Tueyemene Yehowa Bua ‘Kudiundisha’
1 “[Ngakapeta] Bua Musangu Wa Kumpala Disanka Dia Kuenza Tshianyi Tshitupa Mu Diasa Dia Tshisumbu Tshipiatshipia. Ebi Biakalomba Bidimu Bipite Pa Bibidi Bia Mudimu Mukole, Bia Disambila Ne Dieyemena Kudi Yehowa, ‘Yeye Udi Ubidiundisha.’ ” Ke Muakamba Mpanda-njila Kampanda Munangi Wa Mudimu Wakalonga Mushinga Wa Kueyemena Yehowa Bua ‘Kudiundisha.’ (1 Kol. 3:5-9) Patudi Tukeba Bantu Badi Basankidila Malu A Mu Nyuma, Tudi Petu Dijinga Ne Dikuatshisha Dia Nzambi Bituikala Basue Ne: Mudimu Wetu Ukuame Mamuma.—Nsu. 3:5, 6.
2 Bidi bikengela kudima: Bua ntete ya bulelela kudiundayi, bidi bikengela kuyidima. Kukumbulula muntu dituku dimue peshi abidi panyima pa dikumbula dia kumpala kutu misangu mivule kupatula bipeta bimpe. Tuikale ne luya ne bena bulunda. Tuenze bua mutuyukidishi ikale mudilekelele. Katuakudi nkayetu nansha. Tumupeteshe mpunga wa kumanyanganaye netu ne tuleje ne: tudi tumutabalela bu muntu.
3 Ngondo mujima wa Kabitende, netutungunuke ne kufila broshire kabukabu bu mu Tshimungu. Kadi nebitukengele kabidi bua kukumbulula bantu bikala baleje disankidila peshi bitabe broshire. Mushindu kayi? Mu dienza makumbulula ne mu dilomba bantu bua dilonga dia Bible. (Mat. 28:19, 20) Nenku, netuikale mua kutumika ne broshire wa Utulomba ne kudiambuluisha ne mibelu inayi idi ilonda eyi.
4 Biwikala muyukile ne muntu udi udiebeja kudi bulongolodi ebu buya, udi mua kuambulula diyukilangana mushindu eu:
◼ “Kakuyi mpata, udi unyingalala bu meme bua dijimina dia bienzedi bia tshitembu mu nsangilu wa bantu. Tudi tumvua malu adi akuatshisha buôwa a tshinyangu ku nzubu, ndi nsua kuakula bua bana, baledi peshi bena dibaka badibu bakengesha. Kabidi, ba bungi badi bamona se: mbimpe kushima peshi kuiba bua kukumbaja majinga abu. Bua diebe dimona, mushindu udi bantu batumika ne muoyo wabu udi ne mushinga kudi Nzambi anyi? [Lekela muntu andamune.] Nzambi mmutekele muntu amue mêyi-makulu, ne kaena makole bua kualonda nansha.” Bala 1 Yone 5:3. Pashishe uleje broshire wa Utulomba ne umubulule pa dilongesha 10. Koka ntema pa ngenzelu mifunda mu miaku misendamija ku ntuadijilu kua tshikoso 2 ne ku 6, ne ebeja muntu ngenzelu udi, ku diende dimona, utamba kunyanga nsangilu wa bantu. Bala tshikoso tshidi tshiakula bua bualu ebu ne mvese umue anyi ibidi, bilondeshile dîba didiku. Jikija pa kubala tshikoso tshia 7 ne pungayi dîyi bua diyukilangana dia musangu walonda.
5 Bua aba badi baditatshisha bua nsombelu wabu wa mu dîku, udi mua kuamba ne:
◼ “Bua diebe dimona, bua kufika ku diibaka nsombelu wa mu dîku, bidi bia meji bua kueyemena Mufuki anyi?” Lekela muntu andamune. Bulula broshire wa Utulomba pa dilongesha 8 ne umvuija ne: didi ne mêyi-maludiki mangata mu Bible bua muntu yonso wa mu dîku. Leja mushindu wa kutumika ne broshire eu, pamue ne Bible, bua kupetelamu malu matambe buimpe. Londa mêyi-mashidimunyi adi mu dibeji 2. Angata mapangadika bua kulua kujikija dilongesha edi peshi kutuadija dikuabu diasungula muntu binuikala bakonkonone dia kumpala mu ka-bujima kadi.
6 Mona mushindu wa buludiludi wa kulomba dilonga dia Bible. Kuleja broshire wa “Utulomba” ne kuamba ne:
◼ “Broshire eu ndilongesha didi difila malongesha a nshindamenu a mu Bible. Mu dibeji dionso neupete mandamuna ku nkonko idi isuya bantu kukadi siekele mivule. Tshilejilu: Nzambi udi ne dilongolola kayi bua buloba?” Tangila dilongesha 5 ne bala nkonko ya ntuadijilu. Ebeja muntu lukonko ludi lutamba kumusankisha ne bala tshikoso peshi bikoso bidi ne diandamuna dialu, pamue ne mvese miakanyine. Mumvuije ne: udi kabidi mua kupeta kakuyi lutatu mandamuna adi asankisha ku nkonko mikuabu. Mulombe bua kualukila bua kukonkonona lukonko lukuabu.
7 Pamu’apa newanyishe ngenzelu eu mutambe kupepela bua kutuadija dilonga dia Bible:
◼ “Udi mumanye se: wewe mua kudilamina minute mikese patupu udi mua kupeta diandamuna ku lukonko lua mushinga mukole lua mu Bible anyi? Tshilejilu . . .” Tela lukonko lumue ludi ku ntuadijilu kua dimue dia ku malongesha a mu broshire eu ne lutudi bamone se: muntu eu udi udiela. Bua kupeta ngenyi pa nkonko, tangila bikoso 15 ne 16 mu tshisakidila tshia Mudimu wetu wa Bukalenge wa Tshisanga 1997 tshidi ne tshiena-bualu tshia “Tupetayi dikima bua kuenza makumbulula.”
8 Kujikija ne disanka lutatu lua dienza makumbulula ne malonga a Bible ng’umue wa ku midimu ya ‘benzejanganyi ba mudimu’ ne Nzambi. (1 Kol. 3:9) Nunku tudienzeje bua kudima disankidila, pashishe tueyemene Nzambi bua ‘kudiundisha.’ Mu dienza nunku, netupete disanka dilelela, didi mudimu kayi mukuabu kawuyi mua kupetesha.