Dilonga dilenga dia mukanda wa Bible utu ulongesha tshinyi menemene?
1 Dipatuka dia mukanda wa Bible utu ulongesha tshinyi menemene? mu Mpungilu wetu wa Distrike wa “Tutumikilayi Nzambi” divua bualu bua disanka dia bungi. Mu matuku makese emu netuenze nawu mudimu bikole mu buambi nangananga bua kulonga Bible ne bantu. Ke bualu kayi tudi ne bua kumanya mukanda wetu mupiamupia eu bimpe menemene. Netuumanye, bualu wowu ke utualonga mu dilonga dia mukanda kutuadijila mu lumingu lua dia 17 ngondo muinayi wa 2006.
2 Mutangidi wa dilonga dia mukanda neanji kuela nkonko idi ku ntuadijilu kua nshapita yonso. Pashishe nealombole dilonga dia mukanda ne nkonko idi kuinshi kua dibeji. Nubale mvese idi ne malu manene ne nuyumvuije. Pashishe nuenze diambulula ne kazubu kadi ku ndekelu kua nshapita yonso ka: “Tshitu Bible ulongesha,” bualu ke mudi mandamuna a nkonko idi ku ntuadijilu kua nshapita. Nebinuenze disanka bua kufila mandamuna bualu mukanda eu udi uleja malu mu mushindu muimpe udi muntu yonso mua kuumvua kakuyi lutatu.
3 Tshisakidila tshia mukanda eu tshidi ne biena-bualu bia bungi. Netshituambuluishe pikala mulongi ujinga kumanya malu makuabu pa tshiena-bualu kampanda. Nenukonkonone imue misangu bikuabu bitupa bia tshisakidila etshi mu dilonga dia mukanda. Mubadi wa bikoso neabale malu onso adi mu tshiena-bualu tshia tshisakidila, kadi biena-bualu bidi bipite bule neabibale tshitupa ku tshitupa. Bu mudi tshisakidila katshiyi ne nkonko, mutangidi neele nkonko bua kupatula malu manene adimu.
4 Netulonge mukanda wa Bible ulongesha lubilu lubilu mu dilonga dia mukanda. Kadi katuakulonga ne bantu mu buambi mushindu au to, nangananga aba badi bamanye Bible anu kakese anyi kabayi mene bamumanye. (Bien. 26:28, 29) Netuikale tumvuija mvese mu buondoke, tumvuija bimfuanyi ne bikuabu bintu. Nanku, difundila bua kubuela mu dilonga dia mukanda wa Bible utu ulongesha tshinyi menemene? lumingu luonso ne wikale ufilamu mandamuna.