“Enzayi Muenu Muonso”
1 Patuakadilambula kudi Yehowa, tuvua bamulaye bua kudifila muetu muonso kudiye. Ne kabingila konso, mupostolo Petelo wakakankamija bena nkristo bua kuenzabu muabu muonso bua kukolesha malanda abu ne Yehowa. (2 Pet. 1:10, NW) Bushuwa tudi tujinga kuenza muetu muonso bua kusankisha Yehowa pa kumusadila bituadijile ku mpindieu. Abi bidi biumvuija tshinyi? Padi malanda etu ne Yehowa atamba kuondoka ne tuelangana meji pa bionso bidiye mutuenzele, mutshima wetu udi utusaka misangu yonso bua kuenza muetu muonso mu mudimu wende. Tudi tujinga kulengeja mudimu wetu mu ngikadilu ne mu bungi buawu, padiku mushindu.—Mus. 34:8; 2 Tim. 2:15.
2 Muanetu kampanda nsongalume uvua musue kuenza bia bungi mu mudimu wakamona se: dilonga dia pa tshibidilu dia Dîyi dia Nzambi divua didiundisha dianyisha diende bua Yehowa ne divua dimupetesha lukunukunu lukole. Abi biakamusaka bua kuuja dilomba bua mudimu wa bumpanda-njila. Muanetu wa bakaji kampanda uvua ne lutatu lua kuakula ne bantu bavuaye kayi mumanye wakatumika ne amue maleja a mu mukanda wa Comment raisonner, ke biakamuambuluisha bua kupetaye pa lukasa bipeta bivule mu mudimu. Wakapeta mushindu wa kulonga Bible ne bena dibaka babidi bakitaba bulelela.
3 Sankayi bua binudi mua kuenza: Bamue ba kutudi badi basanganyibua mu nsombelu wa lutatu bua tusamasama, bua buluishi bua mu dîku, bua bupele anyi bua kalèngù ka bena mu teritware. Malu makuabu mavule, adi atamba kuenzeka mu matuku a ku nshikidilu, adi mua kupumbisha mudimu wetu. (Luka 21:34, note; 2 Tim. 3:1) Abi bidi biumvuija ne: katuena ne lulamatu ku mutshipu utuvua benzele Yehowa anyi? Tòo, bituenza muetu muonso mu mudimu wende.
4 Kabiena bia meji bua kuditua mushinga pa kudifuanyikija ne bidi bakuabu mua kuenza. Kadi, Mifundu idi ikankamija yonso wa kutudi bua ‘kukonkonona mudimu wende.’ Bituadifila menemene bilondeshile makokeshi etu tuetu bine, netuanyishibue kudi Yehowa ne netupeteleku disanka.—Gal. 6:4, NW; Kolos. 3:23, 24.
5 Tuanyishayi bua kutabalela mêyi a Petelo ne ‘kuenza muetu muonso bua se: ndekelu wa bionso, tusanganyibue kudiye katuyi katoba nansha tshilema, kadi mu ditalala.’ (2 Pet. 3:14, NW) Mmuenenu eu neatupeteshe nyanji ya dikubibua ne ya ditalala dia mu nyuma didi anu Yehowa nkayende mua kufila.—Mus. 4:8.