Tshitutu tupinganyina bantu misangu ne misangu
1. Ndukonko kayi lutudi ne bua kudiela bua mudimu wetu wa kuyisha?
1 Mu miaba ya bungi, tutu tuya mu teritware wetu misangu ne misangu. Tutu tupinganyina bantu bamue bamue abu njila ne njila, imue misangu too ne bavua babenga bua kututeleja. Bua tshinyi tudi tutungunuka ne kuya kutangila bantu bavua babenge bua kututeleja kumpala?
2. Tela bualu bua kumpala budi butusaka bua kutungunuka ne kuyisha.
2 Tudi banange Yehowa ne bantu netu: Bualu bua kumpala budi butusaka bua kutungunuka ne kuyisha mbualu tudi banange Yehowa. Muoyo wetu udi utusaka bua kuambila bantu malu a Nzambi wetu munene. (Luka 6:45) Dinanga ditudi banange Yehowa didi ditusaka bua kutumikila mikenji yende ne kuambuluisha bakuabu bua kuyitumikila. (Nsu. 27:11; 1 Yone 5:3) Nansha bantu bobu batuandamune mushindu kayi, katuena mua kulekela kuyisha to. Bena Kristo ba kumpala “kabakalekela” kuyisha nansha pavuabu babakengesha. (Bien. 5:42) Pamutu pa tuetu kuteketa mu mikolo padi bantu babenga bua kututeleja, tutungunukayi anu ne kuyisha bua kuleja ne: tudi banange Yehowa bikole ne badifile kudiye ne muoyo mujima.
3. Bua tshinyi dinanga didi ditusaka bua kutungunuka ne kuyisha?
3 Tudi tutungunuka kabidi ne kuyisha bualu tudi banange bantu netu. (Luka 10:27) Yehowa ki mmusue bua muntu nansha umue afue. (2 Pet. 3:9) Nansha mutukadi bayishe mu teritware wetu njila ne njila, tutshidi anu tupetamu bantu badi basue kuenzela Yehowa mudimu. Tshilejilu, mu tshidiila tshia Guadeloupe, pa bantu 56, kudi anu Ntemu wa Yehowa umue, kadi tshidimu tshishale etshi, bantu 214 mbatambule mu tshidiila etshi. Bantu batue ku 20 000 bavua babuele mu Tshivulukilu, tuamba ne: muntu umue pa bantu 22 ba mu tshidiila etshi.
4. Mmushindu kayi utu teritware ushintuluka?
4 Dishintuluka dia malu mu teritware wetu: Bantu batu bashintuluka bikole mu teritware wetu. Tuetu bapingane kumbelu kuvuabu kabayi batuakidile bimpe musangu mushale, tudi mua kusangana pamuapa umue wa ku bena mu dîku adi utu kayi muanji kuyukila ne Bantemu, udi mua kututeleja. Peshi tudi mua kusangana bakuabu bantu badi banange malu a Nzambi. Tshilejilu, bana bavua baledi babu kabayi basue Bantemu badi bumbuka kumbelu kua baledi babu padibu bakola. Bantu ba mushindu eu badi mua kujinga kuteleja lumu luimpe lua Bukalenge.
5. Mmalu kayi adi mua kufikisha bantu ku dituteleja bimpe?
5 Bantu batu pabu bashintuluka. Mupostolo Paulo uvua ‘mupendi wa Nzambi ne mukengeshi wa bantu ne muena luonji’ kumpala kua kuluaye muena Kristo. (1 Tim. 1:13) Biamuomumue, bantu ba bungi badi benzela Yehowa mudimu lelu badi pabu ne tshikondo tshivuabu kabayi basue kututeleja. Bamue bine bavua mua kuikala bakengesha too ne bantu bavua bayisha lumu luimpe. Bu mudi nsombelu wenda anu ushintuluka, bamue bavua batuluisha anyi kabayi basue kututeleja badi mua kufika ku dituteleja. Bakuabu badi mua kufika ku dituteleja bimpe panyima pa bobu bamane kupeta lutatu bu mudi kufuisha muena mu dîku diabu, padibu babipata ku mudimu, bapeta lutatu lua makuta anyi basama.
6. Bua tshinyi tudi ne bua kutungunuka ne kuyisha ne disanka?
6 Bulongolodi bua malu ebu mbutangile ku ndekelu kuabu, kadi mudimu wetu wa kuyisha ne kulongesha udi wenda wowu uya kumpala. (Yesh. 60:22) Nunku, tudi tutungunuka ne kuyisha ne disanka ne tuditatshisha bua kumona malu mu mushindu muimpe. Pamuapa muntu utuapetangana nende musangu udi ulonda neatuteleje. Tudi ne bua kutungunuka anu ne kuyisha. ‘Patudi tuenza nunku, netudisungile tuetu ne badi bumvua mêyi etu.’—1 Tim. 4:16.