Tudifilayi Ku Budisuile

¹ Mufundi wa misambu Davidi wakamanyisha mu mulayi ne: bantu ba Yehowa ‘nebadifile ku budisuile,’ mmuomumue ne: nebadifile bu “bena budisuile ne lukasa luonso.” (Mus. 110:​3, NW, note) Kakuyi mpata, ke tshidi tshienzeka mu tshinsanga tshia bana betu pa buloba bujima. Mu tshionso tshia ku bidimu bia mudimu binayi bishale ebi, bantu ba Yehowa bavua benze mêba mapite pa muliyare mujima bua kumanyisha lumu luimpe lua Bukalenge. Ku luseke lukuabu, pa kumbusha mudimu wa bumanyishi ne eu wa dienza bayidi, tudi ne mishindu mivule ya kudifila ku budisuile bua kuambuluisha muntu netu.       

² Mu nsombelu itudi mua kudileja bena budisuile: Bidi mua kuikala se: bamue bena mu tshisumbu badi bakengela diambuluisha bua kuya mu bisangilu. Bua tshinyi kubenga kubalomba bua kuya pamue nabu? Bakuabu badi pamu’apa basama, balema peshi mu lupitadi. Tudiku mua kuangata dipangadika dia kubakumbula peshi kubambuluisha mu mushindu umue ne mukuabu anyi? Muanetu kampanda, peshi dîku kansanga badi pamu’apa bakengela makankamija. Tuvuaku bele meji bua kumubikidisha bua adisangishe pamue netu imue misangu mu dilonga dietu dia mu dîku anyi? Mpanda-njila kampanda peshi mumanyishi kansanga udi pamu’apa ukengela muntu wa kumufila mu buambi. Bua tshinyi kubenga kumulomba bua kutumika pamue nende? Ke imue nsombelu mutudi mua kuenzela aba badi balela betu mu ditabuja malu mimpe ku budisuile.​—⁠Gal. 6:⁠10.

³ Bana betu ba balume badi mua kuleja dijinga diabu bua batumike nabu mu bulongolodi bua Yehowa pa kudienzeja bua kukumbaja malu malomba a bakulu ne basadidi ba mudimu. (1 Tim. 3:​2-10, 12, 13; Tito 1:​5-9) Bu mutudi tuvula anu kuvula, tudi tukengela bana betu ba balume bakumbane badi badiakaje bua kufila tshilejilu mu mudimu wa buambi ne wa dilongesha, kabidi ne mu mudimu wa bulami wa mu bisumbu.​—⁠1 Tim. 3:⁠1.

⁴ Bamue ba kutudi badi pamu’apa ne mushindu wa kudipetesha dîba divule bua mudimu wa Yehowa pa kuikala bampanda-njila bambuluishi ku musangu ne ku musangu. Peshi kabidi, pa kutuala amue mashintuluka ne butshintshikidi mu programe wetu, pamu’apa tudi mua kuikala bampanda-njila bambuluishi mu mushindu mutungunuke peshi bampanda-njila ba pa tshibidilu. Nsombelu wetu neatupetesheku mushindu wa kuya mu rejon mudi diambuluisha divule dikengedibua anyi? Tudiku mua kudiakaja bua kusadila ku Betele ne kufila buludiludi dietu dikuatshisha ku dilubuluka dia mudimu wa pa buloba bujima anyi? Mudimu munene udi wenjibua udi utangila diasa dia Nzubu ya Bukalenge, Nzubu ya mpuilu ne ya Betele pa buloba bujima, ne ebi bidi bilomba bungi buvule bua bena mudimu bena budisuile. Aba badi badifila ku budisuile bua kuenza midimu eyi mitambe bulenga mbanyishibue bikole ne mbabeneshibue bia bungi.​—⁠Luka 6:⁠38.

⁵ Tudi mu tshikondo tshia dikema. Ku diambuluisha dia spiritu wende, Yehowa udi ukumbaja mudimu munenanenayi pa buloba ku butuangaji bua basadidi bende bena budisuile! Misangu yonso idi Yehowa utubikila, ku butuangaji bua bulongolodi buende, bua tutambe kudifila mu mudimu wa Bukalenge, nebikale bimpe tudiebeje ne: ‘Ntu ndifilaku misangu yonso ku budisuile anyi?’ Pashishe tudi ne bua kukonkonona mu disambila mutshima wetu ne nsombelu wetu. Bulamate buetu kudi Nzambi nebutusake bua kuenza muetu muonso mu mudimu wa tshijila, tusankisha nunku mutshima wa Yehowa tshishiki.​—⁠Sef. 3:⁠17.