Udi ne teritware webe nkayebe anyi?

1. Teritware wa muntu nkayende ntshinyi?

¹ Teritware webe nkayebe ngudibu bakupesha bua kuenzelamu mudimu. Udi mua kuikala muaba muimpe bua wewe kufikamu ne lukasa, ne kuyisha wewe nkayebe anyi ne mumanyishi mukuabu. Nansha mudibi ne mushinga bua kunemeka programe udi tshisumbu tshienza bua kuyisha pamue paudi ne mushindu, kuikala ne teritware webe nkayebe wa kuenzela mudimu bikondo bikuabu kudi mua kukuambuluisha bua kuyisha bikole, nangananga padi tshisumbu tshienu ne teritware munene.​—Bien. 10:42.

2. Ngamue malu kayi mimpe atudi tupeta patudi ne teritware wetu nkayetu?

² Masanka: Bamue bamanyishi mbamone ne: mbimpe kabidi kuyisha mu teritware wabu nkayabu pabuipi ne muaba wabu wa mudimu dîba dia dikisha anyi diakamue padi mudimu wabu ujika. Bakuabu badi basanka bua kuyisha pamue ne bena mu dîku diabu mu teritware udi pabuipi ne kuabu bua dîba nansha dimue kumpala kua Dilonga dia Mukanda dia Tshisumbu. Makumbula ne malonga a Bible adibu bapeta neikale pabuipi ne ku nzubu, ne nenku kabiakubalomba bukole bua bungi, dîba ne kutula makuta to. Bu mutudi mua kuenza malu a bungi mu dîba dikese, kuikala ne teritware wetu nkayetu kudi mua kuambuluisha bamue bamanyishi bua kuikala bampanda-njila bambuluishi ku musangu ne ku mukuabu anyi kuikala nansha bampanda-njila ba pa tshibidilu. Kuyisha mu teritware wetu nkayetu nekutufikishe ku dibidilangana ne bantu badimu ne nebatuadije kutueyemena. Bualu ebu nebutuambuluishe bua kushindamena pa malu adi abatangila ne nunku kulengeja mudimu wetu.

3. Ntshinyi tshivua mpanda-njila mukuabu mupete pavuaye mutuadije kuyisha mu teritware wende nkayende?

³ Tshilejilu, mpanda-njila mukuabu uvua mutangidi wa tshijengu mubele bua kuikala ne teritware wende nkayende udi wamba ne: “Ngakalomba teritware ne mutantshi mukese pashishe meme kuibidilangana ne bantu bavuamu ne kulua mulunda wabu. Meme kuakaja dîba dimvua nya bua kubatangila bilondeshile dijinga diabu. Bua bualu ebu, bungi buanyi bua makumbula mapiamapia buakabanda, kumbukabu ku 35 kuya too ne ku 80 ku ngondo, ne meme kubanga kulonga ne bantu muanda mutekete.”

4. Mmushindu kayi uudi mua kupeta teritware webe nkayebe ne kuenzamu mudimu?

⁴ Mua kumupeta: Wewe musue kupeta teritware webe nkayebe, udi mua kulomba musadidi udi utangila malu a teritware. Kutshinyi bua kulomba mumanyishi mukuabu bua akufile mu teritware webe, ne wikale ufunda nzubu ya bantu baudi kuyi usangana to. Udi ne bua kuteta bua kujikija teritware mu ngondo inayi. Biobi bikukolele, udi mua kulomba mutangidi wa Dilonga dia Mukanda dia Tshisumbu anyi bamanyishi bakuabu bua bakuambuluishe. Panyima pa ngondo inayi, udi mua kupingaja teritware uudi mujikije anyi kulomba bua kuenzamu kabidi mudimu. Tshidibi, kuena ne bua kulama teritware au kashidi to, mbimpe umupingaje bua bakuabu bamone pabu mua kumulomba. Pikala tshisumbu tshienu ne teritware mukese, ne kakuyi mushindu wa kupeta teritware webe nkayebe, udi mua kulomba katupa ka teritware kudi mutangidi wenu wa dilonga dia mukanda.

5. Tudi ne bua kuenza tshinyi bua kuenza mudimu udibu batupeshe wa kuyisha bimpe?

⁵ Mudimu utudi bapete wa kuyisha ‘bantu bonso ba pa buloba’ mmudimu mukole be! (Mat. 24:14) Udi ulomba kudilongolola bimpe. Patudi tuyisha ne tshisumbu ne mu teritware wetu nkayetu kabidi, bidi bituambuluisha bua kufikisha lumu luimpe kudi bantu ba bungi menemene.