Mushindu wa kuenza bayidi ku diambuluisha dia mukanda wa Dimanya

¹ Bena nkristo bonso badi ne tshipatshila tshia bunême tshia kulongesha bakuabu bulelela ne kuvuija bayidi aba “badi mu ngikadilu udi ukengedibua bua kupeta muoyo wa kashidi.” (Bienz. 13:​48; Mat. 28:​19, 20, NW) Bua kutuambuluisha ku dienza nanku, bulongolodi bua Yehowa mbutulongoluele tshiamu tshia mudimu tshilenga: Mukanda wa Dimanya didi difikisha ku muoyo wa kashidi. Tshiena-bualu tshiawu tshidi tshiela kashonyi pa mushinga wa pa buawu wa malonga a Bible a ku nzubu. Bushuwa, bua kupeta muoyo wa kashidi, bidi bikengela kulonga mua kumanya Yehowa, Nzambi umuepele mulelela, ne muanende, Yezu Kristo.​—⁠Yone 17:⁠3.

² Mpindieu, mukanda wa Dimanya ke mukanda wa nshindamenu wa Société wa kutumika nawu mu malonga a Bible a ku nzubu. Ku diambuluisha diawu, tudi mua kulongesha bulelela bipepele, mu mushindu mutoke ne mu tshikoso. Abi nebituambuluishe bua kulenga mitshima ya batudi tulongesha. (Luka 24:32) Mbiumvuike ne: bidi bia mushinga bua se: eu udi ulombola dilonga akuate mudimu ne ngenzelu mimpe ya dilongesha nayi. Ke bua tshinyi tshisakidila etshi tshivua tshilongolola mu tshipatshila tshia kufila ngenyi ne mavuluija pa bidi bitangila ngenzelu ya dilongesha nayi idi imueneka miakanyine. Bilondeshile nsombelu wetu ne busunguluji, kakuyi mpata tudi mua kutumikila imue ya ku mibelu eyi peshi yonso. Tulamayi dibeji dia tshisakidila edi ne tuikale tuditangilatangila. Didi ne amue malu mashilangane adi mua kutuambuluisha bua kuikala ne mbabi patudi tuenza mudimu ne mukanda wa Dimanya bua kuenza bayidi.

³ Tulombolayi Dilonga dia Bible didi diya kumpala: Tulejayi ntema mikole ne milelela kudi mulongi, kumuangata bu muyidi muena nkristo ne bu muntu walua muanetu pashishe. Tuikalayi ne luya, bena bulunda ne bena musangelu. Bituikala bateleji ba ntema, netufike ku dimanya muntu​—⁠malu ende a kale ne nsombelu wende​—⁠ke biatuambuluisha bua kujingulula mushindu muimpe wa kumuambuluisha mu nyuma. Tuikalayi badilongolole bua kudifila bua diakalenga dia mulongi.​—⁠1 Tes. 2:⁠8.

⁴ Diakamue dilonga dimana kushindamija, bidi bia mushinga bua kukonkonona mu bulongame nshapita ya mu mukanda wa Dimanya. Nenku mulongi neapete lumvu lua ku kakese ku kakese lua bulelela, bualu mukanda udi umvuija biena-bualu bia mu Bible mu mushindu wa meji menemene. Enza mushindu wa se: dilonga dikale dipepele ne dikoka dianyisha, bua kuikaladi ne luya ne bua kuyadi kumpala. (Lomo 12:11) Bilondeshile nsombelu ne makokeshi a mulongi, bidi pamuapa mua kukumbana bua kukonkonona nshapita mivule mu dilonga dia mu dîba dijima, pamutu pa kukosa dilonga pankatshi. Balongi nebadiunde bikole bikala mulongeshi ne bobo bine banemeka dîba dijadika bua dilonga dia lumingu luonso. Pamuapa bidi mua kuikala bipepele bua kukonkonona ne bantu bavule nshapita 19 ya mukand’eu mu bule bua ngondo isambombo.

⁵ Tuadija dilongesha dionso ne tu-malu tua mu tshikoso tudi mua kusonsola dijinga dia kumanya bidi mu mukanda. Neumone se: tshiena-bualu tshia nshapita yonso tshidi tshienza mutu wa bualu udi ne bua kudiundishibua. Ka-tshiena-bualu konso kadi ne lungenyi lunene muinshi muaku, ebi nebikuambuluishe bua kulama mu lungenyi tshiena-bualu tshia nshapita. Wepuke bua kuakula bia bungi. Pa nanku udienzeje bua kufikisha mulongi ku didiakuila. Mu diela mulongi nkonko miludika pa bualu mu diumvuangana ne bikadiye mumanye, neumuambuluishe bua kuelaye meji ne bua kufilaye nkomenu mimpe. (Mat. 17:​24-26; Luka 10:​25-37; tangila mukanda wa Manuel pour l’École, dib. 50, tshikoso 10.) Ulonde bimpe mamanyisha adi mu mukanda wa Dimanya. Biwabueja mumvuija a pa mutu, neupambuke ku ngenyi minene anyi neuyijibakaje, ebi bidi mua kulepesha dilonga. (Yone 16:12) Bikala lukonko ludi kaluyi mu diumvuangana ne tshiena-bualu lujudibue, misangu mivule udi mua kuluandamuna ku ndekelu kua dilonga. Abi nebikuambuluishe bua kukonkonona dilongesha dia ku lumingu kakuyi disalu. Ambila mulongi ne: mu matuku atshilualua, neapete mandamuna ku nkonko yende mivule mu ditungunuka ne dilonga.​—⁠Tangila Manuel pour l’École, dib. 94, tshik. 14.

⁶ Bikala mulongi witabuja ne muoyo mujima Busatu bunsantu, dibenga kufua dia anyima, inferno peshi malongesha makuabu a mashimi ne bikala mumvuija a mu mukanda wa Dimanya kaayi afika ku dimutuisha, udi mua kumupesha mukanda wa Comment raisonner peshi mukanda mukuabu udi wakula bua bualu ebu. Muambile ne: nenuakuilepu panyima pa yeye mumane kueleela meji pa biabalaye.

⁷ Pa kutuadija ne kujikija dilonga ne disambila, bua kulomba bulombodi bua Yehowa, netupeshe tshikondo etshi [tshia dilonga] bunême, ne muntu yonso neatekibue mu ngikadilu wa lungenyi wa kunemeka pa kuteka Yehowa kumpala bu Mulongeshi wa bushuwa. (Yone 6:45) Bikala mulongi mutshikale unua makanya, imue misangu nebikengele kumulomba bua kanu munkatshi mua dilonga nansha.​—⁠Bienz. 24:16; Yakobo 4:⁠3.

⁸ Tulongeshayi biakane ku diambuluisha dia Mifundu, bilejilu, ne nkonko ya diambulula: Kabiyi kubala bungi bua misangu itukadi balonge bintu: mulongeshi muzanzamuke neabale dilongesha diende diambedi, pa kuela meji ku mulongi pa nkayende. Abi nebimuambuluishe bua kudianjidila kujingulula imue ya ku nkonko yende. Bua kulongesha biakane ikala ne lumvu luimpe lua malu manene a nshapita. Kebululula mvese bua kumona mushindu udiyi yumvuangana ne binudi nulonga ne upangadije bikala ne bua kubadibua munkatshi mua dilonga. Wele meji ku mushindu uudi mua kulongesha ku diambuluisha dia mifuanu ne nkonko ya diambulula idi ku ndekelu kua nshapita.

⁹ Pa kutumika biakane ne Mifundu, newambuluishe mulongi bua kujingulula ne: tshidiye ulonga m’Bible. (Bienz. 17:11) Kuata mudimu ne mêyi adi mu kazubu ka: “Ibidilangana ne Bible webe,” kadi mu dibeji dia 14 dia mukanda wa Dimanya, bua kumulongesha bua kupetaye mvese. Muleje mushindu wa kuvuluka mvese mitela ne mêyi ayi mu dilongesha. Pikala dîba mua kupeteka, keba ne nubale mvese idi mifila mu bikoso kadi mêyi ayi kaayi matela. Ebeja mulongi bua kumvuijaye mudi mvese eyi ipetangana ne itokesha bidi tshikoso tshiamba. Shindamena pa bitupa binene bia mvese bua mulongi kumvuaye kabingila ka dikalaku dia malu manene a mu dilonga. (Neh. 8:⁠8) Pa tshibidilu kabiena bikengela bua mulongeshi asakidile mvese pa eyi idi mu mukanda munkatshi mua dilonga nansha. Umvuija mushinga wa kumanya mêna ne dilondangana bia mikanda ya mu Bible. Imue misangu nebikale bia mushinga bua mulongi kubalaye Tshibumba tshia Nsentedi tshia mu Mfualanse tshia dia 15 Kabalashipu 1991, mab. 27-30. Padibi biakanyine, ukankamije dienza mudimu ne Traduction du monde nouveau. Udi mua kumuleja ku kakese ku kakese mushindu wa kutumika ne bimanyinu biende bishilashilangane bu mudi mvese mivuluiji idi munkatshi ne tshikebelu tshia miaku ya mu Bible.

¹⁰ Dilonga dia 34 dia Manuel pour l’École du minis­tère théocratique didi dileja ne: bilejilu anyi bifuanyikijilu bidi bisonsola diela dia meji ne biambuluisha bua kumvua bipepele ngenyi mipiamipia. Bidi bilenga kabidi lungenyi ne didiumvua dia munda mu mushindu wa se: mukenji ufidibue ne bukole, bidi kabiyi mua kuenzeka pa tshibidilu ne malu maleja patupu. (Mat. 13:34) Mukanda wa Dimanya udi ne bilejilu bivule bilongolola bua kulongesha, bidi bipepele ne bia bukole. Nenku, mu nshapita wa 17 tudi tupeta tshilejilu tshidi tshitusaka bua kuikala bena dianyisha bua mushindu udi Yehowa utupetesha, mu ngakuilu wa mu nyuma, biakudia, bia kuvuala ne bukubi ku diambuluisha dia tshisumbu tshia bena nkristo. Bimfuanyi bilenga bia mekala bia mukanda wa Dimanya bidi mua kukuatshibua nabi mudimu bua kusonsola majinga a munda. Pa kukonkonona ka-tshiena-bualu ka: “Dibiishibua dia disanka” mu dibeji dia 185, tshikoso tshia 18 nebikale ne buenzeji pa mulongi pikalaye mutangile mufuanu wa mu dibeji dia 86. Bumue abi nebimusake bua kumonaye se: dibiishibua ntshijadiki tshia dikalaku dia Bukalenge bua Nzambi.

¹¹ Bidi bikengela bua balongi ba Bible kudiundabu mu nyuma ku dilongesha dionso. Ke bua tshinyi kupu muoyo bua kuela nkonko ya diambulula idi mu kazubu ya: “Teta Dimanya diebe” kadi ku ndekelu kua nshapita yonso. Utekemene bia bungi kupita dileja lungenyi patupu dia bikavua bilongibue. Imue ya ku nkonko eyi idi ne tshipatshila tshia kujula diandamuna dia muntu pa nkayende didi difuma ku mutshima wa muntu. Tshilejilu: Tangila dibeji dia 31, mudibu bebeja mulongi ne: “Nngikadilu milenga kayi ya Yehowa Nzambi idi ikulenga ku muoyo mu mushindu wa pa buawu?”​—⁠2 Kol. 13:⁠5.

¹² Lejayi balongi bua kudilongolola ku dilonga: Mulongi údí udianjila kubala dilongesha, udi ubambisha mandamuna ne wela meji pa mushindu udiye mua kumvuija mu ende mêyi, neadiunde lukasa mu nyuma. Ku tshilejilu ne makankamija biebe, udi mua kumuibidija bua kudilongolola ku dilonga. Muleje webe mukanda, muudi muele mishonyi pa biambilu ne miaku minene. Muleje mushindu wa kupeta diakamue mandamuna ku nkonko mifunda. Udi mua kuambuluisha mulongi pa kulongolola nende nshapita umue. Mukankamija bua adiakuile mu yende miaku. Ke mushindu umu’epele wa kujingulula né udi umvua malongesha. Bikalaye ubala mandamuna mu mukanda, udi mua kusonsola tshieledi tshiende tshia meji pa kumuebeja mushindu udiye mua kumvuija muntu mukuabu lungenyi elu mu mêyi ende nkayende.

¹³ Ukankamije mulongi bua kukeba mvese ikena mitela munkatshi mua didilongolola diende dia ku lumingu luonso, bualu kanuakupeta imue misangu dîba dia kuyibala yonso munkatshi mua dilonga. Muela kalumbandi bua madikolela adiye wenza pa kudilongoluela malongesha ende. (2 Pet. 1:5; tangila Tshibumba tshia Nsentedi tshia mu dia 15 Tshimungu 1993, mabeji 13-14, mutudi tupeta ngenyi mikuabu pa bidi mulongeshi ne mulongi mua kuenzabu bua se: mulongi afike ku diyila bimpe diba dia dilonga dia Bible.) Mu mushindu’eu mulongi udi ufika ku didibidija bua kulongolola bisangilu bia tshisumbu ne ku difila mandamuna malenga. Nealonge mushindu wa kupeta bibidilu bilenga bia didilongela; nenku neikale muakajibue bua kudiunda mu bulelela diakamue pajika dilonga diende dia mukanda wa Dimanya.​—⁠1 Tim. 4:15; 1 Pet. 2:⁠2.

¹⁴ Tutangijayi balongi ku bulongolodi bua Yehowa: Aba badi benza bayidi badi ne bujitu bua kutangija balongi ku bulongolodi bua Yehowa. Mulongi neaye kumpala lubilu mutangile ku buntu bukole bua mu nyuma bikalaye witaba ne wanyisha bulongolodi bua Nzambi ne mutuishibue ku mushinga wa kuikalamu. Tudi tujinga bua se: ikale ne disanka dia kutantshila basadidi ba Nzambi ne ikale ne dijinga dia kuikala netu ku Nzubu wa Bukalenge, kuapetelaye dikankamijibua dia mu nyuma ne dia mu lungenyi kudi tshisumbu tshia bena-nkristo.​—⁠1 Tim. 3:⁠15.

¹⁵ Broshire wa Bantemu ba Yehowa​—⁠Mu bobumue bua kuenza disua dia Nzambi pa buloba bujima mmupatula bua kuambuluisha bantu bua kuibidilanganabu ne bulongolodi bumu’epele budi Yehowa ukuata nabu mudimu mu matuku etu aa bua kukumbaja disua diende. Diakamue dilonga dimane kushindama, bua tshinyi kubenga kupesha mulongi wende broshire. Anu ku ntuadijilu, ubikile mulongi misangu yonso mu bisangilu. Muambile mushindu udibi bienzeka. Udi mua kumumanyisha tshiena-bualu tshia muyuki wenjibua peshi kumuleja tshitupa tshia Tshibumba tshia Nsentedi tshikala mua kulongibua. Pamuapa udi mua kupeta mushindu wa kumuleja Nzubu wa Bukalenge dîba dikena dia bisangilu, bua kunyemesha buôwa budiye mua kumvua bua kuya muaba mupiamupia bua musangu wende wa kumpala. Kakuyi mpata, udi mua kumulomba bua kulua nende mu bisangilu. Padiye ulue, muleje disanka bua adiumvue bu muntu muakidila bimpe. (Mat. 7:12) Muleje kudi Bantemu bakuabu, kabidi ne kudi bakulu. Tudi batekemene se: neabange kumona tshisumbu bu dîku diende dia mu nyuma. (Mat. 12:​49, 50; Mako 10:​29, 30) Udi mua kumutekela tshipatshila tshidiye mua kukumbaja ku kakese ku kakese, bu mudi kubuela mu tshisangilu tshimue ku lumingu luonso.​—⁠Ebelu 10:​24, 25.

¹⁶ Padi dilonga dienda didiunda mu mukanda wa Dimanya, shindamena pa bitupa bidi bileja dikengedibua dia kutantshila tshisumbu misangu yonso mêba a bisangilu. Wikale pa tshibidilu utabalela mabeji aa: 52, 115, 137-9, 159, ne nshapita wa 17. Umvuija wewe muine didiumvua diebe dia dianyisha diondoke bua bulongolodi bua Yehowa. (Mat. 24:​45-47) Akula mêyi malengeji bua tshisumbu tshienu ne binudi nulonga mu bisangilu. (Mis. 84:10; 133:​1-3) Nebikale bimpe bua mulongi kubandilaye tusete tuonso tua Video tua Société, pa kutuadija ne ka: Les Témoins de Jéhovah — Un nom, une organisation. Neupete ngenyi ya pa mutu pa mushindu wa kutangija bantu ku bulongolodi mu Tshibumba tshia Nsentedi tshia mu Mfualanse tshia dia 1 Luabanya 1985, mabeji 22-6, ne mu dibeji disakidila dia Mudimu wetu wa Bukalenge wa Tshimungu 1993.

¹⁷ Kankamijayi balongi bua kufila bumanyishi kudi bakuabu: Patudi tulonga ne bantu, tshipatshila tshietu ntshia kubavuija bayidi bikala mua kufila bumanyishi bua Yehowa. (Yeshaya 43:​10-12) Abi bidi biumvuija ne: mulongeshi udi ne bua kukankamija mulongi bua kuakulaye ne bakuabu pa bidiye ulonga mu Bible. Tudi mua kuenza nanku mu mushindu mupepele pa kuebeja ne: “Mmunyi muwikala mua kumvuija dîku diebe bulelela ebu?” anyi: “mvese kayi iwakuata nayi mudimu bua kuleja mulunda webe bualu ebu?” leja mvese minene ya mu mukanda wa Dimanya idi ikankamija bua bumanyishi, bu mudi mu mabeji a 22, 93-5, 105-6, ne kabidi mu nshapita wa 18. Padibi biakanyine, kudi mushindu wa kupesha mulongi trakte kampanda yakutumikaye nayi mu difila bumanyishi bua mu mpukapuka. Mulomba bua abikile bena dîku diende bua kubuelabu mu dilonga. Udi ne balunda bende badi basue bua kulonga Bible anyi? Muambile bua kukulejaye aba badi basue.

¹⁸ Pa kubuela mu Kalasa ka mudimu wa teokrasi ne mu tshisangilu tshia mudimu, muyidi’eu wa matuku atshilualua neapete dishidimunyibua ne makankamija bia pa mutu biamuambuluisha bua kuluaye mumanyishi wa lumu luimpe. Bialejaye dijinga dia kudifundisha mu kalasa peshi dia kulua mumanyishi ukena mutambule, bidi bimpe kulonda mêyi-maludiki maleja mu mukanda wa Mudimu wetu, mabeji a 97-99. Bikalaye kayi ukumbaja ngikadilu milomba pa bidi bitangila nsombelu wende kampanda, udi mua kukebulula mu mikanda ya Société kansanga ngenyi mimpe idi yakula pa bualu abu ne pashishe kumulejayi. Tshilejilu, bidi mua kuenzeka ne: mulongi apete lutatu bua kulekelaye dikala ku bupika bua makanya peshi bintu bikuabu bia lulengu. Mukanda wa Comment raisonner udi ne tubingila tushindame tua mu Bible tudi tumvuija bua tshinyi bena nkristo badi ne bua kulekela bilele ebi bibi, ne udi uleja mu dibeji dia 118 ngenzelu muakane udiku mua kuambuluisha bakuabu bua kudiumusha ku bupika ebu. Enza disambila pamue nende pa bualu ebu ne mulongeshe bua kueyemenaye bikole kudi Nzambi bua kupeta diambuluisha.—Yak. 4:⁠8.

¹⁹ Njila wa kulonda bua kumanya né muntu udi ukumbaja ngikadilu milomba bua kuenzaye mudimu wa patoke mmuleja mu Tshibumba tshia Nsentedi tshia dia 15 Tshiongo 1996, dib. 16, tshik. 6. Padi mulongi ukumbaja malu malomba, bidi biakanyine kuenza nende maleja bua kumulongolola bua dituku diende dia kumpala dia mudimu. Mu mushindu muibaki, akula nende pa mmuenenu ne bipatshila bia pa tshibidilu bia bantu ba mu teritware wenu. Diambedi, banga nende buambi bua ku nzubu ne ku nzubu mu mishindu yonso, pashishe umulongeshe ku kakese ku kakese mu bitupa bikuabu bia mudimu. Pikala dileja diebe dîpi ne dipepele, nebikale bipepele bua yeye kukuidikija. Ikala muibaki ne mukankamiji, leja disanka mu buambi; nenku neajingulule tshidi lungenyi luebe ne nealuidikije. (Bienz. 18:25) Muyidi mupiamupia udi ne bua kuipatshila bua kulua mumanyishi wa pa tshibidilu ne wa lukunukunu wa lumu luimpe. Kakuyi mpata, udi mua kumuambuluisha bua kudienzela programe muimpe wa buambi. Bua kumuambuluisha mu difila diende dia bumanyishi, udi mua kumulomba bua kubalaye biena-bualu bia Tshibumba tshia Nsentedi tshia dia 15 Kasuabanga 1984, mabeji 15-25; tshia dia 15 Kashipu 1988, mab. 9-20; tshia dia 15 Tshiongo 1991, mab. 15-20 ne tshia dia 1 Tshiongo 1994, mab. 20-5.

²⁰ Kankamijayi balongi bua kudilambula kudi Nzambi ne kutambuishibua: Mulongi wa ngikadilu muakane udi ne bua kuyila bia bungi mu dilonga dia mukanda wa Dimanya bua kudilambula kudi Nzambi ne kukumbaja ngikadilu milomba bua batis­mo. (Tangila Bienzedi 8:​27-39; 16:​25-34.) Pa nanku, kumpala kua muntu kupetaye dijinga dia kudilambula kudi Nzambi, udi ne bua kuanji kudiundisha budilamiki buondoke kudi Yehowa. (Mus. wa 73:​25-28) Munkatshi mua dilonga, keba mishindu ya kukolesha dianyisha diende kudi Yehowa bua ngikadilu yende. Leja didiumvua diebe diondoke diudi nadi bua Nzambi. Ambuluisha mulongi bua kuela meji pa mushindu udiye mua kudiundisha malanda a pa nkayende ne a luya ne Yehowa. Biafikaye ku dimanya ne ku dinanga Nzambi, nenku neamusadile ne lulamatu, bualu budilamiki kudi Nzambi mbusuikakaja ku mushindu utudi tuangata bumuntu bua Yehowa.​—⁠1 Tim. 4:​7, 8; tangila Manuel pour ­l’École, dib. 75, tshik. 11.

²¹ Dienzejayi bua kulenga mutshima wa mulongi. (Mus. wa 119:11; Bienz. 16:14; Lomo 10:10) Bidi bikengela bua kumonaye mudi bulelela bumutangile pa nkayende ne kupangadija mushindu udiye mua kutumika ne bidiye mulonge. (Lomo 12:2) Utu witabuja bulelela budibu bamuleja ku lumingu ne ku lumingu anyi? (1 Tes. 2:13) Bua kumanya nanku, udi mua kumuela nkonko ya meji ya mmuenenu wa muntu pa nkayende, bu mudi: Udi wela meji kayi? Mmunyi muudi mua kutumikila bualu ebu mu nsombelu webe? Ku diambuluisha dia mumvuija ende, udi mua kujingulula bitupa bia nsombelu wende ûdi mua kumuambuluishila bikole bua kulenga mutshima wende. (Luka 8:15; tangila Manuel pour ­l’École, dib. 50, tshik. 11) Mumvuija a bimfuanyi bia mu mabeji a 172 ne 174 bia mu mukanda wa Dimanya adi akonka ne: “Ukadiku muenze diditshipa kudi Nzambi mu disambila anyi?” ne “Ntshinyi tshidi tshikukanda bua kutambuishibua?” Nkonko eyi idi mua kusaka mulongi ku dienza bualu.

²² Mushindu wa kuenza padi mumanyishi ujinga kutambuishibua mmuleja mu Tshibumba tshia Nsentedi tshia dia 15 Tshiongo 1996, dib. 17, tshik. 9. Mukanda wa Dimanya uvua mulongolola ne tshipatshila tshia kuambuluisha muntu bua kuandamuna ku “Nkonko bua badi bajinga kutambuishibua.” Nkonko eyi, ikala bakulu mua kukonkonona nende, idi mu bisakidila bia mukanda wa Mudimu wetu. Biwikala mushindamene pa mandamuna ku nkonko mifunda mu mukanda wa Dimanya, mulongi neikale mudiakaje bua mayukidilangana mashilashilangane ikalaye mua kuenza ne bakulu bua batis­mo.   

²³ Tuambuluishayi aba bakaadi bajikije dilonga diabu dia Bible: Tudi batekemene se: muntu udi ufika ku ndekelu kua dilonga dia mukanda wa Dimanya aleje patoke muoyo wende muimpe ne dijinga diende diondoke dia kusadila Nzambi. (Mat. 13:23) Ke bua tshinyi ka-tshiena-bualu kadi ku ndekelu kua mukand’eu kadi kela lukonko elu: “Newenze tshinyi?” Bikoso bia ndekelu bidi bikankamija mulongi bua kuela meji ku malanda ikalaye ne bua kudiundisha ne Nzambi, ku dikengedibua dia kutumikila dimanya didiye mupete ne ku mushinga wa kuangata dipangadika kakuyi dinengakana bua kuleja dinanga diende bua Yehowa. Ki mbilongolola bua tuetu kulonga mikuabu mikanda ne bantu bakaadi bajikije mukanda wa Dimanya nansha. Bikala mulongi kayi wenza malu mu diumvuangana ne dimanya dia Nzambi, mumvuije mu bimpe ne butoke tshidiye ne bua kuenza bua kudiundaye mu nyuma. Udi mua kuikala umutantshila misangu ne misangu, pa kumushila tshiibi tshiunzulula bua kuenza bidia biamufikisha ku muoyo wa kashidi.​—⁠Muambi 12:⁠13.

²⁴ Muyidi mupiamupia údí witaba bulelela ne utambuishibua udi ne bua kukola kabidi bikole mu dimanya ne mu lumvu kumpala kua yeye kuikala mushindame mu ditabuja. (Kol. 2:​6, 7) Kunyima kua bamane kujikija mukanda wa Dimanya, pamutu pa kutungunuka ne dilonga dia Bible dia ku nzubu, udi mua kudiakaja bua kumutuadila diambuluisha dia pa nkaya dikalaye nadi dijinga imue misangu bua kupeta buntu bukole bua mu nyuma. (Gal. 6:10; Eb. 6:1) Ku luende luseke, udi mua kukolesha lumvu luende mu dibala Bible dituku dionso, mu didilongela Tshibumba tshia Nsentedi ne mikanda mikuabu ya ‘mupika wa lulamatu,’ pa kudilongolola bua bisangilu ne pa kubuelamu, ne pa kuyukidilangana pa bulelela ne bena ditabuja nende. (Mat. 24:​45-47; Mus. 1:2; Bienz. 2:​41, 42; Kol. 1:​9, 10) Bua kuikalaye mulongolola bua kukumbaja tshishiki mudimu wende mu mushindu wa teokrasi, nebikale ne mushinga bua abale mukanda wa Mudimu wetu ne alonde mibelu yawu.​—2 Tim. 2:2; 4:⁠5.

²⁵ Tudiundishayi dimanya-kulongesha: Tudi bapete bukenji bua ‘kuenza bayidi, pa kubalongesha.’ (Mat. 28:​19, 20) Bu mudi dimanya-kulongesha dikala ne mushinga bua kuenza bayidi, tudi basue kudienzeja bua kulua balongeshi ba mpatshi. (1 Tim. 4:16; 2 Tim. 4:2) Bua mibelu mikuabu pa mushindu wa kudiundisha dimanya-kulongesha, neujinge imue misangu bua kubala: “comment cultiver l’art d’enseigner” (Mushindu wa kukolesha dimanya-kulongesha) ne “comment toucher le cœur de vos auditeurs” (Mushindu wa kulenga mitshima ya bateleji bebe) mu mukanda wa Manuel pour ­l’École, dilonga dia 10 ne dia 15; “Enseignant, enseignement” (Mulongeshi, dilongesha) mu mukanda wa Auxiliaire; ne biena-bualu bia Tshibumba tshia Nsentedi bidi bilonda ebi: “Dimanya kuibaka ne biamu mu diteta dia kapia” ne “Paudi ulongesha, lenga mutshima,” tshia dia 1 Kasuabanga 1984; “Udi mumanye bua kueleela meji bimpe pa mifundu anyi?” tshia dia 1 Luabanya 1986; ne “Badi bapeta disanka dia kuenza bayidi,” tshia dia 15 Luishi 1996.

²⁶ Bu munudi nuditatshisha bua kuenza bayidi ku diambuluisha dia mukanda wa Dimanya, tungunukayi ne kusambila Yehowa, Eu “udi udiundisha,” bua abeneshe madikolela anudi nuenza bua kulenga mitshima ku diambuluisha dia lumu luimpe lua Bukalenge. (1 Kol. 3:​5-7) Nudiku mua kupeta disanka ditudi tumona pa kulongesha bakuabu bua kujingulula dimanya didi difikisha ku muoyo wa kashidi, ne kujingulula mushinga wadi ne kuenza malu mu diumvuangana ne dimanya edi!