Tuabanyayi Bikole Ngumu Ya Bukalenge No. 35
1 Netuikale Bonso Badine Mu Mudimu Mu Ngondo Wa Kasuabanga Ne Wa Tshisua-munene. Mu Matuku 8 A Kumpala A Mu Kasuabanga, Netufile Tshibumba Tshia Nsentedi Ne Réveillez-vous ! Pashishe, Kutuadijila Mu Dia Lumingu Dia 9 Kasuabanga Too Ne Mu Dia Lumingu Dia 14 Tshisua-munene, Netuditue Mu Diabanya Dia Ngumu Ya Bukalenge No. 35 Pa Buloba Bujima. Netuikale Ne Disanka Dia Kumanyisha Mukenji Wa Mushinga Kudi Bantu Bonso Ba Mu Teritware Wetu. Mukenji Eu Udi Wandamuna Ku Lukonko Elu: “Bantu Bonso Nebananganganaku Anyi?” Mu Kampanye Aka Ka Pa Buaku, Netuabanye Ngumu Ya Bukalenge Mu Matuku A Munkatshi Mua Lumingu; Mu Matuku A Ku Ndekelu Kua Lumingu, Netusakidileku Nimero Ya Bibejibeji Bia Ndekelu.
2 Nnganyi udi mua kuditua mu mudimu eu? Bakulu nebikale ku mutu kua mudimu eu, bu mutubu benza pa tshibidilu. Muntu yonso udi usanka bua kuabanya Ngumu ya Bukalenge, ne kakuena mpata nansha mikese bua se: bamanyishi bavule nebangate mudimu wa bumpanda-njila buambuluishi mu ngondo umue peshi ibidi yanenga kampanye aka. Bamanyishi bakuabu nebanyishe bua kupitshisha mêba a bungi mu mudimu eu kupita mutubu benza pa tshibidilu.
3 Tudiku tulonga ne muntu ukadi muele tshidia tshinene mu dilonga dia mukanda wa Dimanya ne ukadi pa kukumbaja malu-malomba bua kupatuka mu buambi anyi? Pamu’apa udi mua kulua mumanyishi ukena mutambule bangabanga ne kampanye kutuadijaku bua kudituamu. Tshionso tshidi tshikengela bua kufila Ngumu ya Bukalenge, ndileja dipepele. Tshilejilu udi mua kuamba ne: “Mukenji eu ng’wa mushinga mukole ne mmumanyisha pa buloba bujima mu miakulu 169 ngondo eu. Ndi musue kukushila diebe dibeji dia nkayebe.” Nansha bana batekete badi pabu mua kudifila mu mudimu eu musanguluji.
4 Balombodi ba dilonga dia mukanda nebakankamije bena mu tusumbu tuabu bonso bua kudifilabu tshishiki mu diabanya dia Ngumu ya Bukalenge No. 35. Pamu’apa kudi mua kuikala kabidi bamanyishi bakadi batekete mu mudimu ne badi mua kupetulula bukole bikalabu babakankamije bu mudibu bajinga. Nunku, bangabanga ne kampanye aka kutuadijaku, bakulu badi ne bua kukumbula yonso wa ku bamanyishi aba bua kumona mushindu wa kubambuluisha bua kuyabu ne bamanyishi bapiluke mu tshitupa etshi tshia mudimu.
5 Ndîba kayi ditudi mua kudisangisha bua buambi? Mudimu eu udi ukengela bua se: balongolole bisangilu bia mudimu wa buambi mu bikondo bikumbane ne biakanyine. Misangu yonso ikalaku mushindu, nebalongolole bisangilu bia mudimu wa buambi dituku dionso dia mu lumingu, ku ndekelu kua lumingu ne ku dilolo. Badi ne bua kubienza mu bikondo bidi bamanyishi ne bampanda-njila mua kumona mushindu wa kutumika tshishiki ne dîba difila mu buambi. Badi kabidi mua kuenza bisangilu ebi mu mapingaja bua bansonga badi baya mu tulasa, bena mudimu ne bakuabu. Mutangidi wa mudimu neatabalele bua kuikale teritware mikumbane bua buambi bua ku nzubu ne ku nzubu ne teritware ya bungenda, bua muntu yonso enze mudimu eu tshishiki. Miaba idi bamanyishi bavule basombele, netuleje busunguluji pa kubenga kuikala ba bungi mu tshitupa kampanda tshia teritware bua kuyisha.
6 Netuenze tshinyi bua bantu badi kabayi ku mabu? Dijinga dietu ndia kupetangana ne bantu ba bungi bua kubumvuija bua tshinyi badi ne bua kubala Ngumu ya Bukalenge No. 35. Pikala ku nzubu kuudi ukokola kakuyi muntu, funda adrese ne walukile dîba dikuabu mu dituku adi. Bikala madikolela ebe menza bua kupetangana ne bantu abu kaayi mapatule bipeta bimpe lumingu lua ndekelu lua kampanye, udi mua kushiya dibeji dia Ngumu ya Bukalenge ku tshiibi, utabalela bua se: bapitshi ba njila kabadimonyi. Mu turtié mudi bantu basombele, wikale ne nzanzu bua kufila Ngumu ya Bukalenge kudi bantu badi bapita mu musesu. Biwikala uyisha mu bitupa bidibu badima madimi ne pikala teritware mualabale ne kakuyi mushindu wa kumunyunguluka yonso mu tshikondo tshia kampanye, udi mua kushiya dibeji dia Ngumu ya Bukalenge ku nzubu kudi kakuyi bantu anu mu dikumbula dietu dia kumpala.
7 Tshipatshila tshietu ntshinyi? Bisumbu bidi ne bua kudienzeja bua kuabanya Ngumu ya Bukalenge yonso ikalabi bipeta mu teritware wabi mujima kumpala kua kampanye kujikaku, mu dia 14 Tshisua-munene. Pikala teritware wa tshisumbu tshienu muikale mualabale ne kakuyi njiwu bua kuyisha nkayebe pamutu pa kuya babidi, newanyishe pamu’apa bua kupatuka nkayebe. Ebi nebituambuluishe bua kumanyisha lumu luimpe kudi bantu bavule badi banyishe kuluteleja. (Mat. 10:11) Bidi mua kuikala bia meji bua kuambula ndambu wa trakte ku bianza ne Bible muela mu tshibombi peshi mu kabuta ka ku bianza, pamutu pa kuambula tshibuta tshinene. Uvuluke bua kutabalela bimpe dijinga dijula.
8 Tudi pabuipi bua kutuadija anyi? Bakulu nebadianjile kujadika bungi bua bibejibeji bia pa mutu biakengela tshisumbu ne nebenze dilomba bua bualu ebu. Kabiena bikengela kuenza dilomba dia Ngumu ya Bukalenge bualu nebalongoluele tshisumbu tshionso diatshi dibuki. Bampanda-njila ba pa buabu, ba pa tshibidilu ne bambuluishi nebapete muntu ne muntu trakte 250 ya diabanya, ne bamanyishi nebayipete 50 ku muntu. Tudi ne mudimu wa bungi. Tudiku ne muoyo kulukulu bua kuditua mu mudimu eu musanguluji anyi? Kakuyi mpata! Nenku tumuangalajayi bikole menemene mukenji wa mu Bible wa Ngumu ya Bukalenge No. 35!