Programe Wa Mpuilu Wa Tshijengu Wa Musangu Udi Ulua

“Tulamayi misangu yonso dituku dia Yehowa mu lungenyi,” ke tshiena-bualu tshia mpuilu wa tshijengu watuadija mu Kabitende. (2 Pet. 3:12) Mpuilu eu mmulongolola bua kutusaka ku dienza malu. Mu katupa kîpi emu, malumbuluisha a Yehowa neadibiangule pa basombi ba pa buloba ebu. Nnganyi wapanduka mu ‘dituku dinene dia Nzambi Wa-Bukole-Buonso?’ Anu aba badi batabale mu nyuma ne badi ne nsombelu wa bubanji mu “bienzedi bia nsombelu munsantu ne malu a bulamate kudi Nzambi.”​—⁠Buak. 16:14; 2 Pet. 3:​11, NW.

Bua kupanduka mu dituku dia Yehowa, bidi ne mushinga bua kutambula. (1 Pet. 3:21) Bamanyishi badi bajinga kuenza nunku mu mpuilu eu nebikale ne bua kumanyisha mutangidi-muludiki, wangata mapangadika adi akengedibua.

Muyuki mukosolola wa bitupa binayi, udi ne tshiena-bualu tshia: “Mushindu wa bantu utudi ne bua kuikala,” neutuleje patoke mushindu utudi ne bua kuenza malu bua kulama misangu yonso dikalaku dia dituku dia Yehowa mu lungenyi. Muyuki wa patoke wikala ne tshiena-bualu tshia: “Enzayi malu ne meji mu disemena dia dituku dia Yehowa,” neufile diumvuija dia tshidi ‘kukeba Yehowa, buakane ne bupuekele’ bua kuikala munkatshi mua bapanduki.​—⁠Sef. 2:3.

Mpuilu wa tshijengu neajike ne miyuki ibidi mikankamiji mienza kudi batangidi bena ngendu ne idi ne biena-bualu bia: “Nsombelu webe mmuashila pa bulelela anyi?” ne “Tudilongolole pa kulama mu lungenyi dituku dia Yehowa.” Miyuki eyi neyitupeteshe mushindu wa kuela meji pa nsombelu wetu ne kuenza mashintuluka adi akengedibua. Milayi ya mu Bible ne malu adi enzeka pa buloba bidi bileja bushuwa ne: dituku dia Yehowa dikadi pabuipi. Programe wa mpuilu eu neatusake bua ‘kuikala bapole, kuikala batabale.’ (1 Pet. 5:8) Tuangatayi mapangadika majadika bua kubuelamu.