Tutabalelayi Bena Dibaka Badi Kabayi Bantemu
1 Ndisanka kayipu dia kumona bena mabaka mu buobumue mu ntendelelu mulelela! Pabi, mu mêku mavule, anu muena dibaka umuepele ke udi muitabe njila wa bulelela. Mmunyi mutudi mua kuenza bua kutabalela bena mabaka badi kabayi Bantemu ne kubakankamija bua kusadilabu Yehowa pamue netu?—1 Tim. 2:1-4.
2 Tumvue tshidi lungenyi luabu: Mbulelela se: bamue bena mabaka badi kabayi Bantemu badi ne buluishi. Kadi, kalèngù ne dipanga kumvuangana ku mêyi ke bitu misangu mivule mpokolo wa malu onso aa. Muntu udi mua kudiumvua bu bamupue muoyo anyi kumvua mukawu bua bipatshila bipiabipia bia mu nyuma bia muena dibaka nende. Mulume kampanda udi uvuluka ne: “Pamvua nkayanyi mu nzubu, mvua ndiumvua bu ne: mbandekele.” Mukuabu udi wamba ne: “Mvua mmona bu se: mukajanyi ne bana banyi mbannyeme.” Bantu balume badi mua kuela meji ne: badi bajimija mêku abu anu bua tshitendelelu. (Tangila Tshibumba tshia Nsentedi tshia dia 15 Tshimungu 1990, mabeji 20-3, mu Mfual.) Ke bua tshinyi mbimpe, pikalaku mushindu, bua kusaka mulume bua adisangishe pende ku diyukidilangana padi mukajende utuadija dilonga dia Bible.
3 Tueleshangane maboko: Mulume kampanda ne mukajende, bubidi buabu Bantemu, bakambuluisha bena mabaka bua kufika ku bulelela mu dieleshangana maboko mu mushindu wa dipatula bipeta bimpe. Diakamue pavua muanetu wa bakaji utuadija kulonga ne mukaji, muanetu wa balume uvua ukumbula mulume. Misangu mivule, uvua ufika ku dituadija kulonga ne mulume.
4 Tuikale bena bulunda: Mu tshisumbu, mêku adi mua kuenza tshiawu tshitupa mu ditabalela mêku adi kaayi manji kuikala mu buobumue mu ntendelelu mulelela. Ku diambuluisha dia amue makumbula a bulunda, muena dibaka udi kayi Ntemu neamone se: Bantemu ba Yehowa badi ne musangelu, mbena nkristo badi batabalelangana ne baditatshisha bua diakalenga dia bakuabu.
5 Ku musangu ne ku mukuabu, bakulu nebikale mua kuangata ne mushinga madikolela menza tshikondo kampanda bua kutabalela bena mabaka badi kabayi Bantemu ne tshidibu mua kuakaja ne ditekemena dia kubakoka kudi Yehowa.—1 Pet. 3:1, note.