Tudi Bantemu Ku Dîba Ne Ku Dîba Anyi?
1 Tudiku mua kuandamuna: “eyowa” ku lukonko elu anyi? Bushuwa, basadidi baditshipe ba Yehowa kabena mua kuditua bonso mu mudimu wa ku dîba ne ku dîba, kadi kabienaku bia meji bua kutekemena se: yonso wa kutudi adiangate bu Ntemu wa ku dîba ne ku dîba anyi? Bushuwa bidi nanku.
2 Kakutu muena nkristo wa mu mêba makese nansha. Pavuaye wakula bua Tatuende, Yezu wakamba ne: “matuku onso ntu ngenza malu adi amusankisha.” (Yone 8:29) Paulo, uvua ne meji a muomumue, wakatukankamija bua ‘kuenza malu onso bua kutumbisha Nzambi.’ (1 Kol. 10:31) Nunku yonso wa kutudi udi ne bua kudimona bu Ntemu wa Yehowa wa ku dîba ne ku dîba. Abi nebikale ne buenzeji buimpe mu midimu yetu yonso.
3 Tukonkonone malu aa: Mvuadilu wetu, mêyi etu ne bikadilu bietu bidi mua kumuenesha kudi bakuabu ne: tudi Bantemu ba Yehowa. Tudi bamanye mushinga wa kuikala ne mvuadilu mudipope, mêyi makezuke ne bikadilu bimpe patudi tuyisha anyi patudi tubuela mu bisangilu bia bena nkristo. Nunku, nansha bikala mu kalasa, ku mudimu anyi mu dijikija lutetuku, malu onso adi ne bua kuleja ne: tudi tunemeka mêyi-makulu makane a Yehowa mu nsombelu wetu.
4 Yezu wakamba ne: “Tshimenga tshiasa kulu kua mukuna kabena mua kutshisokoka. . . . Ke mudi butoke buenu ne bua kutokesha ku mesu a bantu bonso, bua bamone malu enu mempe, batumbishe Tatu wenu udi mu diulu.” (Mt 5:14-16, MMM) Ebi bidi ne bua kumueneka mu malu onso atudi tuenza, mu tshikondo tshionso. Bituamona se: katuena badiakaje bua kufila bumanyishi bilondeshile muaba utudi peshi bitudi tuenza, tudi ne bua kudiebeja ne: ‘Ndi nsadila Yehowa ku dîba ne ku dîba anyi mu mêba makese?’ Katudiumvu nansha kakese benzeja ku makanda bua kupitshisha mpunga kampanda wa kuakula ne bantu bua lumu luimpe lua Bukalenge bua Nzambi!
5 Tuvulukayi ne: tudi tutumbisha Yehowa ne tumusankisha bituikala mua kuandamuna kakuyi dielakana ne: “eyowa!” ku lukonko lua se: “Udi Ntemu wa ku dîba ne ku dîba anyi?”