Eu ke mudimu mutambe buimpe buebe wewe anyi?
BIWIKALE muena Kristo mutambule, tshidi tshikusaka bua kuenza disua dia Nzambi ndinanga diudi nadi kudiye. Kabidi, udi ne tshia bua kuikala mudifile bikole mu mudimu wa diyisha. Yezu Kristo mene wakapesha bayidi bende bonso mudimu wa kuvuija bantu bayidi. (Matayo 28:19, 20) Bumue udi mua kuikala wenza mudimu kampanda wa bianza bua kupeta tshia kudiambuluisha natshi. Kadi bu muudi muyidi wa Yezu ne Ntemu wa Yehowa, tshia kumpalampala udi muena mudimu muena Kristo, muntu udi uteka mudimu wa diyisha Bukalenge pa muaba wa kumpala.—Matayo 24:14.
Pamu’apa mpindieu udi ne bidimu dikumi ne bia mu njila anyi makumi abidi. Mikuabu misangu ukadi mua kuikala muele meji a bungi bua tshiwenza mu matuku ebe a muoyo. Paudi uteta kukonkonona midimu iudi mua kuenza, pamu’apa mudimu udi mua kukupetesha disanka ke uwangata ne mushinga.
Tshilejilu, konkonona mêyi avua Jørgen (wa mu Denmark) muambe bua mudimu uvuaye musungule. Jørgen udi ubikila mudimu uvuaye musungule au ne: “njila mulenga udi mua kuambuluisha muntu bua kudifila mu mudimu wa mushinga mupite bungi.” Eva (mamu wa mu ditunga dia Grèce wa bidimu 31) udi yeye wamba ne: “Pantu mfuanyikija nsombelu wanyi ne wa bena mulongo nanyi, misangu yonso ntu mfika ku diamba ne: wanyi nsombelu udi ne mushinga wa bungi, wa disanka ne mukumbane tshishiki.” Mmudimu kayi udi ufila disanka dia mushindu’eu? Mmunyi muudi mua kuenza pebe mudimu wa mushindu’eu?
Nzambi utuku ukuleja tshia kuenza anyi?
Kusungula mudimu kudi mua kuikala bualu bukole. Bamue badi mua kujinga bua Nzambi abasungulujile mudimu udiye yeye musue bua buobu kuenza.
Dîba divua Mose mu Midiyana, Yehowa wakamuambila bua kupingana mu Ejipitu ne kupatula bena Isalele mu bupika. (Ekesode 3:1-10) Muanjelu wa Nzambi wakamuenekela Gideona (muntu uvua Nzambi musungule bua kupikula Isalele ku dikenga). (Balumbuluishi 6:11-14) Davidi uvua udiisha mikoko dîba divua Nzambi muambile Samuele bua kumuela manyi bu mukalenge mupiamupia. (1 Samuele 16:1-13) Bua lelu, Nzambi kêna utulombola mushindu’eu nansha. Tuetu nkayetu ke badi ne bua kukonkonona malu, ne pashishe kuangata dipangadika bua tshituenza ne bipedi bidi Nzambi mutupeshe.
Yehowa mmunzuluile bansonga bena Kristo “tshibi tshinene tshia kuenza mudimu.” (1 Kolinto 16:9) Mmushindu kayi? Mu bidimu dikumi bishale ebi, bungi bua bamanyishi ba Bukalenge mbumbuke ku bantu bapite pa 2 125 000 bufike ku bantu bapite pa 6 000 000 pa buloba bujima. Mbanganyi badi benza mudimu wa kupatula Bible, broshire, trakte ne bibejibeji miliyo ne miliyo bidi bikengedibua bua majinga abu a mu nyuma ne bibambuluisha mu mudimu wa diyisha lumu luimpe pa buloba bujima? Mudimu eu muimpe badi bawenza pa buloba bujima kudi bena mu dîku dia Betele.
Nsombelu wa disanka
Betele ndîna didi diumvuija ne: “Nzubu wa Nzambi,” ne nzubu ya Betele mmiaba idibu basombele kudi bena Kristo bena budisuile badi bambuluisha ku tshilombuelu tshia midimu ya Bantemu ne ku biro bidi mikuabu miaba. (Genese 28:19, NW, diumvuija kuinshi kua dibeji) Tudi mua kufuanyikija mêku a Betele adiku lelu ne ‘nzubu muibaka ne meji’ udibu balongolole bimpe menemene, ne benamu bikale banange Yehowa.—Nsumuinu 24:3.
Ntshinyi tshitudi mua kuamba bua nsombelu utu ku Betele udi bu utu nende bena mu dîku? Muanetu mukuabu (wa bidimu 25) udi mu dîku dia Betele (mu ditunga dia Estonie) udi wamba ne: “Ndi ngumvua disanka bualu ndi mumanye ne: dîba dionso ndi munkatshi mua balunda ba Yehowa. Ebu ke bualu bundi ngangata ne mushinga wa bungi menemene ku Betele.”—Musambu 15:1, 2.
Lelu pa buloba bantu batue ku 19 500 badi ku Betele. (Musambu 110:3) Mu ditunga dia États-Unis, bantu 46 pa 100 badi ku Betele badi ne bidimu kutuadijila ku 19 too ne ku 29. Mbambe anu bu Yeshaya ne: “Ke meme ewu, untume meme.” (Yeshaya 6:8, MMM) Nansha mukavua Yeshaya mudilambule kudi Yehowa, wakitaba kayi muenzeja ku bukole bua kuenza mudimu mukuabu uvuabu bamupesha. Bidi bimueneka ne: bua kuukumbaja bimpe, uvua ne bua kulekela bimue bintu bivua mua kumukuatshisha. Bantu badi benza mudimu ku Betele batu bashiya nzubu yabu ne miaba ikavuabu bibidilangane nayi, bashiya bamamuabu, batatuabu, bana babu ne balunda babu. Mbashiye bionso ebi ku budisuile “bua lumu luimpe.”—Mâko 10:29, 30.
Batu bapeta mabenesha a mu nyuma a bungi ku Betele. Nsongakaji mukuabu wa mu dîku dia Betele (mu ditunga dia Russie) udi umvuija ne: “Tuetu bikale ne lungenyi lua didifila, tudi mua kulonga malu a bungi alua kutuambuluisha bua kusomba bimpe mu bukua-panu bupiabupia. Ndi mua kuamba ne: buanyi meme masanka adi Yehowa mumpeshe mmapite bintu bindi mulekele.”—Malaki 3:10.
Nsombelu wa ku Betele
Nsombelu wa ku Betele utu mushindu kayi? Bena mu dîku dia Betele batu bitaba ne: eu ke nsombelu mulenga ne wa disanka dia bungi. Jens (udi ne bidimu 43) mmusue mudimu udiye wenza ku Betele. Bua tshinyi? Udi wamba ne: “Bualu ndi mumanye ne: tshitudi tuenza mbua kukumbaja mudimu munene wa mushinga. Ndi mmuona mushinga ne mushindu udi mudimu wa Yehowa wenzeka.”
Kutuadija mu Dimue too ne mu Disambombo, batu batuadija dituku ku Betele ne ntendelelu wa mu dinda. Edi ndikonkonona dia Bible didi mukulu kampanda mupiluke ulombola. Mu dimue dionso ku dilolo, batu benza dîba dimue balonga Bible ku diambuluisha dia Tshibumba tshia Nsentedi, ne misangu mikuabu panyima pa dilonga edi kutu muyuki muikale ne tshiena-bualu tshiangatshila mu Bible tshikumbanyine nangananga dîku dia Betele.
Ntshinyi tshitu tshienzeka patu muntu ubuela mu dîku dia Betele bua musangu wa kumpala? Bua bapiabapia kuibidilanganabu ne malu a ku Betele, bana betu bapie mu nyuma batu benza miyuki idi itangila malu kabukabu a mudimu wa ku Betele. Munkatshi mua mbingu bungi kampanda mu tshidimu tshiende tshia kumpala, muanetu mupiamupia ku Betele udi ubuela mu kalasa kalenga kadi kenzeka lumingu luonso bua kumuambuluisha akoleshe lumvu luende lua Bible. Bapiabapia aba badi kabidi balonda programe wa dibala dia Bible wa pa buende. Bapiabapia badi babuela mu dîku dia Betele badi babala Bible mujima mu tshidimu tshiabu tshia kumpala.
Bionso ebi bidi ne diambuluisha kayi? Joshua (udi ne bidimu 33) wa mu dîku dia Betele dia mu ditunga dia Hong Kong udi wandamuna ne: “Betele mmungambuluishe bua kukolesha dianyisha dianyi kudi Yehowa be. Ndi nsomba ne bana betu bakole mu nyuma, bakadi benze bidimu bia bungi mu mudimu wa Yehowa. Ndi ntamba kuanyisha malu a mu nyuma adibu balongolole bu mudi: ntendelelu wa mu dinda ne dilonga dia mu dîku dia Tshibumba tshia Nsentedi. Kabidi, ndi musue bulongame ne nsombelu mupepele udi ku Betele. Malu aa adi angepula ku tunyinganyinga tua patupu. Ndi mulonge kabidi mushindu wa kujikija bilumbu mu njila wa buena Kristo, ne misangu yonso bitu bingambuluisha bikole.”
Bena ku Betele batu bafila dîba diabu ne makanda abu a bungi bua kuenza mudimu udibu badifidile ku budisuile. Mmumue ne: badi bafila makanda abu a mubidi ne lungenyi luabu luonso tshia kumpala bua kuenza midimu idibu babapesha ku Betele. Kudi malu kabukabu adi akengela kuenza. Bamue badi ku biamu bidi bipatula mikanda anyi bidi biyilamakaja, bua kuenza mikanda idibu batumina bisumbu. Bakuabu badi benza mudimu ku tshikuku, mu nzubu wa tshidiilu anyi ya disukuila bilamba. Ku midimu idibu bafila bua kuenza kudi kabidi wa dikolopa, wa ku madimi, wa diibaka ne mikuabu. Bamue badi ne mudimu wa kulongolola biamu bidibu benza nabi mudimu mu bibambalu bionso ebi. Bakuabu badi buondapangana anyi benza mudimu mu biro. Midimu yonso idibu bafila ku Betele mmimpe ne idi isankisha bantu bikole. Mudimu wonso udibu benza ku Betele udi nangananga usankisha muntu bualu udi uyisha malu a Bukalenge kumpala ne badi bawenza bualu mbanange Nzambi.
Batu batuma bena mu dîku dia Betele mu bisumbu bishilangane, mudibu badimuenena bipeta bia mudimu udibu benza ku Betele. Badi basanka bua kuyisha ne kubuela mu bisangilu bia tshisumbu. Ke bualu kayi bena Betele mbashemeje malanda bikole ne bena Kristo ba mu bisumbu bidibu.—Mâko 10:29, 30.
Kanbi, muanetu wa bakaji wa mu dîku dia Betele udi mu Grande-Bretagne udi wamba ne: “Ndi ne dianyisha dia bungi bua tshisumbu tshietu! Pandi mu bisangilu ne mu diyisha, ditabuja dianyi didi dikola pandi mmona bana betu basuibue ba balume, ba bakaji, ne bana babu balela ne bakulakaje bikalamu pabu! Nansha kuoku kuenzeke tshinyi batu anu balua mu bisangilu. Bidi bingambuluisha bua kuenza mudimu wanyi ku Betele ne lukunukunu.”
Nsombelu wa ku Betele ki mmuimanyine anu pa mudimu udi wenzekaku, kuyisha ne kulonga patupu nansha. Bena mu dîku dia Betele batu kabidi ne mêba atubu bajikijaku lutetuku. Imue misangu, kutu bikondo bimpe bidi biambuluisha mu nyuma bidibu babikila ne: “Dilolo mu dîku,” bitu bibapesha mushindu wa kuanyisha bipedi bia bana betu ba bungi ne bua kumanya malu adi akankamija a bena ku Betele bakuabu. Tshidi tshisankisha kabidi bikole ndisombeshangana dimpe ne bakuabu. Batu mua kuikala ne miaba ya kudiololuela, batu ne bilaminu bia mikanda ya kubala ne ya kutangila padi muntu ujinga bua kuya kule ne amue malu adiye ukeba bua kumanya. Katuena mua kupua kabidi muoyo tu-mayuki tulenga tutubu bela padibu ku mesa dîba dia kudia.
Tom (wa mu dîku dia Betele mu ditunga dia Estonie) udi wamba ne: “Kudi mâyi manene pabuipi ne Betele, ne kumuelelu kuawu kudi dîtu dimpe ditambe mututu tuya kuendakanaku ndambu ne mukajanyi. Ku misangu ntu nnaya dinaya dia golf, hockey, ne dia kandundu ka tenese ne balunda ba mu tshisumbu tshietu ne ba ku Betele. Ne patu kuulu kuimpe, tutu tuya kuendakana ne makalu.”
Tshia kuenza bua kubuela ku Betele
Kakuyi mpata, Betele mmuaba udi bena Kristo bakole mu nyuma benzela Yehowa mudimu wa tshijila ne bakuatshila bena Kristo nabu badi pa buloba bujima mudimu. Bantu badi babuela mu dîku dia Betele badi ne bua kukumbaja amue malu. Mmalu kayi audi ne tshia kukumbaja bua kubuela ku Betele?
Anu bu Timote (eu wakenza mudimu pamue ne mupostolo Paulo), bantu badibu bitabila bua kubuela ku Betele badi ne bua kuikala babanyisha mu tshisumbu tshiabu. (1 Timote 1:1) Timote ‘wakadi ne lumu luimpe lumanyibue kudi bana babu ba mu Kristo ba mu Luseta ne mu Ikonio.’ (Bienzedi 16:2) Nansha mutshivuaye nsonga, Timote uvua mumanye Mukanda wa Nzambi ne mushindame bimpe mu bulelela. (2 Timote 3:14, 15) Bia muomumue, bonso badibu banyishila bua kuenza mudimu ku Betele badi ne bua kuikala bamanye Bible.
Bena mu dîku dia Betele badi ne bua kuikala ne lungenyi lua didifila. Elu ke lungenyi luvua nalu Timote e kuitaba mene bua kuenza midimu ya Bukalenge pa muaba wa kumpala kua yende, kufikishabi Paulo too ne ku diamba ne: “Tshiena ne munga muntu udi mua kutangila malu enu ne muoyo mujima bu yeye, bualu, bakuabo bonso badi bakeba amu bidi bibalengelela bobo, kabayi bakeba bidi bilengelela Yezu Kristo. Nudi bamanye mudi Timote muleje tshilejilu tshia bulamate, ne mutudi benze nende mudimu wa kulongesha Mukenji mulenga kaba kamue, bu mudi muana ne tatuende benza.”—Filipoi 2:20-22, MMM.
Mudimu wa ku Betele badi mua kuwenza kudi bantu balume anyi bantu bakaji badi banange malu a Nzambi. Mushindu udibu balongolole malu udi upesha bena mu dîku dia Betele mushindu wa kukola mu nyuma; badi balonga Bible, babuela mu bisangilu, bayisha pa tshibidilu, ne basombeshangana ne bena Kristo bakadi bapie mu nyuma. Nenku batu bambuluisha aba badi ku Betele bua kutumikilabu mubelu wa Paulo wa se: “[Tungunukayi ne kuenda ne Yezu Kristo], base miji kabidi bibakila munda muende, bashindame pa ditaba, anu bu muvuabo banulongeshe, buule tente ne dianyisha.”—Kolosai 2:6, 7, Mukenji Mulenga.
Pa kumona mudi mudimu wa ku Betele, bawetu badibu bitabila bua kuwenza badi ne bua kuikala ne makanda a mubidi mimpe. Biwikala mukumbaje malu atudi batele aa, muikale ne bidimu 19 anyi bipite apu, ne mutambule kukadi matuku wowu makese ntshidimu tshijima, tudi tukulomba bua wele meji bua mudimu wa ku Betele.
Tuetu bonso tudi tuenza mudimu
Mutudi bena Kristo, dijinga dietu bonso ndia kuteka malu a Bukalenge pa muaba wa kumpala ne kuenza mudimu wa Yehowa ne anyima mujima. (Matayo 6:33; Kolosai 3:23) Tukoleshayi bana betu badi ku Betele ku muoyo bua kutungunukabu ne mudimu wa tshijila eu. Tuambilayi nangananga bansonga badi bakumbaje malu aa bua badifundile tshipatshila tshilenga etshi: kuya ku Betele.
Kuikala ku Betele mmuanda muimpe udi usankisha; udi mua kuikala bushuwa mudimu mutambe buimpe buebe wewe. Ke mudibi bua Nick, wakaya ku Betele ne bidimu 20. Panyima pa mumane kushala bidimu dikumi ku Betele, udi wamba ne: “Misangu yonso ntu nsambila Yehowa, mmuela tuasakidila bua bulenga buende bundi tshiyi muakanyine. Tshindi mua kukeba tshikuabu, ntshinganyi? Ku Betele tudi ne bena Kristo ba lulamatu badi benza muabu muonso bua kusadila Yehowa.”
[Kazubu/Tshimfuanyi mu dibeji 22]
NTSHINYI TSHIDI BAKULU NE BALEDI MUA KUENZA?
Bakulu ne batangidi bena ngendu ke badi nangananga ne bua kukankamija bansonga bua kulomba bua kubuela ku Betele. Pavuabu bele bansonga badi ku Betele nkonko matuku adi panshi aa, biakaleja ne: bansonga 34 pa 100 bavua babakankamije tshia kumpalampala kudi bakulu bena Kristo bua kuya ku Betele. Ntshia bushuwa se: nebashiyangane ne bena mu bisumbu bivuabu. Kadi mbimpe kuvuluka ne: nansha muvua Timote mu Luseta ne mu Ikonio usaka bansonga bakuabu ku malu mimpe, bakulu ba mu bisumbu ebi kabakakandamana nende bua kenji mudimu ne Paulo to. Kabakamba ne: kulekela Timote wenza ngendu ne Paulo kuvua mua kujimijila tshisumbu muntu wa mushinga mukole nansha.—1 Timote 4:14.
Nangananga baledi bena Kristo ke badi ne bua kupesha bana babu lungenyi luimpe mu tshilumbu etshi. Pavuabu bele bansonga nkonko mutudi baleja kuulu eku, bansonga 40 pa 100 bakamba ne: baledi babu ke bavua babakankamije bua kuya ku Betele. Muanetu mukuabu wa bakaji uvua muenze bidimu ndambu mukese ku Betele wakamba ne: “Mushindu uvua baledi banyi benza mudimu wa Yehowa ke wakansaka bikole bua kuya ku Betele. Mushindu uvuabu benza mudimu wa ku dîba ne ku dîba wakamfikisha ku dimona ne: uvua mudimu mutambe bulenga.”
[Kazubu mu dibeji 24]
MBANANGE MUDIMU WA KU BETELE
“Ndi munange mudimu undi ngenza ku Betele. Bidi binsankisha pandi mumanye ne: dituku dijima ndi muenzele Yehowa mudimu ne nemuenzelewu kabidi malaba, malaba mukuabu, ne makuabu matuku adi alonda. Ndi ne kuondo ka muoyo katoke ne lungenyi lûle tente ne malu malenga.”
“Betele mmuaba uudi mua kufila dîba ne makanda ebe onso mu mudimu wa Yehowa kakuyi ditanaji. Mudimu eu udi ufila disanka. Udi kabidi umvua malu makuabu a bulongolodi bua Yehowa. Udi udimona pabuipi menemene ne muaba udi midimu ya bulongolodi ebu yenzekela, upeta disanka dia bungi.”
“Kuenza mudimu ku Betele ke tshintu tshimue tshitambe buimpe buanyi meme. Malu a dilonga kaatu ajika kuoku. Malu andi ndonga mbua kukuatshila nawu Yehowa mudimu, ki mbua kudienzela anyi malu nansha. Mudimu undi ngenza ku Betele kawakuya mu mâyi to.”
“Kuenza mudimu ne mamanya anyi kudi kumpesha disanka ne ditalala bualu ndi ngenza mudimu ne mamanya aa bua Yehowa ne bua bana betu.”
“Tshivua mua kupeta disanka ne diakalenga dia bushuwa mu mudimu umvua ngenza kumpala nansha. Ntu mujinge bua kuenzaku mudimu ne bana betu ba balume ne ba bakaji ne kubakuatshilawu kabidi. Ke bualu kayi ndi mulue ku Betele. Ntu ngumvua disanka bulelela pandi mvuluka ne: mudimu wonso undi ngenza newambuluishe bakuabu mu nyuma ne neutumbishe Yehowa.”