Nengambe Tshinyi?

 Patutu tupetangana ne bantu badi baleja disankidila mu mudimu wa buambi, tutu tujinga kubamona tshiakabidi bua kubapesha bumanyishi bukumbane. Kadi, bidi mua kutufikila ne: tupange tshia kuamba bua kutuadija kuyukila. Pamu’apa tudi mua kuteta ngenzelu eu: kujula lukonko ludi lusonsola ntema, pashishe kuleja diandamuna dia mu Mifundu mu mukanda wa Comment raisonner. Kakuyi mpata, netumone se: bidi ne mushinga bua kuikala ne liste wa nkonko, mutuikala mua kusungula eyi idi imueneka ne: idi mua kusonsola bikole disankidila dia muntu mu dikumbulula. Liste wa nkonko idi ilonda eyi, muangata mu mukanda wa Comment raisonner, udi uleja mabeji adi ne mandamuna:

◼ Tudi ne bua kuya mu diulu bua kupeta diakalenga dilelela anyi? (62)

◼ Tudi ne tubingila tujalame bua kuitabuja Nzambi anyi? (106)

◼ Nzambi udi bushuwa uditatshisha bua nsombelu wetu anyi? (107)

◼ Bua tshinyi bidi ne mushinga bua kumanya ne kutumika ne dîna dia Nzambi? (200)

◼ Bua tshinyi bubi mbutule bupuwa pa buloba? (237)

◼ Bua tshinyi tudi tukulakaja ne tufua? (253)

◼ Bua tshinyi kudi bitendelelu bungi nunku? (310)

◼ Mmushindu kayi utudi mua kumanya tshitendelelu tshilelela? (316)

◼ Ntshinyi tshienza Bukalenge bua Nzambi? (336)

◼ Satana udiku ne buenzeji bukole pa bulongolodi ebu anyi? (368)

◼ Bua tshinyi Nzambi mmulekele dikenga? (375)

◼ Muoyo wa muntu udi ne tshipatshila kayi? (434)

 Tudi mua kulama liste wa nkonko ya nunku mu Bible wetu anyi mu mukanda wetu wa Comment raisonner bua kutapamu dîsu ne lukasa luonso. Bituikala balame mu lungenyi bualu bujalame bua kuamba mu makumbulula etu, nebitukankamije bua kulondakaja ne lulamatu disankidila dionso.