Netulonge Mukanda Wa Disanka Mu Dîku

Nenuikale ne disanka dia kumanya se: kubangila ku lumingu lua dia 6 Kasuamansense 1997 netukonkonone mukanda wa Nsapi wa disanka mu dîku mu malonga a Bible a tshisumbu. Muntu nansha umue kapangidi dilonga dienza mu Tshisumbu dia tshiludiki etshi tshia mushinga bua nsombelu wa disanka mu dîku, tshiludiki tshishindamene pa Mifundu. Programe wa dilonga neambuluishe bua kukonkonona mu buondoke tshikoso tshionso ne mvese yonso wa mu Bible mutela mu mukanda.

Nshapita wa kumpala neajike yonso nkong mu lumingu lua kumpala, bualu udi ne mvese mikese mitela idi kayiyi ne mêyi ayi mafunda. Bua kabingila kamuekamue aka, netukonkonone nshapita wa 15 mu musangu umuepele. Kadi, netulonge nshapita mikuabu yonso mu misangu ibidi, mmuomumue ne: tshitupa tshia nshapita lumingu luonso. Ebi nebishiye mpunga mukumbane bua kubala ne kumvuija mvese yonso mitela ne bua kukonkonona mushindu wa kutumika ne mvese yonso mifunda mu tshikoso tshionso.

Dikonkonona dia nkonko ya diambulula idi mu kazubu kadi ku ndekelu kua nshapita yonso didi ne mushinga mu dilonga. Nenku, nebikengele kulongolola dîba dikumbane bua kuandamuna ne kukonkonona mvese mifila.

Balombodi ba dilonga dia mukanda mbalombibue bua kuteya ntema ya pa buayi ku didilongolola diabu; nebakankamije bena mu kasumbu kadibu balombola, pamue ne bapiabapia, bua kudilongololabu bimpe, bua kubuelabu pa tshibidilu mu tshisangilu etshi ne kufilamu mandamuna.​—⁠om 74-6.