Tutungunuke Ne Kulonda Yezu

¹ Musangu kampanda, Yezu wakamba ne: “Pikala muntu musue kundonda, adibenge, ambule [“mutshi wende wa tshinyongopelu,” NW] andonde.” (Mt. 16:24, MMM) Bushuwa, tudi tujinga kuandamuna bimpe ku dibikila dia Yezu. Tumone tshididi diumvuija pa kukonkonona tshiambilu ne tshiambilu.

² “Adibenge”: Pa kulambula muoyo wetu kudi Yehowa, tudi tudibenga tuetu bine. Ngumvuilu wa kumpala wa muaku wa tshiena-Greke mukudimuna se: “kudibenga” udi umvuija “kuamba ne: too.” Ebi bidi biumvuija ne: tudi tupidia ku budisuile malu atuvua tulumbila, majinga etu ne dikala bimpe dietu, pamue ne masanka etu a budisui, bapangadije bua kusankisha Yehowa bua kashidi.​—⁠Lomo 14:8; 15:3.

³ “Ambule mutshi wende wa tshinyongopelu”: Kuikala ne nsombelu wa muena nkristo, nkuambula mutshi wa tshinyongopelu udi muikale mudimu mulambula Yehowa ne lungenyi lua didibudisha masanka. Umue wa ku mishindu ya kuleja lungenyi elu lua didibudisha masanka ng’wa kudifila mu mudimu. Biangatshile ku ntuadijilu kua tshidimu etshi, bamanyishi bavule mbamane kutuadija mudimu wa bumpanda-njila buambuluishi. Binuikale munkatshi muabu, kakuyi mpata nudi mua kujadika ne: mabenesha adi afuminaku adi anupingajila masanka mavule mapite anuvua badibudishe. Bamanyishi badi kabayi mua kuenza mudimu eu batu badiakaja misangu mivule bua kutamba kupatuka mu buambi. Ke bua tshinyi bisumbu mbisemeje bisangilu bia buambi minute mikese kumpala kua dîba. Patudi tufika mu mushipu, bamanyishi bavule batu bababidila tshikondo tshimpe bua kuyisha. Bamue mbapatule bipeta bimpe bitambe, nangananga dîba divuabu basue kuenza ‘nzubu wa ndekelu’ peshi bayishe ‘minute mikese ya pa mutu.’

⁴ Kudifundila bipatshila mmushindu mukuabu wa kuleja lungenyi lua didibudisha masanka. Bamue mbalue bampanda-njila ba pa tshibidilu, pa kulongolola biakane programe ne pa kushintulula mushindu udibu batumika ne dîba diabu. Bakuabu mbapete mushindu wa kudilongolola ne kudiakaja bua kusadila ku Betele peshi bu ba-misionere. Bakuabu kabidi mbaye kuasa mu bitupa mudi dikengela dinene dia bamanyishi ba Bukalenge.

⁵ “Andonde”: Nansha muvua bayidi ba Yezu bapetangana ne mateta mavule, bakasunyina dikankamijibua mu lukunukunu ne dinanukila bivuaye uleja mu mudimu wende. (Yone 4:34) Bavua bumvua tshieledi tshiabu tshia lungenyi tshilua tshipiatshipia ku diambuluisha dia dikalaku diende ne dia mukenji wende. Ke bua tshinyi bavua bamulonda bavua bumvua disanka dilelela. (Mat. 11:29) Bia muomumue, tukankamijanganayi bamue ne bakuabu bua kukumbaja ne dinanukila mudimu munene wa dimanyisha Bukalenge ne wa dienza bayidi.

⁶ Tuanyishayi bonso bua kuandamuna biakane ku dibikila dia Yezu dia kumulonda tshiendelele pa kudima lungenyi lua didibudisha masanka! Pa kuenza nunku, netupete disanka dinene biangatshile ku mpindieu ne tudi mua kutekemena mabenesha matambe kuvula mu matuku atshilualua.