Bua Tshinyi Mbiakane Kutungunuka?
1 Pamu’apa ukadiku mudiele lukonko elu, tshilejilu mu didilongolola bua kupitshisha dituku mu buambi. Mu bimue bitupa bia buloba, teritware wetu mmutumika-tumika misangu ne misangu, ne bidi mua kuenzeka ne: bantu batumanye ne bikale ne muoyo wa kutuipata. Anu bakese ke badi bakidila mukenji wetu biakane. Pabi kudi tubingila tuvule tuakane tua kutungunukila.
2 Tshia kumpala, tudi ne bua kutungunuka ne kuyisha mukenji wa Bukalenge too ne palua nshikidilu. (Mat. 24:14; 28:19, 20) Muprofete Yeshaya wakebeja Nzambi bua kumanya too ne tshikondo kayi tshivuaye ne bua kutungunuka ne mudimu wa buambi. Diandamuna, dileja mu Yeshaya 6:11, nditoke. Yehowa wakamuambila bua kutungunuka ne kumanyisha mukenji wa Nzambi kudi bantu. Mbia muomumue lelu’eu. Yehowa mmutekemene bua tutungunuke ne kukumbula bantu ba mu teritware wetu, nansha bikalabu bafuane kutuipata. (Yeh. 3:10, 11) Ebu mbujitu bua tshijila butuambika.—1 Kol. 9:17.
3 Tshiibidi, ditungunuka ne kuyisha didi buetu tuetu mushindu wa kuleja buondoke bua bulamate buetu kudi Yehowa. (1 Yone 5:3) Kupita apu, patudi tuela meji ku matuku atshilualua akena kule adi malamina bukua-bantu, mmunyi mutudi mua kudikanda bua kuteta kudimuija bantu, muinetu, mu dinanga? (2 Tim. 4:2; Yak. 2:8) Bituakumbaja ne lulamatu mudimu mutupa bua kubenzela, netubavudijile mpunga bua kuitababu mukenji wa lupandu wa Nzambi, ne kabadiakuamba se: kabavua badimuija.—Yeh. 5:13.
4 Kabidi, katuena bamanye; mutshima wa bamue udi mua kukudimuka. Pamu’apa bua dishintuluka dia nsombelu, bualu bukole buenzeke mu dîku peshi nsombelu ya mu bulongolodi ebu bidi bibeleshisha meji bikole pa nsombelu wabu wa matuku adi kumpala. Peshi kabidi, dimue dituku ku tshiibi tshiabu, netubambile bualu budi mua kujula ngandamuinu muimpe. (Muam. 9:11; 1 Kol. 7:31) Kudi kabidi dimuangala. Tudi mua kupetangana ne bantu batshidi babuelelaku mu teritware wetu badi mua kuandamuna biakane ku lumu luimpe, peshi bansonga bakadi baye ku yabu miaba ne badi badiela nkonko pa tshipatshila tshia muoyo wabu.
5 Netutungunuke anyi? Kabiyi mpata! Mifundu idi itupesha tubingila tuakane bua kuya kutangila ne kutangilula bantu. Ku ndekelu kua bionso, pajika mudimu wa buambi, Yehowa neatubeneshe bualu tudi benze madikolela matungunuke mu mudimu ne neabeneshe bena dianyisha bikale bitabe lumu luimpe lua Bukalenge.—1 Tim. 4:16.