi tshikengela ntshinyi bua kukezula buloba ne kubuvuija muaba mutambe bulenga wa kusombela?” Lekela muntu andamune ne mumvuija pashishe ne: tudi bamanye ne bajadike mushindu ne tshikondo tshialua buloba bujima lupangu lunene lulengeja. Muleje mu tshimue tshia ku bibejibeji bia ndekelu ebi diumvuija dishindika, mvese muîpi ne tshimfuanyi tshidi tshikoka ntema. Sakidila ne: ba bungi ba ku aba batu banange kubala mikanda yetu batu bafila dipa ditutu tutumika nadi ne disanka bua mudimu wetu wa pa buloba bujima. Kumpala kua kukomesha ne diyukidilangana, teta mua kumvuangana ne mukuyukidishi bua nulue kumonangana kabidi.
◼ “Udiku wela meji ne: Nzambi uvua ujinga kutumona basubisha kudi ntatu bu itudi tumona lelu’eu anyi?” Pikala muntu mumane kuandamuna, newikale mua kuamba ne: “Pamu’apa udi mumanye disambila divua Yezu mulongeshe bayidi bende, mudiye ulomba bua Bukalenge bua Nzambi bulue. Ukadiku muele meji ku tshidi mua kuikala Bukalenge bua Nzambi anyi?” Bulula broshire wa Utulomba mu dilongesha 6 ne bala nkonko miela ku mbangilu kua dilongesha. Pashishe, mu dibala tshikoso 1, koka ntema ku diandamuna dia lukonko lua kumpala. Mumvuije ne: diandamuna ku nkonko mikuabu didi kabidi dijadika. Leja broshire, akula bua mapa ne mulombe bua numonangane tshiakabidi bua kuakula bia bungi pa Bukalenge.
◼ “Bantu ba meji bavule mbamone se: bitendelelu bia mu bulongolodi ebu ke bidi mpokolo wa ntatu idi ifikila muntu pamutu pa kuyijikija. Udi wela meji kayi wewe muine?” Panyima pa mumane kuteleja mmuenenu wa mukuyukidishi, fila lungenyi kampanda lua mu tshibejibeji tshipiatshipia ludi mua kusonsola dijinga diende dia kumanya bivule pa dipangila malu dia bitendelelu peshi pa dikuluka diabi ditshilualua. Muebeje bikalaye wanyisha kubala tshibejibeji. Muambile dîna diebe ne muebeje diende, mulombe bua nuenu kumonangana kabidi bua kumumvuija ne: tshitendelelu tshilelela katshiena tshikengeshisha bukua-bantu. Bikalabi biakanyine, ambila muntu udi ne dijinga dia kumanya bivule ne: udi mua kufila dipa dikese.
◼ “Bu mudiku mpindieu ntatu mivule idi ifikila dîku, ukadiku mudiebeje nsapi udi wambuluisha bua kupeta disanka mu dîku anyi?” Lekela muntu andamune ne muleje ne: Nzambi udi ufila mu Bible nsapi mulelela wa disanka mu dîku. Newikale pamu’apa mua kubala Yeshaya 48:17. Pashishe ubulule broshire wa Utulomba mu dilongesha 8 ne uzangike imue ya ku mvese ya mu Bible mileja idi ifila mibelu miakanyine ya kulonda bua muena mu dîku yonso. Bala mulongolongo wa nkonko miela ku mbangilu kua dilongesha. Ebeja muntu bikalaye wanyisha bua kubala mandamuna. Bikalabi nanku, mupeshe broshire ne muambile ne: nansha baushiye kakuyi difila mushinga, tutu tuanyisha mapa makese a diambuluisha bua mudimu wetu wa buloba bujima. Muebeje bua numonangane kabidi bua kuakula bia bungi pa mibelu miakanyine ya mu Bible pa nsombelu wa disanka mu dîku.
6 Tshisakidila tshia Mudimu wetu wa Bukalenge wa Tshisanga 1997 ntshitukankamije bua kupeta dikima bua kuenza makumbulula. Tshivua tshifila mubelu pa mua kutumika ne broshire wa Utulomba bua kutuadija malonga a Bible mu dimonangana dia kumpala pikalaku mushindu, kabiyi nanku to, tudituadije mu dikumbulula. Dijinga ditambe bunene dia bukua-bantu ndia kumanya tshidi Nzambi utulomba ne, pashishe, kutshitumikila. (Kolos. 1:9, 10) Netutuadile muntu netu bia bungi mu ngondo ya Tshisanga ne Lumungulu bituikala mua kutuadija kumulongesha bitudi bamanye pa malu malomba a Yehowa bua kupeta muoyo.—1 Kol. 9:23.