Tshisumbu tshienu tshidi ne teritware munene anyi?
1 Yezu wakayisha bikole mu ditunga dionso dia Isalele wa kale, kubangila mu bimenga bia Yudaya too ne mu misoko ya mu Galela. (Mâko 1:38, 39; Luka 23:5) Tuetu petu tudi ne bua kumanyisha bantu ba bungi batudi mua kupeta lumu luimpe. (Mâko 13:10) Kadi imue misangu bidi mua kutukolela. Bua tshinyi?
2 Bisumbu bia bungi bia mu États Unis bidi ne teritware idi mikale tu-misoko tua pale pale tutangalaka mu tshipapu tshia kilometre ya bungi. Bisumbu bidi bienza bisangilu mu muakulu muenyi bidi mua kuyisha mu turtié tua mu tshimenga tudi ne bantu ba bungi, kukebamu bantu badi bakula muakulu au. Tshia kuenza ntshinyi bua kuambuluisha bantu badi basombele miaba ya nunku bua bamanye bulelela pa bidi bitangila Yehowa, Yezu ne Bukalenge?
3 Didilongolola bimpe: Mutangidi wa mudimu ne musadidi udi utangila malu a teritware badi ne bua kulombola malu aa bilenga mu tshisumbu bua bipeta bimpe kupatukabi. Pamuapa, nudi mua kulongolola amue matuku a Disambombo adi bamanyishi ba bungi ne mushindu wa kuyisha dituku adi dijima. Panudi nuya kuyisha mu teritware ya kule, nulongolole bua kuenzamu dituku adi dijima padiku mushindu, kanupu muoyo bua kuya ne biakudia binudi mua kudia mu midi. Nudi mua kuenza tshisangilu tshia mudimu wa buambi kumpala kua dîba dinutu nutshienze pa tshibidilu bua kushiya ndambu wa dîba dikuabu dia kuenza luendu bua kufika mu teritware munudi nuya anyi nudi mua kuya kuenzela tshisangilu etshi pabuipi ne muaba unudi nuya bua kuyisha. Panudi nujinga bua kuya kuyisha ku misoko idi kule, nulongolole bua kuya mu tshikondo tshidi kuulu kuimpe ne njila kayiyi ne lutatu.
4 Aba badi benza mudimu mu teritware mudibu bakula muakulu muenyi, bua kubenga kujimija dîba patupu, mbimpe bikale ne liste mupiamupia wa mêna a bantu ne adrese yabu ne karte kadi kaleja tshitupa atshi. Nulongolole teritware bua se: tusumbu tuenza mudimu dituku adi tumone mua kutangila bantu bonso badi mu tshitupa atshi.
5 Kanupu muoyo bua kuangata mikanda bungi bukumbane. Bikala bamanyishi benzela mudimu mu teritware eu anu mu mpukapuka, bidi mua kuikala biakane bua kushila bantu badi kabayi ku nzubu trakte anyi nimero umue wa tshibejibeji tshia kale. Bikala trakte wa Aimeriez-vous en savoir plus sur la Bible? muikaleku mu muakulu wenu, nudi mua kupesha muntu yonso unudi nupeta ne kumushila bantu badi kabayi ku nzubu.
6 Eleshanganayi diboko: Kuenza mudimu mu teritware mualabale kutu kulomba bua muntu yonso mu tshisumbu eleshangane diboko ne bakuabu. Pikalabi bilomba bua kuenza luendu ku mashinyi ne kufuta makuta a bungi, bantu badi baya badi mua kusangisha makuta bua kumona mua kusumba kasolonyi ka kuela mu mashinyi. Ikale ne busunguluji nansha biwikala mupete bantu badi ne muoyo wa kuyikila nenu. Bualu tshiudi ne bua kumanya ntshia se: bidi bikengela kuyisha bantu bonso mu teritware webe ne kabidi uditeke pa muaba wa bakuebe banudi benze nabu luendu badi bakuindile mu mashinyi. Biwikala musue kutungunuja diyuki katantshi ne muntu udi muanyishe bulelela, kanuenaku mua kumanyisha bakuabu bua batungunuke pabu ne kuyisha mu mutantshi au pamutu pa kubimanyika patupu anyi?
7 Nupangadije bua kupinganyina muntu yonso udi muleje dijinga dia kumanya bia bungi. Pa kumbusha adrese ya bantu ya ku nzubu, udi mua kubebeja nimero ya telefone bua upete mushindu wa kubayishila nansha ku nshinga. Bikala njila kayiyi ne mêna anyi nzubu kayiyi ne nimero, mbimpe kuzola karte biakane anyi kufunda bimanyinu biakuambuluisha bua kumanya kumbelu kua muntu udi muanyishe bulelela dîba diwamupinganyina.
8 Ndiakalenga kayipu ditudi nadi dia kukumbaja mêyi a Yezu aa: ‘Panuabuela mu tshimenga anyi mu musoko mukese, nukebe bantu bimpe badimu, nushikamemu too ne panumukamu’! (Mat. 10:11) Kakuyi mpata, Yehowa neabeneshe bionso bitudi tuenza bua kudifila muetu muonso mu mudimu eu udi utusankisha bikole!