Udiku mua kudifila pebe anyi?

¹ Muanda munene wakenzeka mu tshidimu tshia 778 K.B.B. Muprofete Yeshaya wakamona mu tshikena kumona ‘Mukalenge mushikame mu nkuasa wende wa bukalenge, muikale kulu ne mubandishibue mulu.’ Pashishe Yeshaya kumvua baselafima bakula bua lumu lua Yehowa, bamba ne: “Wa Tshijila, Wa Tshijila, Wa Tshijila udi Yehowa wa misumba.” Bushuwa bivua ne tshia bua kuikala bikuatshisha buôwa! Yehowa udi wela lukonko ludi lupampakaja lua ne: “Ntume nganyi? Udi mua kuya pa mutu petu nganyi?” (Mukanda wa Mvidi Mukulu) Ki mbumvuije bualu nansha bumue pa bidi bitangila mudimu eu anyi difutu diapeta muntu wawenza ku budisuile to. Kadi Yeshaya wakandamuna kayi welakana ne: ‘Ki meme eu, untume meme!’​—Yesh. 6:1,3, 8.

² Lungenyi elu lua kudifila ku budisuile bua kuenza tshionso tshidi Yehowa ulomba ludi mu bantu bende. (Mus. 110:3) Mpindieu mbele lubila lua kuenda kukeba aba badi mua kudifila nkayabu bua kuenza mudimu. Udiku mua kudifila pebe ku budisuile bu muakenza Yeshaya anyi?

³ Badi bakeba bana betu badi mua kuenza mudimu ku Betele. Nenku bana betu abu badi ne bua kuikala ne dijinga dikole dia kuyisha malu a Bukalenge kumpala ne kuikala pabuipi bua kuenza tshionso tshidibu mua kubalomba bua kuenza bua kukuatshisha mudimu wa diyisha lumu luimpe pa buloba bujima. (Mat. 6:33) Bushuwa, kuikala muena mu dîku dia Betele mmushindu wa pa buawu wa kusadila Yehowa ne muoyo mujima. Mmushindu kayi?

⁴ Mudimu udibu benza ku Betele: Elabi meji bua midimu idi yenzeka dituku dionso mu nzubu minene isatu ya Betele udi mu ditunga dia États-Unis mu provense wa New York: ku Brooklyn, ku Patterson, ne ku Wallkill. Bana betu 5 730 bena dîku dia Betele badi mu nzubu isatu eyi badi ne diakalenga dia kuambuluisha kasumbu ka mupika wa lulamatu ne wa budimu ne Kasumbu Kaludiki kende bua kupatula Bible ne mikanda ya malu a mu Bible ya kuyisha nayi pa buloba bujima ne kabidi bua didilongela. (Mat. 24:45) Tshilejilu, tshidimu tshia mudimu tshishale etshi tuvua bapatule ne babanye mikanda 24 364 670, tukanda tukese ne broshire 39 813 464, bibejibeji 270 528 000 ne bande ya diteleja 1 271 041; bena ku Betele wa États-Unis ke bavua bakuate mudimu wonso eu. Badi benza mudimu wa dikema wa dikebulula ne disungula ‘mêyi adi asankisha bantu, mêyi makane ne malelela’ bua kuafunda mu mikanda eyi. (Muam. 12:9, 10) Bakudimunyi ba mikanda bapite pa 1 900 pa buloba bujima badi benza mudimu wa dipatula mikanda eyi mu miakulu mipite pa 300. Kudi kabidi mudimu wa bungi udi wenzeka bua kulombola bionso bidi bienzeka mu filiale 110 pa buloba bujima ne mu bisumbu 11 500 bidi mu ditunga dia États-Unis. Badi kabidi bakuatshisha filiale idi ne midimu ya dienza plan ne didiundisha nzubu ya Betele, Nzubu ya Mpuilu ne Nzubu ya Bukalenge 15 248 idibu nayi dijinga mu matunga adi kaayi ne mpetu ya bungi. Betele udi ukeba bena budisuile ba bungi bua mudimu wa dipatula mikanda ne diyabanya, disukula nzubu, dilongolola dia biamu, dilamba, disumba dia bintu, ba minganga, ne benji ba midimu mikuabu kabukabu ya ku Betele.

⁵ Midimu yonso eyi mmikole, kadi idi bua disanka dietu dia mu nyuma. Bidi bituenza disanka dia bungi patudi tumanya ne: makanda etu ne bukole buetu tudi tukuata nabi mudimu bua mudimu eu wa diyisha bantu ne dibalongesha. Mudimu wa ku Betele udi utuambuluisha bua kumanya Yehowa ne bulongolodi buende bimpe menemene. Badi batuvuluija muvua mufundi wa misambu mukankamije bena Isalele bua kumanya bimpe menemene muaba munene uvuabu baludikila malu a teokrasi pa buloba mu tshikondo tshiabu.​—Mus. 48:12, 13.

⁶ Malu mimpe a ku Betele: Aba badi benza mudimu ku Betele badi bumvua munyi bua mudimu udibu nawu muaba eu? Mona mêyi avua bamue ba mu dîku dia Betele, bansonga ne bakulumpe bambe. Muanetu mukuabu wa bakaji ukadi muenze bidimu bisatu ku Betele udi wamba ne: “Dikala dianyi ku Betele ndikolesha malanda anyi ne Yehowa. Mu bungi bua matuku andi ndala ku Betele ke mu bungi bua dimanya dindi mpeta pa mushindu udi malu enzeka ku Betele ne bingambuluisha kabidi bua kumanya bikole bumuntu bua Yehowa. Mudimu wa ku Betele mmungunzulule kabidi mêsu bua kumona ne: Yehowa udi wenza mudimu ne bantu; wenza mudimu ne bantu ba mishindu yonso. Ne kabiena bikengela kuikala muntu mupuangane bua Yehowa kushishaye kukuanyisha to.”

⁷ Muanetu mukuabu wa nsongalume udi wamba ne: “Ndi ngela meji buanyi meme nkayanyi ne: ‘Nebikale bualu bua disanka bua kubuela mu bukua-panu bupiabupia ne kulondela bena lulamatu ba kale ne: mvua muenze bidimu bia bungi ku Betele, pamutu pa kuikala pambelu bua kukeba makuta.’”

⁸ Muanetu mukuabu wa nsongalume udi wela meji bua dilongesha didiye mupete wamba ne: “Kulonga mua kudimanya ne kumanya tshindi ne bua kuakaja mu nsombelu wanyi, pashishe kukolesha ngikadilu ayi, kuvua dibenesha dinene. Ndi ndiumvua mpindieu mukumbane menemene bua kusadila Yehowa. Ndi mupete lutulu lua bungi, mumanye mua kudikanda ne ndi ne dinanga dia bungi.”

⁹ Muanetu mukuabu wa nsongakaji wakamba bua malu malenga adiye mupete too ne mpindieu katshia wayaku ne: “Programe wa malu a mu nyuma udi ku Betele mmundongeshe malu a bungi a Yehowa ne mushindu undi mua kumuidikija mu ngelelu wanyi wa meji, mundi ndiumvua ne kumuidikija mu bienzedi bianyi. Bu mudi dilongesha edi ditungunuka, malu malenga aa pawu adi anu matungunuke.”

¹⁰ Muanetu wa balume mukuabu ukadi muenze bidimu 59 mu mudimu wa ku dîba ne ku dîba, (bidimu bipite pa 43 ku Betele) wakamba ne: “Betele kêna bu nzubu wa badiambike bu mudi bamue bela meji to. Tudi tukumbaja malu a bungi bualu malu onso a buatshia buila atudi tuenza adi mu programe mumana kulongolola bimpe. . . . Kakutu kuanji kufika dituku dindi ndua ku mudimu ne tshiyi ne disanka dia tshimvua muenze to. Mbua tshinyi? Bualu patudi tudifila kudi Yehowa ne anyima wetu yonso, tudi ne disanka patudi tumanya ne: ‘tuakuenza anu malu atuvua ne bua kuenza.’”​—Luka 17:10.

¹¹ Muanetu mukuabu wa balume (ukadi muenze bidimu 62 ku Betele) wakamba ne: “Ndi mutuishibue ne: Betele mmuaba mulenga mupita yonso ya pa buloba apa bangabanga ne Mparadizu kuluaye pa buloba. Tshitu muanji kunyingalala nansha musangu umue bua mundi mupitshishe matuku anyi a muoyo mu mudimu wa ku dîba ne ku dîba. Ndi ne disanka dia bungi bua mundi mudimuene ne anyi abidi ne kabidi muambuluishe panyi mu diya kumpala edi didi bulongolodi bua Yehowa bua pa buloba buye! Ne diambuluisha dia Yehowa, ndi mupangadije bua kutungunuka ne kumona Betele bu wanyi muaba undi ne bua kusombela ne kudifila muanyi muonso bua kuyisha malu a Bukalenge kumpala.”

¹² Bana betu badi ku Betele aba, mbatele anu malu makese patupu a ku malu malenga a bungi audi mua kuya kupeta pebe wewe mua kudifila bua kuenza mudimu ku Betele. Anu bu musombelabi bangabanga ne kupeta mudimu kampanda mu tshisumbu, udi ne bua kuanji kudikumbaja mu amue malu. Ngamue a ku malu malomba kayi a kuanji kukumbaja bua kubuela ku Betele?

¹³ Malu malomba bua kuenza mudimu ku Betele: Malu manene a kukumbaja bua kushishabu kuitabila muntu bua kuenza mudimu ku Betele mmaleja mu kazubu kadi mu tshiena-bualu etshi. Kusakidila ku mine malu au, badi bakeba bua kuya ku Betele badi ne bua kuikala benji ba mudimu ba tshisumi, bantu badi kabayi “banangi ba masanka.” (2 Tim. 3:4; 1 Kol. 13:11) Bena dîku dia Betele badi ne bua kuikala balume ne bakaji bakole mu nyuma badi ne tshibidilu tshilenga tshia kudilongela ne badi basake biumvuidi biabu bua kumanya mua ‘kusunguluja tshidi tshimpe ne tshidi tshibi.’ (Eb. 5:14) Dikola dia mu nyuma dia bena Kristo aba didi ne bua kumuenekela mu malu abu onso, kabidi ne ku mvuadilu wabu, ndengejilu wabu wa mubidi ne nkoselu wabu wa nsuki, dimuenekela kabidi ne ku mijiki ne mishindu ya didiolola nayi bidibu banange. Bena ku Betele bena muoyo wa budisuile badi benza mudimu muaba kayi wonso udibu mua kuikala nabu dijinga. Batu bapesha bansonga midimu itu ilomba makanda a bungi, tshilejilu: kuenza mudimu mu tshiapu tshia dipatuila mikanda, kulongolola mikanda ne kuyabanya, kulongolola biamu, kusukula nzubu, disukula dia bilamba ne dilamba dia biakudia. (Nsu. 20:29) Bishilangane ne midimu ya bena panu, mudimu onso wa ku Betele udi ufila disanka dia bungi bualu ng’wa tshijila ne kabidi bualu udi utumbisha Yehowa.​—Kolos. 3:23.

¹⁴ Aba badibu babikila ku Betele badi ne bua kuanji kushalaku tshidimu tshijima. Matuku aa adi abambuluisha bua kulonga bua kulua bena mudimu balenga. Tshitudi tujinga ntshia buobu kudiakaja bua kumona mua kushala ku Betele kashidi. Dinanga diabu bua Yehowa ke didi disaka bena ku Betele bua kuteka malu a Bukalenge pa muaba wa kumpala ne abu kushala alonda panyima; eu mmuanda udi usankisha Yehowa.​—Mat. 16:24.

¹⁵ Majinga adiku mpindieu: Pa kumona midimu idibu benza ku Betele mpindieu, bana betu ba balume bajike ke batudi nabu dijinga menemene. Nansha mudibi kabiyi mukenji, bampanda-njila ba tshibidilu ke batudi tukengela bualu bakadi bamane kuikala mu mudimu wa ku dîba ne ku dîba. Imue misangu kudi mua kumueneka dijinga dia bana betu ba bakaji bajike anyi balume ne bakaji babu (bidimu biabu bibangile ku 19 too ne ku 35) badi ne dimanya kampanda didi Betele nadi dijinga. Nansha bamue bana betu ba balume ne ba bakaji bakadi ne bidimu bipiteku ndambu pa 35 kadi bikale ne mamanya masunguluke a mudimu kampanda adibu mua kuikala nawu dijinga ku Betele, badi pabu mua kuuja dibeji dia dilomba nadi mudimu eu. Tshilejilu bu mudi: baminganga ba menu, badoktere, bamanyi ba malu a konte, bamanyi ba malu a dibaka dia nzubu, baminganga, balongolodi ba mashinyi anyi bamanyi ba malu a nzembu, apa tudi batele anu bilejilu bikese. Kadi, katuena tukankamija bantu bua ne: bakebe mua kupeta mamanya masunguluke anyi kulonga tulasa kampanda ne lungenyi lua kupetela pabuipi mushindu wa kulua kuenza mudimu ku Betele to. Aba bakadi bapete mamanya masunguluke, pamu’apa kumpala kua kumanyabu bulelela, badi mua kufunda mukanda udi umvuija malu aa biakane ne kuulamakaja ku formilere wa dilomba nende bua kubuela ku Betele.

¹⁶ Wewe muuje dilomba dia kuya ku Betele kadi kabayi bakubikilaku, kuteketshi mu mikole nansha. Udi mua kuuja dilomba dikuabu, musangu umue ku tshidimu. Bamue bana betu badi balonge ne bikale ne mamanya adibu nawu dijinga ku Betele mbadifile buobu nkayabu bua kuanji kuambuluisha bu bena budisuile bua matuku makese. Badi mua kulomba bua kuenza mudimu ku Betele bua lumingu lumue, mbingu ibidi, isatu ta inayi anyi too ne ku ngondo isatu. Sekretere ke udi ne formilere bua bena budisuile badi basue kuenza mudimu ku Betele bua tshikondo tshikese. Nudi mua kulomba formilere ya bena budisuile bua matuku makese mu dibeji dienu dia dilomba nadi mikanda.

¹⁷ Kuenzela Yehowa mudimu pamue ne bana babu ne Kristo ndiakalenga dia pa buadi bua bonso badi benza mudimu ku Betele. Bena mu Kasumbu Kaludiki badi banyisha bikole lungenyi lua didifila nkayabu kabayi benzeja kudi muntu ludi nalu bena budisuile aba bua kuenza mudimu udi wambuluisha bana babu bonso ba pa buloba bujima.​—Filip. 2:20-22; 2 Tim. 4:11.

¹⁸ Bansonga: tuadijayi kudilongolola mpindieu bua mudimu ku Betele: Didilongolola bua kuenza mudimu ku Betele didi dituadija kumpala kua muntu kayi muanji kukumbaja bidimu 19 bidi bilombibue bua kubuelaye ku Betele. Ntshinyi tshidi bansonga mua kuenza bua kudilongolola bua mudimu wa ku Betele? Yezu wakamba ne: ‘Mmukuabu wenu kayi biasuaye kuibaka tshibumba tshia tushola, kayi mushikame diambedi mubale mushinga watshi?’ (Luka 14:28) Anu mudi kudilongolola ne kuakaja malu kuikale ne mushinga bua kuasa nzubu, bidi kabidi bia mushinga bua bansonga kuikala ne ntema ya bungi dîba didibu badilongolola bua tshialuabu kuenza mu mudimu wa Yehowa matuku adi kumpala. Badi ne bua kudianjila kuasa tshishimikidi tshikole ku mbangilu kua matuku abu a muoyo bua kumonabu mua kukumbaja malu a mu nyuma adibu badifundila. Bu muudi nsonga, tshishimikidi tshiudi wasa ntshilenga anyi? Biwikale ujinga kubuela ku Betele, konkonone malu adi alonda aa ne ntema ya bungi.

¹⁹ ‘Kuitabuja’ bua mudimu eu wa pa buawu: Mu Matayo 19:12, Yezu wakakankamija balongi bende bua ‘bitabuje’ bua kushala bajike. Bua tshinyi? Ki mbua malu adi atangila muntu nkayende to, kadi “bualu bua bukelenge bua mu diulu.” Mu mushindu wa muomumue, Paulo wakakankamija pende bantu bua ‘kukuatshilabu mukelenge mudimu kakuyi diela meji ku manga malu to.’ (1 Kol. 7:32-35) Diakabi, bantu bavule badi bapangila mushindu wa kuenza mudimu ku Betele bikale bajike anu bualu badi bajinga kubuela mu dibaka pabu batshikale bapuekele menemene. Tudi tukankamija bana betu ba balume batshidi bansonga bua kuenza mudimu ne makanda abu mu mudimu wa ku dîba ne ku dîba patshidibu kabayi banji kuikala ne majitu a dîku. Nunku, dîba dialuabu kuela meji a kusela tshikondo kampanda tshimane kupita, nebikale balume ba nsongo bualu bakadiku bashindame mu nsombelu ne bamanye mua kuenza bimpe mudimu wa buena-Kristo. Bamue bakalua kusela panyima pa bidimu ndambu bipitshisha ku Betele ne pashishe, mulume ne mukaji bonso babidi bakatungunuka ne mudimu wabu kuine aku. Panyima pa matuku nansha buobu mua kubatuma mu mudimu bu mudi wa: butangidi buena ngendu anyi bumisionere, kabakunyingalala bua matuku avuabu benze ku Betele to.

²⁰ Kukeba kua bintu kakulu kukubueja mu ditanaja: Nsonga yonso udi mua kudikonka ne: ‘Pangajikija tulasa tubandile, nempitshishe dîba dianyi dionso mu midimu yanyi anyi mu mudimu wa Yehowa?’ Kadi, kusungula bua kuenza mudimu wa Yehowa kudi kulomba kulekelaku amue malu. Mbia muomumue kabidi bua midimu mikuabu. Kadi, mmudimu kayi udi ufila difutu dimpe diashala matuku a bungi? Yezu wakafila diandamuna ditoke. Bilondeshile Matayo 6:19-21 (MMM), Yezu wakamba ne: ‘Lekelayi kubumba mpetu pa buloba padi mbumbu ne bishi mua kuyidia, ne padi bena mutshima mua kutubula bimana, kuyiba. Kadi bumbayi mpetu yenu mu diulu, mudi mbumbu ne bishi kabiyi mua kuyidia, bena mutshima kabayi mua kutubula bimana bua kuyiba. Bualu kudi tshiuma tshiebe ke kudi muoyo webe.’ Muoyo wetu kautudingi bua kukeba midimu ya panu peshi bubanji pamutu pa kuenzela Yehowa mudimu ne anyima wetu mujima. Tuetu buonso tudi ne bua kumanya ne: tshintu tshilenga tshidiku tshitudi buonso ne bua kukeba, nkuikala mu malanda malenga ne Yehowa, ne atshi ke tshidi tshisankisha mutshima wende. (Nsu. 27:11) Patudi tuteka Yehowa pa muaba wa kumpala mu nsombelu wetu patutshidi bansonga, tudi tuleja tshitudi tuangata ne mushinga wa bungi ne kabidi tuleja mushinga udi nawu Bukalenge buende kutudi. Vuluka ne: ‘Dibenesha didi difuma kudi Yehowa didi divuija bubanji, ne kena utenteka kanyinganyinga pa mutu padi.’ (Nsu. 10:22) Bansonga badi ne mushindu mulenga wa dikema wa kuleja kudi muoyo wabu munemenene pa kupingajila Yehowa tshintu tshia mushinga, bua bionso bidiye mubapeshe. Mudimu wa ku Betele udi upesha bantu mushindu muakane wa kuenza nanku bua aba badi bakumbaja malu malomba.

²¹ Badi benza mudimu ku Betele badi ne bua kuikala ne nsombelu udi kayi katoba: Mufundi wa Misambu wakakonka ne: ‘Nsongalume nealengeje bienzedi biende munyi?’ Wakandamuna ne: ‘Adimuke biende bu mudi dîyi diebe diamba.’ (Mus. 119:9) Kumvuija kuepuka kantu konso kadi kumvuangana ne malu mabi adi mu bulongolodi bua Satana ebu. Bindidimbi bia bantu kabayi bilamba bidibu baleja ku Internet, ngikadilu mibi ne badi kabayi balume peshi bakaji nebe, mijiki mibi, dijikija dibi dia lutetuku, ne bunuavi bua maluvu ng’amue mateyi adi Satana ukoka nawu bansonga bua kubapangisha mushindu wa kukeba malu a mu nyuma. Muntu udi ne bua kuangata dipangadika ne muoyo umue bua kukandamena mateyi aa. Paudi nsonga ne udimona pamu’apa muikale mu bumue bua ku malu aa, tudi tukulomba bua uyikile ne bakulu ba mu tshisumbu tshienu ne ukebe mua kulekela malu aa kumpala kua wewe kuuja dilomba bua mudimu wa ku Betele. Kuikala ne kuondo ka muoyo katoke kudi ne mushinga bua kuenzela Yehowa mudimu ku dîba ne ku dîba.​—1 Tim. 1:5.

²² Manya mua kusomba ne bakuebe: Kumanya mua kusomba ne bantu mbumue bualu bua mushinga wa bungi budi bulombibue bua kuenza mudimu biakane ku Betele. Dîku dia Betele wa mu États-Unis ndienza ne bantu binunu ne binunu ba nsombelu mishilashilangane. Nansha mudi dishilangane edi dienza bulenga bua Betele, imue misangu ditu dikeba ntatu. Biwikale musue bua kubuela ku Betele, nebikale bimpe wewe mua kudikonka ne: ‘Ntuku mfika munda tshianana tshianana padi bakuabu babenga lungenyi lundi nalu anyi? Bakuabu batuku bamona mundi mumanye mua kusomba ne bantu anyi?’ Wewe mumone ne: udi ne bua kudiakaja mu malu aa, anu mpindieu, tuadija kushintuluka. Kuenza nunku nekukuambuluishe bua wewe kumanya mua kusomba ne kuenza mudimu ku Betele ne bakuabu badiku kakuyi lutatu.

²³ Enza muebe muonso bua kuikala muntu mushindame mu nyuma pa kukolesha malanda ebe ne Yehowa. Ikala ne tshibidilu tshia kudilongela, kudi kumvuija kabidi kubala Bible dituku dionso. Ikale mumanyishi wa lumu luimpe wa mitalu. Pa kulonda malu onso aa, kudiunda kuebe kua mu nyuma nekumueneke kudi bantu. (1 Tim. 4:15) Bushuwa, malu malenga mmindile aba badi badilongolola ku mpindieu bua mudimu wa ku dîba ne ku dîba!

²⁴ Baledi longeshayi bana benu: Ntshinyi tshidi baledi mua kuenza bua kusaka bansonga ku mudimu wa ku dîba ne ku dîba? Yezu wakamba ne: “Mulongi kena mupite mulongeshi wende; yeye mulonge biakane, neafuanangane ne mulongeshi wende.” (Luka 6:40, MMM) Mulongi udi mulonge biakane neenze malu makane amu bu mulongeshi wende. Lungenyi elu ndudi baledi bena Kristo ne bua kulama padibu badienzeja bua kulongesha bana babu “mu dinemeka dia [Nzambi].” (1 Tim. 4:7, MMM) Bu mutu bana bikale anu ne meji a kuleja ngikadilu ya baledi babu pa bidi bitangila malu a mu nyuma, nanku baledi badi ne bua kudikonka ne: ‘Tuetu bine tutuku tuangata ne mushinga mudimu udi wenzeka ku Betele bua kuyisha ntendelelu mulelela wa Yehowa kumpala anyi? Tutuku tuanyisha ne: ndibenesha dia Yehowa bua mudiye mulongolole bua Betele ikaleku anyi? Tutuku tuela meji ne: kupitshisha matuku a muoyo mu mudimu wa Yehowa mmudimu mulenga udi bana betu mua kuenza anyi?’ Dianyisha ditudi nadi tuetu bine bua Betele ne mudimu udi wenzekaku, nedituambuluishe bua tuetu kupesha bana batudi tulela lungenyi lumue lumue elu.

²⁵ Elekana ne Ana bavua ne dianyisha dikole bua ntendelelu mulelela. Mbashiye tshilejilu tshilenga bua baledi bena Kristo ba lelu. Mu Isalele wa kale, anu bantu balume ke bavua balombibue bua ‘kulua ku mêsu kua Mukalenge Nzambi’ misangu isatu ku tshidimu mu tabernakle. Kadi nansha nanku, Elekana ne dîku diende dijima bavua benza luendu lua kilometre 30 ku makasa “tshidimu tshionso” bua kufila milambu ku muaba munene eu wa ntendelelu wa Yehowa. (Ekes. 23:17; 1 Sam. 1:3, 4, 9, 19; 2:19) Bidi bimueneka ne: tatu wa dîku eu uvua musue bua dîku diende dijima dilonde padi lungenyi luvuaye nalu pa bidi bitangila malu a mu nyuma.

²⁶ Ana uvua wenza pende malu avua bayende wenza bua ntendelelu mulelela. Wakadiumvua muenzejibue bikole bua kukuatshisha ntendelelu mulelela ku tabernakle. Ana wakaditshipa kudi Yehowa ne: yeye mumupeshe muana wa balume, neamufile bua kuenzaye mudimu ku tabernakle. (1 Sam. 1:11) Mikenji ya Mose ivua yanyishila mulume bua kushipa mêyi a mutshipu adi kaayi makane a mukajende. (Nom. 30:6-8) Kadi, mbimueneke ne: Elekana wakanyisha mutshipu wa Ana, kulejaye ne: yeye pende wakatua ngenzelu au wa ntendelelu mulelela nyama ku mikolo!​— 1 Sam. 1:22, 23.

²⁷ Samuele muana wakalelabu wakapeta lungenyi luimpe anu bua dianyisha ne meji mimpe avua nawu baledi bende anyi? Eyowa. Pavuaye mutshikale nsonga, Samuele wakenza mudimu uvuabu bamupeshe ne dianyisha dionso ne lulamatu ne bakamulongesha bua kuenza makuabu malu adi bantu banange a mu mudimu wa Nzambi. Dianyisha diakaleja Elekana ne Ana bua mudimu wa Samuele ku tabernakle kadiakajika diakamue pakatuadijaye kuukumbaja to. Bakatungunuka ne kuya kumumona pa tshibidilu bua kumukankamija ne kumuambuluisha bua kutungunukaye ne mudimu wende wa ku dîba ne ku dîba.​—1 Sam. 2:18, 19.

²⁸ Etshi ki ntshilejilu tshilenga tshidi Elekana ne Ana bashile baledi bena Kristo lelu’eu anyi? Padi bana batumvua tuanyisha ne muoyo mujima mudimu wa ku Betele ne bamona tutua malu a bukalenge nyama ku mikolo, dijinga dia kusadila bakuabu didi dibakuata pabu. Baledi bavule badi bafika ku dibueja mu mitshima ya bana babu lungenyi elu lua kusadila bakuabu. Munga muana wa bidimu muanda mutekete wakafunda ne: “Pandi nkola, ndi musue kuenza mudimu ku Betele, ne ndi ne malu makese andi musue kuenzaku. (1) Kufunda ku tshiamu Tshibumba tshia Nsentedi ne Réveillez-vous!, (2) kuikala mu tshibambalu tshienu tshia bazodi, (3) mu disukula dia bilamba. Mudimu wonso udiku au. Kakuena bualu.” Kabienaku bilenga ku muoyo bua kumona lungenyi lua nunku mu mioyo ya bana batudi balele anyi?

²⁹ Bansonga, vulukayi ne: ‘Bia panu bidi bijimina ne bijingajinga biabi; kadi muntu udi wenza mudi [Nzambi] musue, udi ushala kashidi.’ (1 Yone 2:17, MMM) Tungunukayi ne kukeba malu a mu nyuma, katuyi tupua muoyo mudimu wa pa buawu wa ku Betele. Baledi wetu, londayi tshilejilu tshia bena lulamatu ba kale bakakankamija bana babu bua kuikala batshina Nzambi. (2 Pet. 3:11) Tuetu bonso tudiku mua kuenza bualu kampanda bua kuambuluisha bansongalume ne bansongakaji bua kukuatshila Mufuki wetu Munene mudimu ku dîba ne ku dîba padiku mushindu, bualu ‘udi ne mulayi wa muoyo wa mpindieu ne wa muoyo ukadi pa kulua.’​—1 Tim. 4:8; Muam. 12:1.

[Kazubu mu dibeji 4]

Malu malomba bua mudimu wa ku Betele

• Kuikala mutambule kukadi kupiteku nansha tshidimu tshijima

• Kuikala muena Kristo mushindame mu nyuma udi munange bikole Yehowa ne bulongolodi buende

• Kuikala ne makanda mimpe a mu nyuma, a mu lungenyi, ne a mubidi

• Kuikala muena muabu anyi kuikala ne mikanda ya kua mbulamatadi wa ditunga dia Congo-Kinshasa ta Congo-Brazzaville idi ikuanyishila bua kusombelamu

• Kuikala mumanye mua kubala, kufunda ne kuakula bilenga Mfualansa

• Kuikala ne bidimu kubangila ku 19 too ne ku 35