Lumu Luimpe Lufidila Ku Internet

Mu tshikondo etshi tshia dilubuluka mu malu a biamu, bamue bantu batu bapetela mamanyisha ku biamu bia elektronike bu mudi Internet (ordinatere mituangaja ne nshinga). Ke bua tshinyi Société mmulongoluele bantu badi batumika ne Internet mamanyisha majalame pa mitabuja ne midimu ya Bantemu ba Yehowa.

Adrese wa tshitekelu tshietu pa Internet udi http://www.watchtower.org. Udi uleja trakte misungula, ne broshire pamue ne biena-bualu bia mu Tshibumba tshia Nsentedi ne bia mu Réveillez-vous ! mu Anglais, Mfualansa, tshiena-Allemagne, tshiena-Chine (tshitekesha), tshiena-Espagne, tshiena-Russie ne miakulu mikuabu kabidi. Mikanda idi mu tshitekelu etshi tshia mu ordinatere ng’eyi ikadi nayi bisumbu ne idibu bamuangalaja mu mudimu wa buambi. Nenku, tshipatshila tshia tshitekelu tshietu ki ntshia kupatula bintu bipiabipia, kadi ntshia kupetesha bantu mamanyisha ku diambuluisha dia ordinatere. Kabiena bikengela bua umue wa kutudi pa nkayende alongolole mamanyisha a bungi pa Bantemu ba Yehowa, pa midimu yetu ne mitabuja etu mu Internet. Tshitekelu tshietu tshilongolola kudi Société tshidi tshifila mamanyisha majalame adi muntu yonso mua kupeta.

Nansha mudi tshitekelu tshietu katshiyi tshienza bua kupeta mikenji mitumina ku ordinatere (E-mail), kadi tshidi ne liste wa adrese ya filiale ya pa buloba bujima. Nunku bantu badi mua kufundila umue wa ku filiale eyi mu adrese wende bua kupeta mamanyisha makuabu anyi bua kupeta diambuluisha dia pa nkaya kudi Bantemu ba Yehowa ba mu musoko wabu. Katuelakanyi bua kumanyisha adrese wa Internet muleja kuulu eku kudi muntu yonso wikala ne dijinga dia kumanyina malelela a mu Bible ku njila eu.