Tungunukayi ne kuyisha!
1 Nzambi mmusue ne: “bantu ba mishindu yonso basungidibue ne bafike ku dimanya dijalame dia bulelela.” (1 Tim. 2:4, NW) Bua bualu ebu, mmutupeshe mudimu wa kuyisha lumu luimpe. (Mat. 24:14) Tuetu bumvue bimpe tshitudi ne bua kutungunukila ne kuyisha, bualu nansha bumue kabuakutushiya mu ditanaji peshi kututekesha mu maboko to.
2 Bua tshinyi tudi ne bua kusuminyina? Kudi malu a bungi panu adi ashiya bantu mu ditanaji, abafikisha ku dipua malu atudi tubambila muoyo peshi ku dialengulula mene. Nunku tudi ne bua kutungunuka ne kubavuluija mukenji wa lupandu wa Nzambi. (Mat. 24:38, 39) Malu atu kabidi misangu yonso ashintuluka mu nsombelu wa bantu. Nansha malu mine a panu adi mua kukudimuka onso anu mu mupodi wa dîsu. (1 Kol. 7:31) Dituku didi dilonda, nansha lumingu ludi lulonda peshi ngondo udi kumpala, bantu batudi tuyisha badi mua kupeta ntatu anyi malu adi mua kubafikisha ku dianyisha lumu luimpe lutudi tubatuadila. Kuenaku ne dianyisha bua muvua Ntemu uvua mukumanyishe bulelela ukuyisha ne tshisumi anyi?
3 Bua kuidikija luse lua Nzambi: Yehowa mmulekele ne lutulu luonso bua tshikondo tshianji tshipite bangabanga ne kubutulaye bantu babi. Udi utungunuka ne kubikila bantu ku butuangaji buetu bua badi ne mitshima miakanyine baye kudiye bapete lupandu. (2 Pet. 3:9) Netupie tshibawu tshia mashi bituabenga kumanyisha bantu mukenji udi uleja luse lua Nzambi ne kubadimuija bua kabutu ka kudi Nzambi kakuata bantu bonso badi kabayi balekela njila yabu mibi. (Yeh. 33:1-11) Nansha bantu buobu kabayi bitaba malu atudi tubayisha misangu yonso, tuetu tutungunuka ne kuenze muetu muonso bua kuambuluisha bantu ba muoyo muimpe bua bikale ne dianyisha bua luse luvule lua Nzambi.—Bien. 20:26, 27; Lomo 12:11.
4 Bua kuleja dinanga ditudi nadi: Yehowa Nzambi ke udi mutume dîyi (ku butuangaji bua Yezu Kristo) bua bayishe lumu luimpe pa buloba bujima. (Mat. 28:19, 20) Nansha padi bantu babenga kuteleja, kudi mushindu wa kuleja dinanga dietu ne lulamatu kudi Nzambi pa kusuminyina ne kuenza tshidi tshiakane.—1 Yone 5:3.
5 Tuikalayi badisuike bua kutungunuka anu ne kuyisha. Tuenzayi nunku ne lukunukunu bu mututshidi mu ‘dituku dia lupandu’ dia Yehowa.—2 Kol. 6:2.