Mudimu munene wenzeka mu dia 16 ngondo wa 10 too ne mu dia 12 ngondo wa 11

¹ Mu ngondo wa dikumi pa buloba bujima netuabanye trakte wa Ngumu ya Bukalenge No. 37 udi ne tshiena-bualu ne: “Bitendelelu bia dishima bikadi pa kufua!” Mu mbingu ibidi ya kumpala ya ngondo wa 10, netufile Tshibumba tshia Nsentedi ne Réveillez-vous! Kutuadijila mu Dimue dia matuku 16 a ngondo wa 10 too ne mu Dia lumingu dia matuku 12 a ngondo wa 11 netuabanye trakte wa Ngumu ya Bukalenge No. 37. Mu matuku a Disambombo ne a Dia lumingu atuikala munkatshi mua mudimu wa difila trakte eu, netufile kabidi bibejibeji bikalaku.

² Nnganyi wenza mudimu eu?: Bambi ba lumu luimpe bonso badi ne bua kuditua mu mudimu eu ne muoyo mujima. Bamue badi mua kulua nansha bampanda-njila bambuluishi. Udi ne bana anyi balongi ba Bible badi baya kumpala bimpe anyi? Bambuluisha bua bayukile ne bakulu bua kumonabu ni badi bakumbaja malu malomba bua kuluabu bamanyishi badi kabayi banji kutambula. Bakulu badi ne bua kuyukila ne bana betu bakadi kabatshiyi bayisha ne kubakankamija bua kudituabu mu mudimu eu, pamuapa kulongolola bua bayishaku ne bantu bakadi benzenzaku mudimu wa diyisha bikole.

³ Nebatumine tshisumbu tshionso trakte ya Ngumu ya Bukalenge No. 37 bungi bukumbane bua mumanyishi ne mpanda-njila yonso kupetaye yende 50. Nebapeshe balongi ba Bible badi kabayi banji kutuadija kuyisha trakte itanu pa muntu bua kuyipeshabu balela ne balunda babu. Ku ndekelu kua ngondo wa 10 ne wa 11, bana betu bonso nebafunde bungi bua trakte ikalabu babanye mu tshibadi tshikuabu tshia tubeji tua luapolo lua mudimu wa ngondo ibidi ayi. Sekretere neasangishe bungi bua trakte yonso ya Ngumu ya Bukalenge mifila kudi bantu bua kubutumina Biro bietu ku ndekelu kua ngondo yonso. Nuenu bashale ne imue trakte ya Ngumu ya Bukalenge panyima pa mudimu wa diyabanya eu, nudi mua kuyifila mu buambi mu mishindu yonso inuikala basue.

⁴ Tshitudi mua kuamba: Umvuija bantu malu mu mêyi makese ne ubashile trakte, nunku neuyabanye ya bungi menemene. Tshilejilu, udi mua kuamba nansha ne: “Bua kumona mua kuambuluishaku bantu netu, tudi tuenda tuabanya trakte eyi idibu babanyina bantu ba buloba bujima lelu eu. Webe trakte nyeye eu. Shala umubalaku.” Patudi tuya mu diabanya dia Ngumu ya Bukalenge eyi, mbimpe tuetu kushiya bibuta bietu bia buambi ku mbelu. Kupu muoyo bua kufundaku malu adi atangila bantu bonso bikala bitabe bua nuenu kuyukila nabu.

⁵ Mua kujikija teritware wenu yonso kong: Pamutu pa kujikijila Ngumu ya Bukalenge yonso ne diyabanya mu njila, tutambe kuyifila anu ku nzubu ne ku nzubu ne mu miaba ya midimu anyi idi bantu bapanyishila bintu. Funda bua wavuluka nzubu ya bantu baudi kuyi musanganaku, pashishe uditatshishe bua kubapinganyina dîba dikuabu anyi dituku dikuabu mu lumingu alu. Kutuadijila mu Dimue dia 6 a ngondo wa 11 nenushile bantu banuvua kanuyi basangane kumbelu yabu trakte. Kadi pikala teritware wa tshisumbu tshienu mupite bunene, kanuyi mua kumujikija mu matuku adibu bakose aa, bakulu badi mua kuitaba bua bamanyishi kushilabu bantu bikalabu kabayi basangane ku nzubu yabu Ngumu ya Bukalenge penzabu mudimu eu.

⁶ Kabutu ka “Babulona Munene” kadi kenda kalua pabuipi ne lukasa. Bantu badi ne bua kupatukamu ne lukasa kumpala kua kumubutulabu butubutu. (Buak. 14:8; 18:8) Dianjila kudilongolola ku mpindieu bua ulua kuenza mudimu wa buloba bujima eu ne muoyo mujima bua kumanyisha bantu ne: kabutu ka bitendelelu bia dishima kakadi pabuipi!