Mukanda wa kudi Biro

Bamanyishi ba Bukalenge basuibue,

Tudi basue kunumanyisha amue malu adi atangila dibaka dia nzubu isatu mipiamipia ku Betele wetu udi ku Tshinsansa. Patudi tuakula apa, bakadi bajikije kuyibaka, bayitute malata ne midimu mikuabu ya munda mua nzubu idi iya kumpala bimpe. Tudi kabidi basue kunumanyisha ne: mu ngondo muisambombo wa tshidimu etshi, bakatuadija kuasa nzubu wa tshikuku ne wa muaba wikala bana betu badi ku betele badila. Nzubu wa kudila eu neikale ne miaba ya bantu 450. Midimu yonso ya dibaka badi bayenza kudi kumpanyi mukuabu wa mu ditunga dietu edi. Tshibambalu tshietu tshidi tshitangila malu a dibaka tshia ku Betele tshidi tshiotshi tshilondesha midimu eyi bua kumpanyi eu ayenze bimpe. Patudi tumona mushindu udi mudimu eu wenda wenzeka bilenga mutangile ku ndekelu, bidi bituleja ne: Yehowa udi ukuatshisha mudimu wa didiundisha dia nzubu wende eu.

Tudi basue kabidi kunuela tuasakidila wa bungi bua mushindu unuvua baleje dinanga pa kuambuluisha bana betu binunu ne binunu bavua mvita mishiye mu lutatu lua bungi.​—Yone 13:35.

Mu 2006, tuvua batume bilamba bua kuambuluisha bana betu ba mu bisumbu 845 bavua mvita mitambe kukengesha. Kasumbu Kaludiki ke kavua kitabe bua tuetu kuenza bualu ebu, ne bana betu ba ku mputu bavua batutumine tone ya bilamba ne ya bisabata mitue ku 21. Mu 2003 ne mu 2004 tuvua kabidi bambuluishe mushindu eu bana betu ba mu bisumbu bia miaba mishilangane ya mu teritware wetu.

Tudi tunulomba bua kutungunuka ne kulombela bana betu badi malu aa makuate Nzambi, kulombela kabidi bawetu bonso badi bafila bintu ebi bia dikuatshishangana nabi.​—2 Kol. 1:11.

Bana benu,

Biro bia filiale wa Congo