“Bidimu tshinunu bipiabipia—Mmalu kayi adi matuindile kumpala eku?”
1 Bantu badi badiela lukonko elu pa buloba bujima. Nansha mudi bantu benze malu a bungi mu bidimu nkama ne nkama, mbibatekeshe mu maboko bualu malu adi atatshisha bantu kukadi mpindieu bidimu binunu ne binunu atshidi amu kuoku. (Yobo 14:1; Mus. 90:10) Nkuepi kudi bantu mua kupetela disulakana?
2 Mu ngondo wa dikumi ne wa dikumi ne umue, netupete mushindu wa pa buawu wa kuandamuna bantu lukonko alu. Mushindu kayi? Mpatuabanya Ngumu ya Bukalenge No. 36. Trakte eu udi ne tshiena-bualu etshi: “Bidimu tshinunu bipiabipia—Mmalu kayi adi matuindile kumpala eku?” Mu tshitupa tshia kumpala tshia ngondo wa dikumi, netufile tshibejibeji tshia Tshibumba tshia Nsentedi ne tshia Réveillez-vous! Pashishe kubangila mu Dimue dia 16 ngondo wa dikumi too ne mu Ditanu dia matuku 17 ngondo wa dikumi ne umue, netuabanye Ngumu ya Bukalenge No. 36. Mu kampanye aka, mudimu wetu munene newikale wa diabanya Ngumu ya Bukalenge No. 36 mu matuku a munkatshi mua lumingu. Kadi bua ku ndekelu kua lumingu, netuyabanye pamue ne bibejibeji.
3 Neuyabanyine pebe bantu ba bungi anyi? Bakulu, basadidi ba mudimu ne bampanda-njila ke badi ne bua kuleja ka-bukulumpe mu diabanya dia trakte eyi, bualu buobu ke badi ne tshia kufila tshilejilu tshidi bakuabu mua kulonda. Bamanyishi ba bungi mbadilongolole bua kuenza bumpanda-njila buambuluishi mu ngondo umue peshi yonso ibidi itudi balongolole bua kuabanya trakte eyi. Bakuabu mbapangadije bua kuenza mêba a bungi mu buambi kupitshisha pa atubu benza pa tshibidilu.
4 Balombodi ba Dilonga dia Mukanda dia Tshisumbu badi mua kukankamija muntu yonso mu tusumbu tuabu bua kuabanyabu bikole Ngumu ya Bukalenge No. 36. Kudi mua kuikala bamue bamanyishi bakadi balekele mudimu wa buambi. Bakulu badi mua kuya kubatangila bua kumona mua kubambuluisha. Pamu’apa badi mua kusungula mumanyishi mupiluke mu ngondo ibidi eyi bua apatuke mu buambi ne muanetu yonso ukadi katshiyi uyisha. Difila Ngumu ya Bukalenge No. 36 mu mushindu mupepele edi didi mua kuambuluisha bamanyishi aba bua kutuadijilulabu mudimu wa buambi.
5 Tshikondo etshi tshidi kabidi tshimpe bua balongi ba Bible bakadi pa kujikija mukanda wa Dimanya ne bakadi bamane kukumbaja malu malomba bua kulua bamanyishi badi kabayi banji kutambula kutuadijabu pabu kuyisha. Nansha bana pabu badi mua kufila trakte eyi.
6 Mêyi ebe adi ne tshia bua kuikala mapepele. Nanku udi mua kuamba ne:
▪ “Lelu ndi mupangadije bua kumanyisha dîku ne dîku dionso mu [tela musoko wetu eu peshi mu kartié ketu aka] mukenji wa mushinga mukole eu. Diebe dibeji ndiodi edi. Ndi nkulomba bua ushale kubala malu adimu.” Ki mbimpe kuikala ne bibuta bienu bia mudimu wa buambi panudi nuabanyina bantu Ngumu ya bukalenge No. 36 to.
7 Nulongolole bisangilu bia mudimu wa buambi bimpe: Bakulu badi ne bua kulongolola bimpe malu onso adi atangila bisangilu bia mudimu wa buambi. Mutangidi wa mudimu alongolola bua kuikale teritware ya bungi ya kuenzela buambi bua ku nzubu ne ku nzubu ne mikuabu ya miaba idi bangenda-mushinga bua muntu yonso apete mushindu wa kuabanya trakte eyi bikole. Padiku mushindu, nudi mua kulongolola bisangilu bia mudimu wa buambi dituku dionso mu dinda anyi ku dilolo. Nudi mua kulongolola bikuabu bisangilu mu mapingaja bua kuambuluisha balongi batu baya mu tulasa mu dinda, ne nansha bua bena mudimu anyi bua bantu bakuabu.
8 Tshitudi ne bua kuenza padi bantu kabayi kumbelu: Tshipatshila tshietu ntshia kuyikila ne bantu ba bungi. Paudi kuyi usangana muntu kumbelu, funda adrese wa muaba au ne utete kupitshilapu tshiakabidi dîba dikuabu dituku dimue dimue adi ku nzubu kuende. Pikalabi biye too ne ku lumingu lua ndekelu lua kampanye aku kuyi mufike ku dipetangana ne bena ku nzubu au, udi mua kubashila dibeji dia Ngumu ya Bukalenge No. 36 muaba udi bapitshi ba njila kabayi mua kudimona bifuana badibafula. Bua ku misoko ne miaba idi teritware muikale mutambe bunene, bakulu badi mua kuambila bamanyishi bua kushiyabu diakamue trakte eyi ku nzubu kudibu kabayi basangana bantu.
9 Tuyabanyayi bikole menemene! Bisumbu bidi ne bua kudienzeja bua kujikija teritware yabi kumpala kua kampanye aka kujikaku mu dia matuku 17 ngondo wa dikumi ne umue. Bikala teritware wenu mupite bunene, bamue bamanyishi badi mua kupatuka nkayabu miaba idi miakanyine ne idibu kabayi mua kubenzela bibi. Ngenzelu eu neatuambuluishe bua kuyukila ne bantu ba bungi badi banyisha mukenji wetu. Kupu muoyo bua kufunda mêna a bantu badi banyisha bua kubapingena.
10 Bakulu badi ne bua kudianjila kulongolola ne kulombesha bibejibeji bikuabu bikalabu nabi dijinga mu tshisumbu. Bua Ngumu ya Bukalenge No. 36, kanuditatshishi bua kuyilomba to bualu Société nkayende neatumine tshisumbu tshionso yatshi trakte. Bampanda-njila ba pa buabu, ba pa tshibidilu ne bambuluishi nebapete pa muntu yonso trakte 200. Mumanyishi yonso yeye neapete trakte 50. Nunku, udiku mudilongolole ne mushale muindile ne muoyo kulukulu bua kuenza kuenzelamu mudimu wa pa buawu eu anyi? Ndiakalenga kayipu edi ditudi nadi dia kumanyisha binetu malu adi Nzambi mulaye bantu matuku makese kumpala eku!