Mikoko ya Yehowa idi ikengela ditabalela diengeleki
‘Numanye bienu ne, Yehowa udi Nzambi! . . . tudi bantu bende ne mikoko ya mu mpata wende.’—MUSAMBU WA 100:3.
1. Mmunyi mudi Yehowa wangata basadidi bende?
YEHOWA udi Mulami Munene. Bituikala basadidi bende, udi utuangata bu mikoko yende ne utupetesha ditabalela diengeleki. Tatuetu wa mu diulu udi utusamba ne utupesha dikanda ne utulombola mu ‘njila ya buakane bualu bua dîna diende.’ (Musambu wa 23:1-4) Mulami Mulenga, Yezu Kristo, mmutunange bikole, ke bua tshinyi wakafika too ne ku difila anyima wende bualu buetu.—Yone 10:7-15.
2. Mmu nsombelu kayi mudi bantu ba Nzambi basanganyibua?
2 Bu mutudi bapetshi ba ditabalela diengeleki, tudi mua kuamba pamue ne mufundi wa misambu ne: ‘Nukuatshile Yehowa mudimu ne disanka. Nuiye kumpala kuende ne kuimba kua misambu. Numanye bienu ne, Yehowa udi Nzambi! Nyeye mene wakatufuka, tudi bantu bende; tudi bantu bende ne mikoko ya mu mpata wende.’ (Musambu wa 100:2, 3) Eyowa, tudi bena disanka ne bakubibue. Tudi amu bu bakubibue ku nyama mibi ya luonji munda mua tshikumbi tshidi ne bimana bia mabue makole.—Nomba 32:16; 1 Samuele 24:3; Sefanya 2:6.
Balami badisuile ba tshisumbu tshia mikoko
3. Mmunyi mudi bakulu bena nkristo batekibue bangata tshisumbu tshia mikoko ya Nzambi?
3 Kabiena bikemesha mutudi ne disanka pa kuikala bu mikoko ya Nzambi! Bakulu batekibue badi ba-ntunga-mulongo munkatshi muetu. Kabena basua ‘kudibandisha bu bakalenge,’ kudivuija bakokeshi ku mutu kuetu, anyi kuteta bua kuikala bamfumu ba ditabuja dietu. (Nomba 16:13; Matayo 20:25-28; 2 Kolinto 1:24; Ebelu 13:7) Pamutu pa nanku, mbalami bena dinanga badi batumikila mubelu wa mupostolo Petelo eu wa ne: ‘Nulame tshisumbu tshia mikoko ya Nzambi idi ku [ditabalela dienu, NW], nubalame, kanui benzejibue ku bukole, kadi ne mitshima ya disanka [ku budisuile, NW]; ki mbualu bua kukeba biuma, kadi nuikale ne mutshima mulongolola bimpe; kanuikadi bu bakokeshi ba badi kunyima kuenu, kadi nudivuije [bilejilu, NW] bimpe kudi mikoko.’ (1 Petelo 5:2, 3) Mupostolo Paulo wakambila bakulu nende ne: “Nudilame nuenu bine ne tshisumbu tshionso tshia mikoko, mudi spiritu munsantu munuteke batangidi munkatshi muatshi, bua kudiisha tshisumbu tshia Nzambi, tshiakasumbaye ku mashi a Muanende nkayende.” Ne mmunyipu mudi mikoko ne dianyisha mudi bantu aba batekibue kudi spiritu munsantu “bangata tshisumbu tshia mikoko ne diengeleka”!—Bienzedi 20:28-30, NW.
4. Mbua mushindu kayi wa malanda ne tshisumbu tshia mikoko uvua Charles T. Russell muende lumu?
4 Yezu wakapesha tshisumbu “bantu bu mapa,” bamue bu “ba-mpasata,” anyi balami, badi bangata tshisumbu tshia mikoko ya Yehowa mu mushindu muengeleki. (Efeso 4:8, 11; King James Version) Umue wa ku bantu aba uvua Charles T. Russell, mulombodi wa kumpala wa Société Watch Tower. Uvua ubikidibua ne: Mpasata Russell bua midimu yende ya dinanga ne ya dileja luse mu dilama tshisumbu tshia mikoko muinshi mua Mfumu Mulami, Yezu Kristo. Lelu’eu, bakulu bena nkristo badi batekibua kudi Kasumbu Kaludiki ka Bantemu ba Yehowa, ne ntema mmiteyibue bua kubenga kutumika ne miaku bu mudi “mpasata,” “mukulu,” anyi “mulongeshi” bu mianzu. (Matayo 23:8-12) Pabi, bakulu ba lelu’eu badi benza mudimu wa bu-mpasata, anyi wa bulami, bua diakalenga dia mikoko ya mu mpata wa Yehowa.
5. Bua tshinyi bapiabapia badi ne bua kukeba bua kumanya bakulu batekibue mu tshisumbu tshia bena nkristo?
5 Bu mudibu balami, bakulu badi ne mudimu wa mushinga mu dilubuluka dia mu nyuma dia bapiabapia. Ke bua tshinyi, mukanda mupiamupia wa Dimanya didi difikisha ku muoyo wa kashidi udi wamba mu dibeji dia 168 ne: “Keba mua kumanya bakulu batekibue mu tshisumbu. Badi ne dimonamona malu divule pa ditumika ne dimanya dia Nzambi, bualu mbakumbaje malu malomba bua batangidi maleja mu Bible. (1 Timote 3:1-7; Tito 1:5-9) Kuelakanyi bua kusemena kudi umue wa kudibu biwikala ukengela diambuluisha dia mu nyuma bua kutshimuna tshibidilu kampanda anyi ngikadilu kansanga udi kayi mu diumvuangana ne malu malomba kudi Nzambi. Neumone se: bakulu badi balonda mubelu wa Paulo eu: ‘Akulayi ne mêyi a busambi kudi anyima miletele, kankamijayi badi batekete, ikalayi ne muoyo-mule kudi buonso.’—1 Tesalonike 2:7, 8; 5:14, NW.”
Padi bapiabapia basua kuyisha
6. Nngenzelu kayi udi ulondibua padi mulongi kampanda wa Bible usua kulua mumanyishi wa Bukalenge?
6 Panyima pa mulongi kampanda wa Bible mumane kupeta dimanya ne mubuele mu bisangilu bua tshikondo kampanda, udi mua kusua kulua mumanyishi wa Bukalenge, muyishi wa lumu luimpe. (Mâko 13:10) Padibi nanku, Ntemu udi ulombola dilonga dia Bible ne muntu eu udi ne bua kumonangana ne mutangidi muludiki, walongolola bua se: umue wa ku bakulu ba mu Komité wa Mudimu wa Tshisumbu ne mukuabu mukulu bapetangane ne mulongi wa Bible eu ne mulongeshi wende. Diyukidilangana nedishindamene pa mukanda wa Badilongolole bua kuenza mudimu wetu bimpe, dibeji dia 98 ne dia 99. Pikala bakulu aba babidi bamone se: mupiamupia eu udi witabuja malongesha a nshindamenu a mu Bible ne mudiakaje ku mêyi-maludiki a Nzambi, nebamuambile ne: mmukumbaje malu malomba bua kudifila mu mudimu wa patoke.a Padiye wenza luapolo lua mudimu wende pa kufila luapolo lua mudimu wa budimi, nebalufunde pa Fishi wa Mumanyishi wa Tshisumbu muenza mu dîna diende. Mupiamupia eu udi mpindieu mua kuenza luapolo lua mudimu wende wa bumanyishi pamue ne miliyo ya bakuabu badi ne disanka dionso ‘bambila bantu dîyi dia Nzambi.’ (Bienzedi 13:5) Dimanyisha dia se: udi mumanyishi ukena muanji kutambula nedienjibue mu tshisumbu.
7, 8. Mmu mishindu kayi mudi mumanyishi kampanda udi kayi muanji kutambula mua kupeshibua diambuluisha didi dikengedibua mu mudimu?
7 Mumanyishi udi kayi muanji kutambula udi ukengela diambuluisha dia bakulu ne dia bena nkristo bakuabu bapie. Tshilejilu, dilubuluka diende mu nyuma didi ne bua kuikala diditatshisha bua mulombodi wa Dilonga dia Mukanda dia Tshisumbu mudiye ubuela. Mumanyishi eu mupiamupia udi mua kumona se: mbikole bua kuakula mu mushindu udi upatula bipeta mu mudimu wa ku nzubu ne ku nzubu. (Bienzedi 20:20) Nunku udi pamu’apa mua kusankidila diambuluisha, nangananga dia kudi eu udi mulombole nende malonga a Bible mu mukanda wa Dimanya. Diambuluisha dilelela dia mushindu’eu ndikumbanyine, bualu Yezu Kristo wakalongolola bayidi bende bua mudimu.—Mâko 6:7-13; Luka 10:1-22.
8 Bua mudimu wetu kupatulawu bipeta, didilongolola dimpe kumpala kua dîba didi ne mushinga. Nunku’eu, bamanyishi aba babidi badi ne bua kuanji kuidikija pamue maleja mafila mu nimero ya ku ngondo yonso ya Mudimu wetu wa Bukalenge. Padibu batuadija mudimu wabu wa budimi, eu údí ne dimonamona malu divule udi mua kuangata tshiibi tshimue anyi bibidi bia kumpala. Kunyima kua mêyi a ntuadijilu a bulunda, bamanyishi buonso babidi aba badi mua kuditua mu difila bumanyishi. Ditumika pamue mu mudimu bua mbingu mikese didi mua kufikisha ku makumbulula mimpe ne nansha ku dilonga dine dia Bible ku mbelu mu mukanda wa Dimanya didi difikisha ku muoyo wa kashidi. Mumanyishi údí ne dimonamona malu divule udi mua kulombola pamu’apa bua tshikondo kampanda dilonga edi ne pashishe kudipesha mumanyishi eu mupiamupia wa Bukalenge. Mmunyipu muikala bamanyishi buonso babidi mua kusanka pikala mulongi eu wa Bible muleje dianyisha bua dimanya dia Nzambi!
9. Mmalongolola kayi adi enjibua padi mumanyishi kampanda usua kutambula?
9 Padi mumanyishi udi kayi muanji kutambula wenda ulubuluka mu nyuma, udi mua kuditshipa kudi Nzambi mu disambila ne kusua bua kutambula. (Fuanyikija ne Mâko 1:9-11.) Udi ne bua kumanyisha dijinga diende dia batismo kudi mutangidi muludiki wa tshisumbu, walongolola bua se: bakulu bambulule pamue ne mumanyishi eu nkonko ya mu dibeji dia 175 too ne ku dia 218 mu Badilongolole bua kuenza mudimu wetu bimpe. Bitupa binayi mudi nkonko miabuludibue bidi mua kukonkononyibua misangu isatu kudi bakulu basatu bashilangane pikalaku mushindu. Padibu bitaba se: mumanyishi eu udi kayi muanji kutambula udi ne ngumvuilu mutshintshikila wa malongesha a Bible ne se: mmukumbaje malu malomba mu mishindu mikuabu, nebamuambile ne: udi mua kutambuishibua. Bu tshipeta tshia diditshipa diende ne batismo wende, udi ulua ‘mufunda tshimanyinu’ bua lupandu.—Yehezekele 9:4-6.
Dikumbaja makengedibua a pa buawu
10. Panyima pa dijikija dilonga diende dia mukanda wa Dimanya ne pa ditambula, mmunyi muikala muntu mua kuvudija dimanya diende dia Mifundu?
10 Panyima pa muntu kampanda mumane kujikija dilonga diende dia Bible mu mukanda wa Dimanya ne mutambuishibue, kabiena ne dikuatshisha bua kulombola dilonga kampanda dilongolola nende mu mukanda kansanga muibidi, bu mudi eu wa Bobumue mu tshitendelelu tshia Nzambi umue mulelela.b Bushuwa, muntu utshidi ufuma ku ditambula eu nealonge bivule padiye udilongolola bua bisangilu bia bena nkristo ne ubuelamu pa tshibidilu. Neapete kabidi dimanya dia pa mutu padi nyota yende bua bulelela imusaka bua kubala ne kulonga pa nkayende mikanda ya Buena-nkristo ne bua kuyukidilangana pa malu a mu Mifundu pamue ne bena kuitabuja nende. Kadi tuenze tshinyi padiku kujuka makengedibua a pa buawu?
11. (a) Mmunyi muvua Apolo muambuluishibue kudi Pisikila ne Akula? (b) Ndiambuluisha kayi didi mua kupeshibua nsonga mushindame utshidi ufuma ku ditambula udi wipatshila dibaka?
11 Nansha Apolo mene, uvua “mudiine ne kasuki mu Mifundu” ne mulongeshibue pa bidi bitangila Yezu mu bululame, wakababidila pavua bena nkristo bavua ne dimonamona malu divule Pisikila ne Akula “baye nende kuabu ne kumujinguluila mu mushindu mutambe kujalama njila wa Nzambi.” (Bienzedi 18:24-26, NW; fuanyikija ne Bienzedi 19:1-7.) Nunku’eu, anjibi kufuanyikija ne: nsonga mushindame kampanda utshidi ufuma ku ditambula udi wipatshila dibangila mukaji ne pashishe dibaka. Muena nkristo udi ne dimonamona malu divule udi mua kumuambuluisha bua kupeta mamanyisha pa biena-bualu ebi mu mikanda ya Watch Tower. Tshilejilu, malu adi ambuluisha mu mianda eyi adi asanganyibua mu mukanda wa Les jeunes s’interrogent—Réponses pratiques, Tshitupa 7.c Mumanyishi uvua mulonge nende Bible udi ne bua kuyukila pa malu aa ne mupiamupia eu, nansha mudi dilonga dia pa tshibidilu kadiyi dikengedibua.
12. Ndiambuluisha kayi didi mua kupeshibua bena dibaka batshidi bafuma ku ditambula badi ne ntatu?
12 Angata tshilejilu tshikuabu. Pamu’apa bena dibaka batshidi bafuma ku ditambula badi mua kuikala bapetangana ne ntatu mu ditumikila mêyi-maludiki a buena Nzambi. Badi mua kuebeja mukulu kampanda, udi mua kupitshisha bimue bikondo ku dilolo pa kuyukidilangana nabu pa Mifundu ne kuludika ntema yabu ku mamanyisha adi asanganyibua mu mikanda ya Watch Tower. Kadi, mukulu eu kakutuadija tshiakabidi dilonga dia Bible dia pa tshibidilu ne bena dibaka aba.
Padi mupiamupia kampanda wenza tshilema
13. Bua tshinyi bakulu ba tshisumbu badi ne bua kuleja luse kudi muntu utshidi ufuma ku ditambula udi muenze tshilema kadi muikale unyingalala?
13 Bakulu badi bidikija Mulami Munene, Yehowa, udi wamba ne: “Meme nkayanyi nendishe mikoko yanyi, . . . ngondape udi mutapike, nkankamike udi usama.” (Ezekiyele 34:15, 16, MMM; Efeso 5:1) Mu diumvuangana ne mmuenenu au, muyidi Yuda wakabela ne: baleja luse bua bena nkristo bela manyi bàvuà bela mpata anyi bavua bapone mu mpekatu. (Yuda 22, 23) Bu mutudi ne kabingila bua kutekemena bivule kudi bena nkristo badi ne dimonamona malu divule, bushuwa luse ludi ne bua kulejibua kudi muntu kampanda utshidi ufuma ku ditambula—utshidi anu muan’a mukoko—udi muenze tshilema kadi muikale unyingalala. (Luka 12:48; 15:1-7) Nunku’eu, bakulu bàdì ‘balumbuluisha mu dîna dia Yehowa,’ badi bapetesha mikoko ya mushindu’eu ditabalela diengeleki ne bayilulamija ne lutulu.—2 Kulondolola 19:6; Bienzedi 20:28, 29; Galatia 6:1.d
14. Ntshinyi tshidi ne bua kuenjibua padi mumanyishi kampanda utshidi ufuma ku ditambula wenza mpekatu munene, ne mmunyi mudiye mua kuambuluishibua?
14 Kadi, fuanyikija ne: mumanyishi kampanda utshidi ufuma ku ditambula uvua ku kale munuavi ne mulue kupona mu dinua dinekesha musangu umue anyi ibidi. Anyi pamu’apa ukavua mutshimune tshibidilu tshia musangu mule tshia dinua makanya kadi mulue kupona ku ditetshibua dia kunua makanya mu musokoko musangu umue anyi ibidi. Nansha bikala muanetu eu mupiamupia musambile bua dilekeledibua dia kudi Nzambi, udi ne bua kukeba diambuluisha dia mukulu kampanda bua se: mpekatu kalu tshibidilu. (Musambu wa 32:1-5; Yakobo 5:14, 15) Padiye umanyisha tshilema tshiende kudi umue wa ku bakulu, mukulu au udi ne bua kuteta bua kululamija mupiamupia eu mu mushindu udi uleja luse. (Musambu wa 130:3) Mibelu ya mu Mifundu idi mua kukumbana pamu’apa bua kumuambuluisha bua kulongoluela makasa ende njila milulame pashishe. (Ebelu 12:12, 13) Mukulu eu neayukidilangane pa bualu ebu ne mutangidi-muludiki wa tshisumbu bua kujadika dikuatshisha dia pa mutu dikala ne bua kufidibua.
15. Mu imue nsombelu, ntshinyi tshidi mua kukengedibua padi muntu kampanda utshidi ufuma ku ditambula wenza mpakatu?
15 Mu imue nsombelu kudi mua kukengedibua bipitshidile. Padiku dienda lumu dia bualu ebu, njiwu bua tshisumbu, anyi bilumbu bikuabu binene, kasumbu ka bakulu nekasungule bakulu babidi bua kukonkoloja bualu ebu. Pikala bakulu aba bamone se: bualu ebu mbutambe bunene ne bikengela komité mulumbuluishi, nebikale ne bua kubumanyisha kasumbu ka bakulu. Kasumbu ka bakulu nekashishe kuteka komité mulumbuluishi bua kuambuluisha muenji wa tshilema eu. Komité mulumbuluishi neikale ne bua kuyukila nende mu mushindu muengeleki. Badi ne bua kuenza madikolela bua kumululamija ne Mifundu. Biandamunaye bimpe ku madikolela mimpe a komité mulumbuluishi, apu badi mua kujadika bikalaku tshipeta kampanda pa kubenga kumupesha midimu ku tshiakuidi mu bisangilu bienza mu Nzubu wa Bukalenge anyi bikalabu mua kumuanyishila bua kufila mandamuna mu bisangilu.
16. Ntshinyi tshidi bakulu mua kuenza bua kuambuluisha muenji kampanda wa tshilema?
16 Pikala muenji wa tshilema eu muandamune bimpe, mukulu umue anyi babidi ba mu komité mulumbuluishi badi mua kulongolola bua kuenza makumbula a bulami ne tshipatshila tshia kukolesha ditabuja diende ne kuibaka dianyisha diende bua mêyi-makulu a buakane a Nzambi. Yonso wa kudibu udi mua kutumika nende mu mudimu wa budimi ku musangu ku musangu. Badi mua kuenza nende mayukidilangana makese pa Mifundu, pa kutumika pamu’apa ne biena-bualu biakanyine bia mu Tshibumba tshia Nsentedi ne Réveillez-vous! kadi kabayi benza nende dilonga dia Bible dia pa tshibidilu. Ne ditabalela diengeleki dia mushindu’eu, muenji wa tshilema eu udi mua kupeteshibua dikanda dia kukandamena matekete a mubidi mu matuku adi kumpala.
17. Mbiidia kayi bidi bienjibua padi muenji kampanda wa bubi ukadi mutambule kayi unyingalala ne kayi ulekela njila wende wa mpekatu?
17 Bushuwa, dikala mutambuishibue kutshidi matuku makese ki nkabingila bua ditungunuka kuenza mpekatu kakuyi dinyingalala. (Ebelu 10:26, 27; Yuda 4) Pikala muenji kampanda wa bubi ukadi mutambule kayi unyingalala ne kayi ulekela njila wende wa mpekatu, neikale ne bua kuipatshibua mu tshisumbu. (1 Kolinto 5:6, 11-13; 2 Tesalonike 2:11, 12; 2 Yone 9-11) Padibi bimueneka ne: tshienzedi tshia mushindu’eu tshidi tshikengedibua, kasumbu ka bakulu nekasungule komité mulumbuluishi. Padiku dipatshibua, dimanyisha dikese edi nedienjibue: “ . . . mmuipatshibue mu tshisumbu.”e
Bambuluishayi bua ‘baye diakamue kumpala batangile ku dikola’
18. Bua tshinyi tudi mua kujadika se: bena nkristo batshidi bafuma ku ditambula ne bakuabu nebikale misangu yonso ne bivule bia kulonga pa bidi bitangila Yehowa ne disua diende?
18 Tshitupa tshinene tshia basadidi ba Nzambi netshishale mu tshisumbu tshia mikoko. Kabidi, bidi bia diakalenga bualu yonso wa kutudi neakumbane bua kutamba kusemena pabuipi ne Tatuetu wa mu diulu bualu netuikale misangu yonso bakumbane bua kulonga bipitshidile pa bidi bimutangila yeye ne disua diende. (Muambi 3:11; Yakobo 4:8) Binunu bia bantu bakatambuishibuà mu dia Pentekoste wa mu 33 B.B. bavua bushuwa ne bua kulonga bipitshidile. (Bienzedi 2:5, 37-41; 4:4) Bivua bia muomumue ne bampangano, bàvuà kabayi ne dimanya dia Mifundu. Tshilejilu, ebi bivua bilelela bua aba bakatambuishibuà kunyima kua muyuki wa Paulo muenza pa Areopage mu Athènes. (Bienzedi 17:33, 34) Lelu’eu kabidi, batshidi bafuma ku ditambuishibua badi ne bua kulonga bipitshidile ne badi bakengela tshikondo ne diambuluisha bua kukolesha dipangadija diabu dia kutungunuka ne kuenza tshidi tshiakane ku mêsu kua Nzambi.—Galatia 6:9; 2 Tesalonike 3:13.
19. Mmunyi mudi aba badi batambula mua kupeta diambuluisha bua ‘kuya diakamue kumpala batangile ku dikola’?
19 Tshidimu tshionso binunu bia bantu badi batambula ne bakengela diambuluisha bua bamone mua ‘kuya diakamue kumpala batangile ku dikola.’ (Ebelu 6:1-3, NW) Ku mêyi, tshilejilu, ne diambuluisha dilelela mu mudimu, udi mua kuambuluisha bamue bua kuvuala bumuntu bupiabupia ne ‘kuenda mu bulelela.’ (3 Yone 4, MMM; Kolosai 3:9, 10) Biwikala mumanyishi kampanda udi ne dimonamona malu divule, bakulu badi mua kukulomba bua kuambuluisha muena kuitabuja nebe mupiamupia mu mudimu wa budimi anyi bua kuyukidilangana nende pa amue malu a mu Mifundu bua mbingu mikese bua kukolesha ditabuja diende kudi Nzambi, dianyisha diende bua bisangilu bia bena nkristo, ne bikuabu. Malanda pankatshi pa balami ne tshisumbu tshia mikoko adi bu aa a tatu kampanda ku mibelu ne a mamu kansanga ku bulenga. (1 Tesalonike 2:7, 8, 11) Kadi, bungi bukese bua bakulu ne basadidi ba midimu kabena mua kutabalela malu wonso adi akengedibua mu tshisumbu. Tuetu buonso tudi amu bu dîku kampanda mudi benamu bambuluishangana umue ne mukuabu. Yonso wa kutudi udi mua kuenza bualu kampanda bua kuambuluisha batendeledi netu. Wewe muine udi mua kuikala mukumbane mua kufila dikankamija, kusamba badi ne tunyinganyinga tukole, kuambuluisha badi batekete.—1 Tesalonike 5:14, 15.
20. Ntshinyi tshiudi mua kuenza bua kutangalaja dimanya dia Nzambi ne kupetesha ditabalela diengeleki bua mikoko ya mu mpata wa Yehowa?
20 Bukua-bantu budi bukengela dimanya dia Nzambi, ne bu muudi Ntemu wa Yehowa, udi mua kudifila ne disanka mu diditangalaja. Mikoko ya Yehowa idi ikengela ditabalela diengeleki, ne udi mua kuenza mudimu wa dinanga pa kuambuluisha bua kudipetesha. Yehowa abeneshe mudimu webe, ne akufute bua madikolela ebe menza ne mutshima mujima bua kuambuluisha mikoko ya mu mpata wende.
[Mêyi adi kuinshi]
a Apa, mupiamupia eu udi mua kupeta kopi wa mukanda wa Badilongolole bua kuenza mudimu wetu bimpe.
b Mupatula kudi Watchtower Bible and Tract Society of New York, Inc.
c Mupatula kudi Watchtower Bible and Tract Society of New York, Inc.
d Dilongolola dia mushindu’eu bua bamanyishi badi kabayi banji kutambula divua difunda mu tshiena-bualu tshia “Tuambuluishayi bantu netu bua batendelele Nzambi,” tshidi mu Tshibumba tshia Nsentedi tshia mu dia 15 Kasuabanga 1988, mabeji 15-20, (mu Mfualanse).
e Padi dipangadika dikala dia kuipata ne kuoku kuikala dilomba dia dilumbulula dikuabu, dimanyisha didi ne bua kuindila too ne pamanyika nkoselu. Tangila mabeji 147-148 a mukanda wa Badilongolole bua kuenza mudimu wetu bimpe.
Mmunyi muwandamuna?
◻ Mmunyi mudi Yehowa wangata mikoko yende?
◻ Ntshinyi tshidi tshienjibua padi bapiabapia basua kuyisha?
◻ Mmunyi mudi bena kuitabuja netu mua kuambuluisha bapiabapia badi ne makengedibua a pa buawu?
◻ Ndiambuluisha kayi didi bakulu mua kupetesha aba badi benza tshilema kadi bikale banyingalala?
◻ Mmunyi mûdi mua kuambuluisha muntu utshidi ufuma ku ditambula bua ‘kuya diakamue kumpala mutangile ku dikola’?
[Tshimfuanyi mu dibeji 16]
Charles T. Russell uvua muende lumu bu mulami wa dinanga wa tshisumbu tshia mikoko
[Tshimfuanyi mu dibeji 18]
Balami bena luse badi bangata tshisumbu tshia mikoko ya Nzambi ne diengeleka