Tuditatshishayi Bushuwa Bua Disankidila Kayi Dionso
1 Mu katupa kîpi emu, mudimu wa pa buloba bujima wa bumanyishi bua Bukalenge neujike; pashishe, bantu ‘badi kabayi bamanye Nzambi’ nebabutudibue. (2 Tes. 1:7-9) Ke tshidi tshisaka bantu ba Yehowa, badi baditatshisha bushuwa bua muoyo wa bakuabu, bua kumanyisha mukenji wa Bukalenge kudi bantu ba bungi menemene.— Sef. 2:3.
2 Ngondo yonso, miliyo ya mêba mmipitshisha mu dikeba aba badi basue kuteleja “ngumu mimpe ya bualu butambe bulenga.” (Yesh. 52:7, NW) Patuakabaleja difila dia ngondo, ba bungi bakitaba bibejibeji bia Tshibumba tshia Nsentedi ne Réveillez-vous ! peshi broshire wa Ntshinyi tshidi Nzambi utulomba? Netuleje ne: tudi tuditatshisha bushuwa bua bantu aba pa kuikala ne mitalu bua kulondesha disankidila kayi dionso dileja.—Nsu. 3:27.
3 Tuangate note misunguluke: Netuenze mudimu mutambe bulenga bituangata note mikumbane ne misunguluke ya disankidila dileja ne ya bitudi bashile muntu. Mamanyisha bu mudi dîna dia muntu ne muaba udiye musombele, dituku ne dîba bia dikumbula dietu, mukanda mufila ne tshiena-bualu tshia diyuki nebituambuluishe bua kuenza mudimu udi upatula bipeta patuaya kumutangila. Tubambishe kabidi imue ngenyi ivua muntu mupatule mu diyukidilangana dia kumpala; neyituambuluishe bua kutuadija diyukidilangana mu dikumbulula.
4 Tualukile bua kutangila bantu pa lukasa: Mbantu bungi kayi ba ku bauvua mushile mikanda ngondo mushale baudi mutete bua kutangila tshiakabidi? Mbingu mmipite kuyi mubatangile kabidi anyi? Bituikala tuditatshisha bushuwa bua lupandu lua tshiendelele lua bantu aba, netualukile bua kubatangila diakamue padi mushindu umueneka, mbitambe buimpe mu matuku makese adi alonda, patshidi bantu ne diyuki dietu mu lungenyi luabu. Pa kulondesha lukasa disankidila tudi mua kupita kumpala kua Satana, utu ‘ulua ne unyenga dîyi divua dimiamina munda muabu.’—Mâko 4:15.
5 Didilongolola didi ne mushinga: Dipatula bipeta mu makumbulula ndisuikakaja buludiludi ku mushindu utudi tudilongolola. Tuele meji kumpala kua kuya pa mushindu utuatuadija diyukidilangana ne muntu. Dibeji dia ndekelu dia Mudimu wetu wa Bukalenge wa Lumungulu 1997 didi ne maleja mavule a bibejibeji ne broshire wa Utulomba atudi mua kutumika nawu ne diakalengele. Pashishe, tulame mu lungenyi imue ngenyi ituajinga kumanyisha mu dikumbulula. Tshitudi mua kuamba ntshinyi bua kuandamuna ku disankidila? Mmushindu kayi wa kutuadija dilonga dia Bible?
6 Bua kutungunuja diyukidilangana muuvua muleje tshidi tshikengela bua kukezula buloba ne kubuvuija muaba mutambe bulenga wa kusombela, udi mua kuamba ne:
◼ “Musangu mushale, tuvua bumvuangane pa bualu bua se: bua buloba kuluabu mparadizu wa ditalala, nebikengele kuangata mapangadika makole. Udiku wela meji se: bantu badi ne ngikadilu mikengedibue bua kuenza nanku anyi? [Lekela muntu andamune.] Tangila bua tshinyi bidi bikengela amu se: Nzambi abuele mu malu a bantu.” Bala Musambu 37:38, pashishe uye ku dilongesha 5 dia mu broshire wa Utulomba ne usungule biambilu mu bikoso 4-5 bidi bileja mushindu wakumbaja Nzambi mulayi eu. Jikija mu dilomba muntu dilonga nende Bible ku diambuluisha dia broshire.
7 Biwikala muakule bua Bukalenge ne mushiye broshire wa “Utulomba” mu dipita diebe dia kumpala, newikale mua kualukila kutangila muntu ne kumuambila mêyi bu aa:
◼ “Mu diyuki dietu dia musangu mushale, tuvua bamone se: Bukalenge bua Nzambi mmbulamatadi mulelela wakokesha buloba bujima. Bible udi uleja ne: Yezu Kristo neikale mfumu wabu. Udiku ne lungenyi pa malu malenga atuala mbulamatadi eu ne mfumu wa mushindu’eu anyi?” Lekela muntu andamune. Bulula broshire wa Utulomba pa dilongesha 6. Ku diambuluisha dia bimue biambilu bisungula mu bikoso 6-7 ne tshimfuanyi tshia mu dibeji dia 13, leja tshienza Bukalenge bua Nzambi bua bukua-bantu. Bala Danyele 2:44 ne, bikalabi bimueneka biakanyine, leja mukanda wa Dimanya ne ebeja muntu bua dilonga dia Bible.
8 Bikala muntu uudi mupetangane nende wanyisha ne: bitendelelu bia mu bulongolodi ebu bidi mpokolo wa ntatu ya bukua-bantu, muebejebi tshilejilu mushindu eu mu dikumbulula:
◼ “Kutuku muanji kudiebeja mushindu wa kumanya tshitendelelu tshidi Nzambi muanyishe anyi? [Lekela muntu andamune.] Mu broshire eu wa Ntshinyi tshidi Nzambi utulomba?, mudi bimanyinu bidi biambuluisha bua kusunguluja tshitendelelu tshilelela.” Uye ku dilongesha dia 13 ne uzangike malu manene atanu mafunda mu miaku misendamija mu bikoso 3-7. Pashishe udi mua kutungunuka nunku: “Kupeta tshitendelelu tshilelela kudi ne mushinga kadi bidi bitukengela kabidi kukeba mua kumanya tshidi Nzambi ulomba yonso wa kutudi.” Bala Yone 4:23, 24. Mulombe bua kuyukidilangenapu mutantshi. Angata dilonga 1 dia mu broshire ne leja mushindu utu dilonga dia Bible dienzeka.
9 Bua kutungunuja diyukidilangana pa diakalenga mu dîku, udi mua kutumika ne malu adi alonda aa:
◼ “Musangu wa kumpala utuvua bamonangane, mvua mukumvuije ne: nsapi wa disanka mu dîku nditumikila mibelu ya mu Dîyi dia Nzambi, Bible. Ku diebe dimona, Bible udiku mua kuandamuna ku majinga a dîku dia buena-lelu anyi peshi kêna kabidi muakanyine tshikondo tshietu etshi?” Lekela muntu andamune. Leja mukanda wa Dimanya. Bulula pa nshapita 2 ne bala mêyi matela a mu tshikoso 13. Lomba muntu bua dilonga dia Bible dia mu dîku pa kutumika ne mêyi mamba mu tshikoso 3.
10 Pa kuangata note misunguluke, kudilongolola mudibi bikengedibua ne kualukila pa lukasa bua kutangila bantu bua kudiundisha dijinga diabu dia kumanya, netuleje dinanga dia muntu netu, dinanga diabakoka mu njila wa lupandu.—Mat. 22:39; Gal. 6:10.