Bisangilu Bidi Bisaka Ku Midimu Mimpe

¹ Ntendelelu wetu udi ne bitupa binene bibidi: dibuela mu bisangilu bia tshisumbu ne buambi. Bitupa ebi bibidi bidi bienda pamue ne tshitupa tshionso tshidi ne buenzeji kudi tshikuabu. Bisangilu bidi bisaka ku midimu mimpe; pabi udi mutambe buimpe ku midimu eyi ng’eu wa kuyisha ne kuenza bayidi. (Eb. 10:24) Bitualekela bisangilu, netufike ne lukasa luonso ku dilekela diyisha, bualu katuakusakibuaku kabidi.

² Mu bisangilu bia ku lumingu luonso, tutu tupeta dilongesha dia mu nyuma dilongolola bua kutusaka ku diyisha. Dilongesha edi didi dituvuluija ne: tudi mu tshikondo tshikole, ne bidi bitusonsola bua kumanyisha mukenji wa muoyo udi mu Bible. Tudi kabidi bakankamija ne bakolesha bua kunanukila mu buambi. (Mat. 24:13, 14) Tudi tuibidila bua kuleja ditabuja dietu patoke pa kubabidila bikondo bia difila mumvuija mu bisangilu. (Eb. 10:23) Ne pa kuikala badifundishe mu Kalasa ka Mudimu wa Teokrasi ke patudi tulonga bua kuikala ba-ministre badi bapatula bipeta bimpe ne bua kuakaja mbabi yetu ya bulongeshi.​—⁠2 Tim. 4:2.

³ Mushindu udi bisangilu bia mudimu bitusaka ku diyisha: Yonso wa kutudi udi ne bua kudianjila kubala malu a mu Mudimu wetu wa Bukalenge. Nenku neashale mu lungenyi luetu patualua kuamona kabidi mu Tshisangilu tshia Mudimu ne mu manaya a tshilejilu menzela ku tshiakuidi. Mu buambi, netuikale mua kuvuluka Mudimu wetu wa Bukalenge, tuvuluka manaya a tshilejilu ne, bu tshipeta, tufila bumanyishi butue. Ke tshitu bamanyishi bavule benza.

⁴ Ku buenzeji bua Tshisangilu tshia Mudimu, bamue bamanyishi badi bapunga dîyi bua kuyisha pamue. Bikale ne mibelu itshidi pa yoyi mu mutu, mbasonsola ne badi ne dijinga dia kuyiteta bualu tshisangilu ntshibakankamije bua kuyisha lumingu luonso.

⁵ Kakuena tshintu nansha tshimue tshidi mua kupingana pa muaba wa bisangilu bietu bia bena nkristo. Mu bisangilu ke mutudi mua kupetangana pamue, tuetu ne binetu, ne mu bisangilu ke mutudi tusakibua ku midimu mimpe. Tudiku basue bua mudimu wetu kupatulawu bipeta anyi? Pa nanku, tubuelamu pa tshibidilu. Tuleje nenku dianyisha dietu kudi Yehowa bua dilongolola edi dia dikema mu ‘dibenga kulekela didisangisha dietu pamue.’​—⁠Eb. 10:25.