Betele udi ukengela bena budisuile

¹ Musambu wa 110:3 udi uleja ne: tshivua ne bua kumanyishisha tshisamba tshia Nzambi mu matuku a ndekelu aa ndungenyi lua budisuile. Pa buloba bujima, basadidi ba Yehowa badi badifila bua se: lumu luimpe lua Bukalenge lumanyishibue. Munkatshi muabu mudi bena dîku dia Betele. Tudi tujinga kunupesha mamanyisha a pa mutu bua nuenu kupita kumanya disanka edi dia pa buadi dia mudimu ne bua nuikale bamanye makengela a Société.

² Midimu mivule: Midimu mipesha bena dîku dia Betele idi mishilashilangane. Ku Brooklyn, ne mu filiale ya société, bana betu ba balume badi batumika bua dipatula anyi dituma dia Bible, mikanda, bibejibeji, broshire ne trakte. Bamue badi balongolola biakutumika nabi ne nzubu. Kukobelela peshi kukulupila dîku (bia-kudia, bilamba, ne bintu bikuabu. . . ) kudi kulomba paku mudimu wa bungi. Bana betu ba balume ne ba bakaji balongolodi ba bia mu nzubu badi balama mankenda mapitshidile ne benza midimu mivule ya mushinga.

³ Dimanya Mudimu ne malu malombibue: Kudi mpindieu dikengedibua, kumpala kua bionso, dia bansonga bajike badi ne bukole bua mubidi, bualu mudimu wa ku Betele udi ukengela dikanda ne bukole bua mubidi. Biajingaye kuwuja formilere wa dilomba bua kubuela ku Betele, nsongalume udi ne bua kuikala mutambuishibue kukadi tshikondo tshîpi ntshidimu tshimue. Bidi bikengela ikala muntu udi mushindame mu nyuma, muanyishi wa mudimu mukole, nangananga wa bianza. Mu matuku etu aa mu bulongolodi ebu, ba bungi mbamona se: bidi bikengela kuepuka midimu ya mushindu’eu. Ke bua tshinyi eu yonso udi ujinga kusadila ku Betele udi ukengela kuvuala bumuntu bupiabupia bua kuenzaye mudimu muimpe ne bianza biende. (Tangila Efeso 4:28.) Kêna ne bua kuikala muntu wa lungenyi lushindika pa masanka, pa didiolola ne manaya, udi ne bua kuikala mumana kulekela ngikadilu ya buana.—Tangila 1 Kolinto 13:11.

⁴ Udi ne bidimu pankatshi pa 19 ne 35 anyi? Udi ne bukole bua mubidi ne bua nyanji ya munda milenga anyi? Utu ubala, ufunda ne wakula biakane fransé anyi? Udi muntu ukadi mushindame mu nyuma anyi? Bikala Betele mukubikile, neushaleku ne lulamatu tshikondo tshîpi ntshidimu tshimue, witaba mudimu kayi wonso wakupeshabu anyi? Biwikala mua kuandamuna eyowa ku nkonko yonso eyi, nebikale bimpe wewe kuela meji ku disanka dia pa buadi dia kusadila ku Betele.

⁵ Masanka adi apatukila ku disadila ku Betele: Tshibumba tshia Nsentedi tshia dia 15 Kabalashipu 1994 tshivua tshileje bualu ebu: “Muena ku Betele udi ne disanka dia kusadila Yehowa pamue ne bana babu matuku wonso! (Musambu wa 26:12) Mmushindu kayipu bulenga mutupa bua kuvudija dipia dia mu nyuma!” Eyowa, bidi disanka dia pa buadi didi muntu ulabula pa kusadila ku Betele. Bena ku Betele badi batantshila bana betu ba balume bena lulamatu ba mutantshi mule. Mu bimue bikondo batu bapeta dikumbula dia umue wa ku bena mu Kasumbu kaludiki. Nansha bituapeshibua mudimu kayi wonso, bidi bushuwa disanka bituenza mudimu mu buobumue ne balunda ba mushindu’eu.

⁶ Programe wa muena ku Betele: Muena ku Betele udi mudiine ne kasuki mu midimu idi itangila Bukalenge. Ku dimue too ne ku disambombo, pa dîba 6 ne minute 45, udi uya mu nzubu wa tshidilu bua kuikalaku mu ntendelelu wa dinda. Bena mu dîku dia Betele badi bafila mumvuija pa mvese wa dituku. Pashishe, muanetu wa balume mumonamona malu udi wenza muyuki mu tshikoso mulonda kudi disambila. Dîku didi nenku dikoleshibua mu nyuma kumpala kua kutuadija dituku dia mudimu. Kunyima kua didia dia mu dinda, muntu yonso udi ujinga kukumbaja mudimu mumupesha, ku dimue too ne ku ditanu, babangisha pa dîba 7 ne minute 45 too ne ku dîba 17, kuikala diikisha dia dîba dimue bua didia dia midi, ne mu disambombo babangisha pa dîba 7 ne minute 45 too ne ku dîba 12. Muena ku Betele udi upitshisha mêba ende a dilolo, a disambombo kunyima kua midi ne a dia lumingu mu bisangilu, mu buambi, mu didilongela ne mu majitu ende kabukabu. Udi mua kubuela mu tshilaminu tshia mikanda tshia Betele bua kulonga ne kulongolola bisangilu. Kadi, bushuwa, udi upeta kabidi dîba dia kuikisha ne kudiolola. (Mâko 6:31, 34) Betele udi upetesha muntu mushindu wa kufila mêba a bungi mu mudimu wa tshijila.

⁷ Midimu mu tshisumbu: Mu Zaïre, bena ku Betele mbabanyibue mu bisumbu 29 bia mu tshimenga tshia Kinshasa. Mbamanye se: badi ne bua kuikala banangi ba mudimu bua kulama bukole bua mu nyuma buimpe. Ke bualu kayi badi batantshila bisangilu mu bisumbu biabu ne bapatuka mu buambi pamue ne bana babu ba balume ne ba bakaji. Kabidi, badi bababidila dilonga dia Tshibumba tshia Nsentedi mu dimue ku dilolo pamue ne dîku dia Betele. Programe wa ku Betele mmushindamene pa malu a mu nyuma. Bidi bituala nsombelu wa disanka mu mudimu wa Yehowa.—1 Kol. 15:58.

⁸ Mushindu wa kudilongolola bua kusadila ku Betele: Biwikala musue kusadila biakane ku Betele, uvudije bukole buebe bua mu nyuma ne ulame malanda mashême ne Yehowa. Bua kusungula bantu bapiabapia ku Betele, badi bapita kupa bampanda-njila muabi eu. Kadi ki mmudimu mulamina bampanda-njila nkayabu to. Buonso badi bakumbaja malu malombibue badi mua kulomba bua kubuela ku Betele. Nenku, nansha muntu kayi ne mamanya a pa buawu, udi ne bua kuikala mukumbane mua kumvuangana ne bakuabu bua kuenza mudimu mu buobumue. Difuilakana ne lungenyi lua budikadidi bidi ne bua kushila dikuatshishangana ne dinanga muaba, bia muomumue ne dijinga dia kukolela bulombodi bua teokrasi.—Tangila Efeso 4:16.

⁹ Munkatshi mua tshisamba tshia Yehowa, bansonga badi mua kuenza mudimu ne kupeta mamanya matela kulu eku. Nenku, bikalabu babikidibue bua kusadila ku Betele, nebapete dilongeshibua dia pa mutu bua kumonabu mua kupeshibua majitu. Tudi tukankamija baledi bena nkristo ne bakulu bua kuakulabu misangu mivule ne bansonga bua Betele. Baledi batu batuala pa tshibidilu bana babu bua kuendakana ku Betele, ebi bidi bibambuluisha bua kuibidilangana ne bidi bienzekaku ne bibasaka ku diuuja formilere wa dilomba bua kubuela ku Betele ku ndekelu wa malonga abu.

¹⁰ Bana betu ba balume ne ba bakaji badi ne dimanya-kuenza mu biamu bidi bitumika ne nzembu ne mu programe ya ordinatere netubajingile difika dilenga. Société udi wenzeja midimu ya dikuba fotokopieze, emprimante ne ordinatere. Tudi tukengela kabidi ba-plombié, balongolodi ba frigo, bena midimu ya nzembu ne bena midimu ya dikuba tudiendelandela. Mu midimu mikuabu, bu mudi mu dikudimuna dia mikanda, bana betu ba balume badi ne dimanya dikumbane mu anglé ne bikale nangananga bamanye bimpe fransé, kiluba, kirundi, lingala, monokutuba, otetela, sango, swahili, tshiluba, ne mikuabu. . . , nebikale mua kutuambuluisha. Bungi bua mashinyi budi buenda buvula. Ke bua tshinyi bendeshi ba mashinyi ne baalongolodi bena dimanya-kuenza badi bakengedibue ku Betele.

¹¹ Tudi tukengela nangananga bana betu ba balume bajike, kadi aba badi ne mamanya kampanda a pa buawu badi mua kubikidibua ku Betele nansha bikale bena dibaka. Nudi mua kupeta formilere ya dilomba bua kubuela ku Betele kudi mutangidi wa tshijengu anyi mu mpuilu wa distrike, anyi pa kufundila biro bia filiale. Biwikala muena dibaka, uvuluke ne: mukajebe udi pende ne bua kuikala ne ngikadilu ya mu nyuma ne kuikala ne bukole bua mubidi ne bua nyanji ya munda milenga. Biwikala mupete dilongeshibua anyi dimanya-kuenza mu umue wa ku midimu mitela kulu eku, anyishaku utume mikanda yebe ya nsombelu, tulasa tuenza ne midimu pamue ne formilere webe.

¹² Udi mua kuandamuna ku dibikila anyi? Betele udi’anu ukengela bena budisuile. Biwikala mukumbaje malu malomba bua kusadila ku Betele, tudi tukukankamija bua kufunda. Kuteketshi biwikala kuyi mubikidibue pa lukasa. Udi mua kufundulula tshidimu tshionso, nebiambuluishe bua kujadika didifila diebe dijima.

¹³ Kudi Yehowa uvua wamba se: ‘Nentume nganyi ne waya buetu nganyi?’ Yeshaya wakandamuna kakuyi dielakana ne: ‘Mmeme eu! Untume.’ Masanka mavule mmakuindile biwabikidibue bua kusadila mu “nzubu wa Nzambi,” Betele.—Yesh. 6:8.