Tulombolayi Malonga A Bible Adi Alubuluka

¹ Muondapi mukaji kampanda wa mu Tanzanie, nsongakaji kansanga muena Argentine ne mamu kankenge muena ku Lettonie, busatu buabu mbafuanangane ku tshinyi? Annuaire 1997 (mab. 8, 46 ne 56) udi umvuija ne: bonso basatu bakenza malubuluka a pa lukasa pavuabu balonga Bible bualu bavua bajinge kukonkonona mukanda wa Dimanya misangu mipite pa umue ku lumingu. Bamanyishi bavua bakankamijibue, mu mushindu udi ukumbana, bua kudienzeja bua kulonga nshapita mujima ku dilonga. Pabi, bamue badi bamona se: ki mbualu bupepele. Nansha mudibi bisuikakaja ku nsombelu ne makokeshi bia mulongi ne mulongi, balongeshi bapiluke mbapatule bipeta bimpe mu ditumikila mibelu idi ilonda eyi.

² Bu muvuabi biumvuija mu tshisakidila tshia Mudimu wetu wa Bukalenge wa Kashipu 1996, bidi bikengela kulongesha balongi mua kudilongolola ku dilonga. Nebikale bimpe bua kumvuija mushindu wa kuenza kutshidi ku ntuadijilu. Muleje mukanda webe wewe muine wa Dimanya. Longololayi pamue dilonga dia kumpala. Ambuluisha balongi bua kupeta miaku minene ne biambilu bidi biandamuna buludiludi ku lukonko lufunda mu mukanda, pashishe wele kashonyi muinshi muabi peshi ubilaba diikala. Bamue bamanyishi bavua mene bapeshe balongi babu katshi ka diikala. Bakankamije bua kukeba mvese yonso padibu badilongolola. Pa kuenza nunku, neubambuluishe bua kudilongolola bua kubuela mu Dilonga dia Mukanda dia Tshisumbu ne mu Dilonga dia Tshibumba tshia Nsentedi.​—⁠Luka 6:40.

³ Mulongeshi mulenga katu wakula bia bungi, kadi udi usaka mulongi ku diakula. Udi wepuka kunengakana pa malu adi kaayi ne mushinga. Neikale mua kufila mamanyisha a pa mutu anu mu mpukapuka, kadi neazangike malu manene a dilonga. Bamue batu bapeshe balongi babu mikanda idi yandamuna ku nkonko yabu. Kupita apu, bantu badi badiakaje bimpe nebikale mua kuvudija mamanya abu mu dibuela mu bisangilu bia tshisumbu.

⁴ Kabiena bikengela kuangata mvese yonso mitela. Kudi mushindu wa kumvuija amue malu manene ku diambuluisha dia mvese idi ne mêyi ayi mu tshikoso. Mu diambulula, shindika mvese idi ne mushinga ne kankamija mulongi bua kuyikuata mu mutu.

⁵ Dilonga dionso nedikale ne bua kuangata tshikondo bule kayi?: Kanuimanyiki dilonga anu pa dîba dimuepele. Bamue batu ne dîba ne pamu’apa bajinga kulonga mutantshi mule, peshi misangu mipite pa umue ku lumingu. Mulongi udi mua kuenza nunku neababidile ngenzelu eu.

⁶ Lelu’eu, nkama ya binunu bia bapiabapia badi basamuna Yehowa ne, bu mudi Yeshaya 60:8 uleja, badi ‘baya lukasa bu ditutu, bu nyunyu ya nkutshi idi ibuela pa masoso a nzubu wayi’ mu bisumbu bia tshisamba tshiende. Nenku, tuenzayi bonso tshietu tshitupa ne tuenzejangane mudimu ne Yehowa, eku yeye wambuluja disangisha dia bantu badi bu mikoko.​—⁠Yesh. 60:22.