Mandamuna ku nkonko yenu

▪ Njiwu kayi idiku padi muntu uyukila ne muntu udiye kayi mumanya ku Internet?

Kudi miaba ya bungi ku Internet idi yambuluisha bantu bua kufundilangana ne bakuabu. Ku diambuluisha dia miaba eyi, muntu udi mua kuenza programe mu dîna diende, kubuejamu foto yende ne amue malu adi amutangila. Padi bantu bamona programe wende eu, badi mua kumufundila pabu. Bansonga ba bungi badi benza mudimu ne programe eyi, too ne bamue bansonga ba mu tshisumbu badi benza mudimu nayi bua kuyukila ne bantu badi badiamba mudibu Bantemu ba Yehowa.

Mbitekete bua muntu utudi tuyukila nende ku Internet kutushimaye bua tshidiye, bua malanda ende ne Yehowa anyi tshidiye ujinga menemene. (Mus. 26:4) Muntu udi mua kuamba mudiye Ntemu wa Yehowa kadi pende kayi muikale Ntemu, peshi muikale muntu udibu bipate mu tshisumbu anyi mene muikale mutontolodi udi ukeba mua kupambuisha bakuabu. (Gal. 2:4) Mbimueneke kabidi ne: bantu bakulumpe batu basue kuangata bana batekete batu pabu benza mudimu ne programe eyi bua kubadinga.

Nansha tuetu bajadike bimpe ne: bantu batudi tuyukila nabu ku Internet mbena Kristo netu bulelela, bitu bitekete bua miyuki ya mushindu eu kukudimukayi ne kulua ya malu a busenji. Bua tshinyi? Bualu kabitu bikolela bantu bua kuakula badilekelele ne bantu badibu kabayi banji kumonangana nabu mpala ne mpala to. Badi kabidi bamona ne: bu mudi malu adibu bafundilangana aa kaayi amanyika, bantu bu mudi baledi babu anyi bakulu kabakuamanya to. Diakabi, bamue bansonga bena Kristo mbakuatshike mu buteyi ebu ne batuadije kuakula malu a busenji. (Ef. 5:3, 4; Kolos. 3:8) Bamue mbele foto yabu idibu baleja bitupa bisokome bia mubidi, bafile mêna abu adi ne diumvuija dibi anyi bela filme ya mijiki idi ijulangana majinga mabi mu programe ya ordinatere yabu.

Bua bualu ebu, baledi badi ne bua kuikala batangila misangu yonso malu adi bana babu benza ku ordinatere yabu. (Nsu. 29:15) Kubueja muntu utudi katuyi bamanye mu nzubu muetu anyi kumulekela nkayende ne bana betu mbualu bubi bua njiwu mikole! Biamuomumue, kukeba bua kudia bulunda ne bantu batudi katuyi bamanye ku Internet nansha bobu badiamba mudibu Bantemu ba Yehowa kudi mua kutukebela ntatu.​—Nsu. 22:3.