Tusankayi Bua Didiunda Didi Nzambi Utupetesha

¹ Bena nkristo ba mu siekele wa kumpala bavua bamanyishi ba Bukalenge ba lukunukunu. Bavua basanka pavua ‘[“bisumbu,” NW ] bivulangana ku dituku ku dituku.’ (Bienz. 16:5) Bumanyishi buabu bua dikima buakatangalaka mu Azi, ku Mputu ne mu Afrike, ke tshiakakebesha dinowa dinene dia bena kuitabuja.   

² Yezu wakamanyisha ne: mu matuku a ku nshikidilu mudimu wa bumanyishi neulenge ‘buloba buonso buasa ne matunga onso’! (Mat. 24:​14, NW) Mu tshidimu tshia mudimu tshia 1996, tuvua bapete luapolo mifume mu matunga mashilashilangane pa buloba bujima ivua ileja didiunda dinene ne bungi bubandile bupiabupia bua bamanyishi. Bisumbu bivule bivua biashibue. Bua didiunda edi dia lukasa, bidi bikengela kuasa nkama ya Nzubu ya Bukalenge ne Nzubu ya mpuilu ne kabidi kudiundisha nzubu ya filiale mivule.

³ Mudimu wetu wa Bukalenge wa Tshimungu 1996 uvua muakule bua mudimu munene wa luibaku udi wenzeka mu Afrike. Mbia mumue kabidi mu Amerike latine. Bua tshidimu tshia mudimu tshia 1996, Mexique mmufile luapolo lua bungi bubandile budi bukemesha bua bamanyishi 470 098 ne muayene wa malonga a Bible wa 600 751, ebi biakalomba diasa dia bisumbu bipiabipia 466! Mbalongolole bua didiundisha dia nzubu ya filiale ya ku Mexique dijike ku ndekelu kua 1998. Bu mudi didiunda dia muomumue dimueneka mu matunga makuabu mavule, kudi tshikondo tshionso mudimu wa luibaku lua teokrasi udi wenzeka.

⁴ Miaba yonso mfranga mitula bua luibaku mmipite bungi, ne mu matunga mavule bana betu badi ne dimona dikese dia bintu bia ku mubidi. Kadi, bikale ne lukunukunu luteme bua mudimu wa Yehowa, badi kakuyi mpata badiunda mu nyuma ne bavula anu kuvula. Nsumuinu 28:27 (MMM) udi utujadikila ne: Eu “udi upesha bapele bintu kakubuela mu dikenga.” Bu mutudi badiakaje bua kukuatshisha ne mfranga midimu eyi ya luibaku, netuambuluishe bua “diakanangana” dienzeke mu malu a bintu. Nenku, muntu yonso neikale ne diakalenga dia kufila ne disanka dia kumona didiunda didi Yehowa utupetesha!​—⁠2 Kol. 8:14, 15; Bienz. 20:⁠35.

[Captions on page 4]

Filiale wa Paraguay

Nzubu idi yashibua ya filiale wa Uruguay

Filiale wa Équateur

Nzubu mipiamipia ya filiale wa Mexique

Filiale wa République dominicaine

Nzubu mipiamipia ya filiale wa Brésil

[Caption on page 5]

Nzubu ya Bukalenge bilejilu bia nzubu ya mushinga mukese mu Amerike latine

1. Brésil, 2. Nicaragua, 3. Chili, 4. Colombie, 5. Mexique

6. Brésil, 7. Pérou, 8. Venezuela, 9. Mexique