Ya kulama

Ngenyi ya mushindu wa kutuadija diyikila ne bantu mu buambi

Mua kuenza mudimu ne tshisakidila etshi

Mêyi a bungi a kuenza nawu mudimu bua kuyisha bantu a ku adi alonda aa akadi mapatuke mu nimero ya kale ya Mudimu wetu wa Bukalenge. Tetabi kuenza mudimu muudi musue ne a bungi a kudiwu aa mu buambi bua udimuene bipeta biwapatula. Lama tshisakidila etshi ne ikala ne tshibidilu tshia kutapamu dîsu paudi udilongolola bua buambi.

Udi mua kukoka ntema ya muntu mu Dîyi dia Nzambi biwikala uya musangu umue ku bualu. Jula lukonko lusunguluke, pashishe ubale mvese muîpi udi wandamuna lukonko elu. Udi mua kuteta ne ngenyi eyi:

“Paudi wela meji ku matuku adi kumpala, udiku umona ne: adiku ne malu malenga atudi mua kutekemena anyi peshi udi amu ne dielakana? [Lekela muntu andamune.] Bible ukavua mumane kumanyisha bimvundu bitudi tumona lelu ebi ne malu aluabi kukebesha.”​—2 Tim. 3:1, 2, 5; Nsu. 2:21, 22.

“Bantu badi baditatshisha bikole lelu’eu bua kuikala ne makanda a mubidi mimpe. Udiku mumanye bua se: Nzambi mmulaye bua kujikija masama onso bua kashidi anyi?”​—Yesh. 33:24; Buak. 21:3, 4.

“Udiku mumanye bua se: Bible udi wamba ne: ndekelu wa bionso nekushale mbulamatadi anu umuepele wakokesha buloba bujima anyi?”​—Dan. 2:44; Mat. 6:9, 10.

“Udi wela meji ne: nsombelu uvua mua kuikala mushindu kayi bu Yezu Kristo muikale ukokesha buloba?”​—Mus. 72:7, 8.

“Bantu ba bungi badi bakenga bua kansungasunga anu bualu mbalume anyi bakaji, bua tshitendelelu tshidibu peshi bua dikoba diabu. Buebe wewe, Nzambi udi umvua munyi bua malu aa?”​—Bien. 10:34, 35.

“Tudi bamanye ne: Yezu Kristo wakenza bishima bia bungi mu tshikondo tshiende. Wewe musue kumulomba bua kuenzaye tshishima tshimue, ntshiepi tshiwamulomba?”​—Mus. 72:12-14.

“Bikadi bitshiokeshe bantu ba bungi bua kuteleja anu ngumu mibi ya ntatu. Bantu mbasue kumvua babambila tshidi mua kuyijikija. Kadi nkuepi kutudi mua kupetela mushindu mulelela wa kujikija ntatu yetu?”​—2 Tim. 3:16, 17.

“Udiku mua kujingulula Bukalenge buutu ulomba mu Disambila dia Tatu wetu anyi?”​—Buak. 11:15.

Mua kutuadija diyuki ne muntu

Nkonko idi kuinshi eku mmiangatshila mu mukanda wa Comment raisonner, badi baleja dibeji dia muaba udi diandamuna dionso disanganyibua mu mukanda eu:

Bantu ba malu mimpe bonso batu baya mu diulu anyi? (61)

Muntu udi ne bua kuya mu diulu bua kupetaye nsombelu mulenga mu matuku atshilualua anyi? (62)

Kudiku tubingila tuimpe tutudi mua kuitabujila Nzambi anyi? (106)

Nzambi utu bulelela uditatshisha bua malu adi atufikila tuetu bantu anyi? (107)

Nzambi mmuntu mulelela anyi? (108)

Bua tshinyi bidi ne mushinga bua kumanya ne kuenza mudimu ne dîna dia Nzambi dia nsungasunga? (200)

Yezu Kristo ke Nzambi muine bushuwa anyi? (205)

Ntshinyi tshidi mua kuambuluisha bua kulengeja nsombelu wa mu dibaka? (229)

Bua tshinyi malu mabi mmavulangane nunku? (237)

Nnganyi udi ukokesha buloba ebu​—Nzambi anyi Satana? (250)

Bua tshinyi tutu tukulakaja ne tufua? (253)

Bafue batu munyi? (255)

Bitendelelu bionso mbianyishibue kudi Nzambi anyi? (310)

Mmunyi mudi muntu mua kujingulula tshitendelelu tshilelela? (316)

Bukalenge bua Nzambi nebukumbaje malu kayi? (336)

Mbuenzeji kayi budi nabu Satana mu bantu lelu’eu? (368)

Bua tshinyi Nzambi mmulekele makenga? (375)

Muoyo wa muntu udi ne mushinga kayi? (434)

Ngenyi ya kuenza nayi mudimu bua kufila broshire wa Utulomba

“Kakuyi mpata, udi witaba bualu bua ne: bantu ba bungi badi bitabuja Nzambi. Bonso badi bamuitabuja mbajadike ne: Nzambi udi utulomba bualu kampanda. Kadi bualu budi bantu kabayi bamanya nntshina tshidi Nzambi utulomba etshi” Pashishe uleje broshire wa Utulomba, umubulule pa dilongesha dia 1 ne nuyikidilangenapu.

“Pa kumona ntatu ya bungi idi mu mêku lelu’eu, ukadiku mudiebeje bua kumanya tshidi menemene mua kuambuluisha bua kuikala ne disanka mu dîku anyi?” Padi muntu ufila diandamuna, umumvuije ne: Nzambi mmuleje mu Bible nsapi mulelela wa disanka mu dîku. Ubale Yeshaya 48:17. Pashishe ubulule broshire wa Utulomba mu dilongesha dia 8, uleje imue ya ku mvese idibu batelemu idi ifila mibelu idi muena mu dîku yonso ne bua kulonda. Bala nkonko idi ku mbangilu kua dilongesha. Umuebeje ni udi mua kubala mandamuna.

“Broshire eu udi ne malongesha mapepele mua kumvua adi mimanyine pa malu a nshindamenu a mu Bible. Mu dibeji ne dibeji dionso neusangane mandamuna a nkonko idi mitatshishe bantu kukadi bidimu nkama ne nkama. Tshilejilu, Nzambi wakafuka buloba ne tshipatshila kayi?” Ndaku mu dilongesha 5 ne ubale nkonko idi ku ntuadijilu kuadi. Ebeja muntu unudi nuyikila nende bua aleje ludi lumusankisha bikole ne pashishe mubadila tshikoso tshidi ne malu adi andamuna lukonko ludiye musungula, nubale kabidi mvese idi miakanyine. Umumvuije ne: kudi kabidi mushindu wa kupeta mandamuna adi asankisha a nkonko mikuabu. Umulombe bua umupinganyine munga musangu bua kuandamuna lukuabu lukonko.

“Ntshinyi tshidi mua kuikala tshiledi tshia malu a tshikisu adi enzeka mu bilongelu? Bidi bienzeka bua dipanga kukolesha bana bimpe dia baledi anyi? Peshi bidi mua kuikala bualu bukuabu bu mudi malu mabi adi Satana usaka bantu bua kuenza?” Indila diandamuna. Muntu yeye muambe ne: mbua malu mabi adi Diabolo usaka bantu bua kuenza, bala Buakabuluibua 12:9, 12. Leja patoke mudimu udi Diabolo ukuata mu dikebesha dia bimvundu pa buloba. Pashishe ubulule broshire wa Utulomba mu dilongesha 4, webeje muntu ni ukadiku mudikonke bua kumanya kuakafumina Diabolo. Bala ne nukonkonone bikoso bibidi bia ntuadijilu. Kadi bikala muntu muandamune ne: “ndipanga kukolesha dimpe dia baledi” didi tshiledi tshia malu a tshikisu mu tulasa, ubale 2 Timote 3:1-3 ne uleje patoke tshidi tshikebesha malu aa. Pashishe ubulule broshire wa Utulomba mu dilongesha dia 8, ubale tshikoso 5 ne nutungunuke ne diyuki.

“Udiku umona ne: bidi mua kuikala bia meji bua kutekemena se: Mufuki uvua mua kutupesha dimanya ditudi nadi dijinga bua kuakaja nsombelu wa mu dîku bua ikale wa disanka anyi?” Padi muntu wandamuna, umuleje broshire wa Utulomba. Umubulule mu dilongesha dia 8 ne umuambile ne: dilongesha edi didi diumvuija mikenji ya mu Bible idi itangila muena mu dîku yonso. Umuleje mua kuenza mudimu ne broshire eu ne Bible bua kumuambuluishaye bikole.”

“Pa kumona ntatu yonso itudi tupeta lelu’eu, udi wela meji ne: disambila didi mua kuikala ne diambuluisha dilelela kutudi anyi? [Lekela andamune.] Ba bungi badi bamba ne: disambila ditu difila bukole munda. [Bala Filipoi 4:6, 7.] Nansha nanku, muntu udi mua kumona ne: masambila ende kaatu apeta mandamuna to. [Bulula broshire wa Utulomba mu dilongesha dia 7.] Broshire eu udi umvuija mushindu udi disambila mua kutuambuluisha.”

“Tuvua tuakula ne bena mutumba netu bua kumanya bua tshinyi kudi bitendelelu bungi nunku bishilashilangane pa buloba. Pabi, kudi Bible anu umuepele. Bua diebe dimona, bua tshinyi kudi dikondakana dia malu nunku mu bitendelelu? [Indila diandamuna. Bulula broshire wa Utulomba mu dilongesha dia 13, bala nkonko idi ku ntuadijilu kuadi.] Wewe mubale dilongesha edi neupete mandamuna akusankisha.”

Wewe mumane kufila Tshibumba tshia Nsentedi ne Réveillez-vous! kudi muntu, mulomba ni udi mua kumubadila tshikoso tshimue tshia tshîpi. Padiye ukuitabila, bulula broshire wa Utulomba mu dilongesha 5. Umuleje nkonko idi ku ntuadijilu kua dilongesha, ne umulombe bua ateleje bimpe bua apete diandamuna dia lukonko lua kumpala paudi ubala tshikoso tshia mbangilu. Kunyima kua wewe mumane kubala tshikoso atshi, ela lukonko ne uteleje diandamuna diende. Umupeshe broshire ne yeye mumuangate, udilongolole bua kumupinganyina bua kulua kupeta mandamuna ende a nkonko mikuabu ibidi idi ishala.

Ngenyi ya mushindu wa kufila mukanda wa Dimanya

Ne Bible webe ku bianza, utuadije ne mêyi aa: “Tudi tuyikidilangana lelu ne muntu yonso wa mu musesu wenu eu malu a mu Bible. Umue mvese wa mu Bible udi wamba . . .” Bala Yone 17:3, pashishe webeje ne: “Udi mumone tshidibu balaye tuetu mua kupeta dimanya dijalame edi anyi? [Indila diandamuna.] Nkuepi kudi muntu mua kupetela dimanya dia nunku?” Padi muntu ufila diandamuna, muleja mukanda wa Dimanya, pashishe umuambile ne: “Mukanda eu udi wakula bua dimanya didi difikisha ku muoyo wa tshiendelele. Udi ufila dimanya edi pa kuandamuna nkonko itu bantu badiela pa tshibidilu pa bidi bitangila Bible.” Leja tshikebelu ne webeje muntu ni ukadiku muele meji pa tshiena-bualu nansha tshimue ku bidibu baleje abi.

“Ukadiku mudikonke bua kumanya bikala Nzambi udi umvua bimutonda menemene bua kansungasunga ne makenga bitudi tumona miaba itudi peshi bidi bituenzekela nansha tuetu bine anyi? [Lekela muntu andamune.] Bible udi utujadikila ne: Nzambi mmutunange ne kabidi neatuambuluishe mu bikondo bia makenga.” Bala Musambu 72:12-17. Bulula mukanda wa Dimanya mu nshapita wa 8, umvuija ne: nshapita eu udi ufila diandamuna didi dikolesha ku muoyo dia lukonko lutu bantu ba bungi badiela lua se: Bua tshinyi Nzambi mmulekele makenga? Pikalaku mushindu, konkononayi ngenyi ya mu mvese idi mu tshikoso 3 too ne 5, anyi nulue kuyikonkonona pawapinganyina muntu.

“Tuetu bonso tukadiku bafuishe munangibue wetu. Ukadiku mudiebeje ni tuadiakubamona kabidi anyi? [Lekela muntu andamune.] Yezu wakaleja ne: banangibue betu badi mua kubika ku lufu. [Bala Yone 11:11, 25, 44.] Nansha muvua malu aa menzeke kukadi bidimu nkama ne nkama, adi aleja malu adi Nzambi mulaye bua kutuenzela.” Bulula mukanda wa Dimanya muaba udi tshimfuanyi mu dibeji dia 85, ne ubale mêyi adi kuinshi kuatshi. Pashishe umuleje tshimfuanyi tshidi mu dibeji dia 86 ne utshiumvuije. Shiya bishimikidi bua dikumbula dipiadipia dia musangu udi ulonda pa kuebeja muntu ne: “Udi musue kumanya bua tshinyi bantu badi bakulakaja ne pashishe bafua anyi?” Pawapingana nukonkonone nshapita 6.

“Meji akadiku makuluile bua kumanya tshidi bantu bakebela bua kuikala ne muoyo matuku a bungi anyi?” Padi muntu wandamuna, bulula mukanda wa Dimanya mu nshapita 6 ne ubale tshikoso 3. Elanganayi meji pa mvese mitela. Bilondeshile nkonko ibidi idi ku ndekelu kua tshikoso, ebeja muntu bikalaye mua kuanyisha bua kudimuena nkayende mandamuna. Padiye witaba, nanku nudi mua kukonkonona ndambu wa bikoso bidi bilonda.

“Tudi tuenda tuebeja bantu bikalabu tshia bushuwa bitabuja bualu ebu . . .” Bala Genese 1:1 ne pashishe ukonke ne: “Udi witaba tshidibu bambe etshi anyi?” Muntu yeye muitabe, wamba ne: “Meme panyi ndi ngitabuja bualu ebu. Kadi udiku wela meji ne: bikala Nzambi ngudi mufuke bintu bionso, nanku yeye kabidi ke udi mukebe bubi anyi?” Paudi umanya tshidi muntu wandamuna, ubale Muambi 7:29. Bulula mukanda wa Dimanya mu nshapita wa 8, ubale tshikoso 2. Kadi pikala muntu kayi witaba mêyi adi mu Genese 1:1, umulombe bua nukonkonone tshijadiki tshidi tshileja ne: Nzambi utuku.​—Tangila mukanda wa Comment raisonner, mu dibeji dia 72-74.

“Udiku pebe witaba ne: bu mudi mikenji idi itangila bikadilu yenda ishintulukangana ne lukasa lelu’eu, tudi mua kuikala dijinga ne mibelu ya kueyemena idi mua kutulombola mu nsombelu anyi? [Lekela muntu andamune.] Nansha mudiwu muikale mukanda wa kale menemene ku yonso, Bible udi ufila mibelu miakanyine bua nsombelu wa buena-lelu ne wa disanka mu dîku.” Pashishe uye ku nshapita 2 wa mukanda wa Dimanya ne ubale tshikoso tshia 10, ne tshiambilu tshia kumpala tshia tshikoso tshia 11, ubale kabidi ne 2 Timote 3:16, 17.

“Udiku musue kumanya tshiatufikila tuetu ne buloba ebu mu matuku atshilualua anyi? [Lekela muntu andamune.] Bible udi wakula mu tshikoso bua matuku atshilualua ne muaku umuepele: Mparadizu! Ke muaba uvua Nzambi muteke bantu babidi ba kumpala pakabafukaye. Mona mudibu bumvuija muvua Mparadizu au ne bua kuikala.” Bulula mukanda wa Dimanya mu dibeji dia 8, bala tshikoso tshia 9, muinshi mua ka-tshiena-bualu ka: “Muoyo mu Mparadizu.” Pashishe konkononayi malu adi mu tshikoso tshia 10, ne nubale mvese udibu bafile wa Yeshaya 55:10, 11. Umulombe bua nutungunuke ne diyuki pa mushindu wikala nsombelu mu Mparadizu muasulula, nukonkonone tshikoso tshia 11-16.

Paudi upinganyina bantu bauvua mushile Tshibumba tshia Nsentedi ne Réveillez-vous! udi mua kuamba ne:

“Musangu mushale umvua mulue kukutangila mvua mukushile Tshibumba tshia Nsentedi. Pamu’apa uvua mumone se: mutu wa bualu mujima wa tshibejibeji etshi udi ne: Tshibumba tshia Nsentedi tshidi tshimanyisha Bukalenge bua Yehowa. Lelu ndi musue kukumvuija tshidi Bukalenge ebu ne tshidibu mua kukuenzela wewe ne dîku diebe.” Pashishe ubulule broshire wa Utulomba mu dilongesha 6, nubale ne nukonkonone dilongesha adi bilondeshile dîba didi nadi muntu.

“Dituku dishale diadia mvua mukushile Tshibumba tshia Nsentedi ne Réveillez-vous! Bibejibeji ebi bidi bifikisha bantu ku dinemeka Bible ne mibelu idimu idi ilombola bantu mu bikadilu biabu. Bu mundi mumone ne: bidi ne mushinga bua muntu yonso afike ku diumvua Dîyi dia Nzambi, ke bualu kayi ndi mupingane bua kukuleja tshintu kampanda tshiakuambuluisha bua wewe kumvua Dîyi dia Nzambi edi.” Muleje broshire wa Utulomba ta mukanda wa Dimanya ne umulombe bua nutuadije dilonga dia Bible.

Udi mua kuteta mua kuamba nunku paudi ufila mukanda kayi wonso wa kale wa mabeji 192:

“Bantu badi batamba kuakula bua mushinga mukole udi nawu dilonga kalasa dia nsongo. Buebe wewe, ndilonga dia mushindu kayi didi muntu ne bua kulonda bua kupetaye disanka dia bungi mu nsombelu wende? [Indila diandamuna. Pashishe ubale Nsumuinu 9:10, 11.] Mukanda eu [fila mutu wa bualu wa mukanda uudi ujinga kumupesha] udi ne malu adi mashindamene pa Bible. Udi uleja mpokolo umuepele wa dimanya didi mua kufikisha ku muoyo wa tshiendelele.” Umuleje tshilejilu tshisunguluke mu mukanda, ne umukankamije bua aubale.

Mikanda mikuabu

Udi mua kupeta mishindu mikuabu ya mêyi audi mua kuamba paudi ujinga bua kufila imue mikanda ne broshire mu Index des publications de la Société Watch Tower muinshi mua:

Présentations

Liste par publication

Mua kuya ne malu buludiludi

Bua kutuadija kulonga Bible ne muntu, udi mua kuteta mua kuya ne malu buludiludi nunku:

“Udiku mumanye ne: udi mua kupeta diandamuna dia lukonko lua mushinga mukole lua mu Bible mu minite mikese patupu anyi? Tshilejilu, . . .” Pashishe wele lukonko lumue ludi ku ntuadijilu kua dimue dia ku malongesha adi mu broshire wa Utulomba luudi umona ne: ludi mua kusankisha muntu au.

“Ndi mulue muaba eu bua kukuleja programe wetu wa dilonga dia Bible dia muntu kayi ufuta makuta to. Ndi mua kukuleja mu minite itanu patupu mushindu ututu tuenza. Udiku mua kumpesha minite itanu anyi?” Padi muntu wandamuna ne: eyowa, wangate dilongesha dia 1 mu broshire wa Utulomba bua kuleja mutu dilonga dienzeka, ubala mvese anu umue peshi ibidi iudi musungule. Pashishe, umuebeje ne: “Ndituku kayi diwikala mua kulama minite 15 tshianana bua tulue kukonkonona dilongesha didi dilonda?”

“Bantu ba bungi badi ne Bible, kadi ki mbamanye ne: udi wandamuna nkonko minene itutu tudiela bonso pa bidi bitangila matuku etu atshilualua to. Ne tshiambuluishi tshia dilonga natshi Bible etshi [broshire wa Utulomba peshi mukanda wa Dimanya] mu dîba dimue anyi mu mêba bungi kampanda ku lumingu luonso, neupete mu ngondo mikese dimanya dia nshindamenu dia Bible. Ndi mua kukuleja mushindu udi programe wa dilonga edi muikale.”

“Ndi mulue kukutangila bua kukulomba bua tuikale tulonga nebe Bible ku nzubu kuyi ufuta makuta to. Wewe musue ndi mua kukuleja mu minite mikese patupu mushindu udi bantu ba mu matunga bu 200 balonga Bible mu mêku. Tudi mua kuyikidilangana pa tshiena-bualu tshionso tshiwasungula mu dibeji edi. [Umuleje tshikebelu mu mukanda wa Dimanya.] Ntshiena-bualu kayi tshidi tshikusankisha muaba eu?” Indila bua asungule tshidi tshimusankisha. Bulula mu dibeji didi nshapita udiye musungule, tuadijayi dilonga ku tshikoso tshia kumpala.

“Ndi ngenda ndongesha bantu Bible kakuyi dibalomba makuta ne ndi ne dîba dikumbane bua kulongesha bakuabu. Mukanda eu ke udi utuambuluisha bua kulonga Bible. [Leja mukanda wa Dimanya.] Dilonga edi didi dienza ngondo mikese patupu ne didi diandamuna nkonko bu mudi: Bua tshinyi Nzambi mmulekele makenga? Bua tshinyi tudi tukulakaja ne tufua? Ntshinyi tshidi tshifikila banangibue betu badi bafua? Ne lukuabu lua ne: Mmushindu kayi uudi mua kusemena kudi Nzambi? Udi musue nkuleje mutu dilonga dia nunku dienzeka anyi?”

Wewe muikale ne mêyi kampanda atu akupatuila bipeta bimpe ne akoka ntema ya bantu, tungunuka ne kuenza nawu mudimu! Tshidibi udi mua kuakaja mêyi au bilondeshile difila dia ngondo awu.