Tshiibi Tshinene Tshia Mudimu Ntshiunzulula

¹ Paulo, mumanyishi wa lukunukunu wa lumu luimpe, wakakeba teritware muvua dijinga dinene. Tshimenga tshia Efeso tshivua tshimue tshia kudiyi. Paulo wakapatulamu bipeta bimpe bitambe, biakamufikisha ku difundila bena nkristo nende ne: “Bakumana kungunzuluila tshibi tshinene ne tshia kuenza mudimu mukole.” (1 Kol. 16:9) Wakatungunuka ne mudimu wende mu teritware eu ne, ku diambuluisha diende, bena Efeso bavule bakalua bena kuitabuja.​—⁠Bien. 19:1-20, 26.

² Lelu’eu, tshiibi tshinene tshia mudimu ntshitunzuluila. Mbatulombe bua kukuatshisha bisumbu bidi kabiyi bifika ku ditumika bikole ne kujikija teritware yabi tshidimu tshionso. Nunku, ku madikolela etu, tudi mua kukumbaja dijinga didi mu bimue bimenga.​—⁠Tangila 2 Kolinto 8:13-15.

³ Tudiku mua kusadila miaba idibu bakengela bamanyishi bavule anyi? Ukadiku mukonkonone mu disambila bualu bua diya kusadila muaba mukuabu anyi? Pamu’apa tshisumbu kampanda tshia mu tshimenga tshietu tshidi tshikengela diambuluisha. Ambila mutangidi wa tshijengu bualu ebu ne neakupeshe mibelu. Pamu’apa kabidi teritware wa tshisumbu tshietu udi ne bantu bapite bungi batu kabayi ne lumvu luimpe anyi badi bakula muakulu muenyi ne kabayi banji kupeta diambuluisha. Ne udiku mua kuenza madikolela bua kulonga muakulu wabu bua kuandamuna ku dijinga edi anyi? Kupita apu, pamu’apa kukadi kasumbu kampanda anyi tshisumbu tshia muakulu muenyi pabuipi netu, tshidi ‘tshilomba Mukalenge bua kupeta bena mudimu bavule ba Bukalenge.’ (Mat. 9:37, 38) Pikalabi nanku, tudiku mua kufila dietu diambuluisha anyi?

⁴ Mu bidimu bidi panshi ebi, mêku a bena nkristo binunu ne binunu mmâse mu matunga makuabu bua kudifila bikole mu mudimu wa dinowa. Mona tshidi bena dibaka kampanda, bakadi bapite mu nsombelu eu bamba: “Tuvua tujinga kusadila Yehowa muaba utudi mua kutamba kufila dikuatshisha.” Bituikala ne mushindu kabidi ne dijinga dia kumuangala bua kuya munkatshi mua ditunga dietu peshi bituikala ne mushindu wa kusadila mu matunga menyi, kumpala kua bionso tuyukile ne bakulu ba mu tshisumbu bua mapangadika etu.

⁵ Biwasua kupeta mamanyisha kudi Société bua miaba idibu bakengela bamanyishi bavule, umvuija mu tshikoso dijinga diebe mu mukanda uwapesha komite wa mudimu wa tshisumbu tshienu. Komite eu neasakidileku amue mumvuija ne neatumine Société mukanda webe. Nansha bia munyi, ne bu mutshidi tshiibi tshinene tshia mudimu tshiunzulula, tuikalayi misangu yonso badine bonso mu mudimu wa Yehowa.​—⁠1 Kol. 15:58.