Bisangilu bia Mudimu bua Luishi

Lumingu lua dia 2 Luishi

Musambu 10

Min.  8: Mamanyisha. Mamanyisha makumbanyine a mu Mudimu wetu wa Bukalenge.

Min. 17: Tudilongolole bua kubuela mu mpungilu wa distrike wa 1998. Dikonkonona dia tshisakidila tshia Mudimu wetu wa Bukalenge wa Luishi 1998 kudi sekretere, mu nkonko ne mandamuna. Anu mudi tshiena-bualu tshizangika, ela kashonyi pa tubingila tua mu Bible tudi tutusaka bua kulonda mêyi-mashidimunyi a Société pa bidi bitangila miaba ya kulala. Ela ka-lumbandi kudi bana betu badi bafila dikuatshisha bua mapangadika adi Société wangata bua miaba ya kulala.

Min. 20: Tudilongolole biangatshile ku mpindieu bua kunemeka mukenji wa Nzambi pa mashi. Mukulu mukumbane udi uleja mushinga wa diuuja karte ka: “Instructions médicales/​Pas de sang.” Mêyi mafunda ku spiritu adi mu Misambu 19:7 adi aleja ne: dîyi-dilombodi difila mu Bienzedi 15:28, 29 mmukenji mupuangane wa Nzambi pa mashi. Batendeledi bende ba lulamatu badi badienzeja bua kuunemeka. Mikanda eyi idi imanyisha disua dietu dishindame pa bualu ebu ne yakula pa muaba wetu patudi katuyi ne mushindu wa kuakula. (Tangila Nsumuinu 22:3.) Karte kapiakapia aka kadi kambuluisha bua kufila dimanyisha dipiadipia pa bidi bitangila dibenga mashi. Panyima pa tshisangilu, Bantemu batambule badi banyishe nebapete karte kapiakapia, ne aba badi ne bana bashadile badi kabayi banji kutambula nebapete karte ka bumuntu bua muana yonso. Kanutuuji diakamue. Nenuujile kumbelu ne mankenda onso, kadi KANUTU BIALA NANSHA. Ditua tshiala kudi muena karte, mêna a bajadiki ne dituku nebifundibue pa tuarte tuonso ku ndekelu kua dilonga dia mukanda dialonda, ku buludiki bua muanetu utu ulombola dilonga. Ebi nebiambuluishe bua kujadika ne: bonso badi bajinga kulonda dîyi-dishidimunyi edi dia luondapu badi bapeta diambuluisha didibu bakengela. Aba badi batua biala bu bajadiki badi ne bua kumona mudi muena karte aka utuapu tshiende tshiala. Mu Tshisangilu tshia mudimu tshidi tshilonda, balombodi ba dilonga dia mukanda anyi bakulu nebafile diambuluisha diabu kudi bonso bavua kabayiku mu dilonga dia mukanda kadi bikale ne dijinga dia kuuja ne kutua tshiala pa karte, ne nebienzeke nanku too ne pikala bamanyishi batambule bonso buuje tuarte tuabu mudibi bikengedibua ne batuepu biala. (Tangilayi kabidi mukanda wa dia 20 Tshisua-munene 1996.) Bamanyishi bakena batambule, bikalabu banyishe, nebikale mua kudifundila wabu mukanda wa mêyi buabu ne bua bana babu pa kuakaja mêyi mafunda pa karte ne nsombelu wabu ne mitabuja abu.

Musambu 142 ne disambila dia nkomenu.

Lumingu lua dia 9 Luishi

Musambu 125

Min. 10: Mamanyisha. Luapolo lua konte. Akula bua malongolola menza bua buambi ku ndekelu kua lumingu.

Min. 15: “Mandamuna ku nkonko yenu.” Diyukidilangana ne bateleji. Londa kabidi bualu bufunda mu Réveillez-vous! mutela mu tshiena-bualu.

Min. 20: “Yehowa udi ufila bukole budi bupite bua pa tshibidilu.” Mu nkonko ne mandamuna. (Tangila w90-F 15/7 24, bikoso 15-16.) Lomba bamue bua balonde malu adi akankamija adi aleja mushindu udi Yehowa mubakoleshe.

Musambu 81 ne disambila dia nkomenu.

Lumingu lua dia 16 Luishi

Musambu 1

Min. 10: Mamanyisha.

Min. 15: “Tuikale ne disanka bua kufila bumanyishi mu buondoke.” Diyukidilangana tshiena-bualu ne bateleji. Zangika ngikadilu ya mushinga ya mbuelelu udi upatula bipeta bimpe: (1) Kuelangana muoyo ne luya, (2) kuela nseka pa tshiena-bualu tshidi natshi bantu mukana anyi kujulapu lukonko, (3) kutela mvese kampanda wa mu Bible muakanyine ne (4) kulombola dijinga dia kumanya dia muntu pa mukanda muleja. Dinaya dia tshilejilu kudi mumanyishi mukumbane pa dileja difila ne dikumbulula.

Min. 20: Dilonga dia mu dîku dìdì difila disanka. Muanetu kampanda ne mukajende badi bayukidilangana pa majinga a mu nyuma a dîku diabu. Bu mudibu baditatshisha bua buenzeji bubi budi bulongolodi ebu buikale nabu pa bana babu, badi bamona mushinga wa kukolesha makanda a mu nyuma a bana babu, kadi badi bajingulula ne: dilonga kaditu dienzeka pa tshibidilu ne ditu misangu mivule dipanga kupatula bipeta bimpe. Badi bakonkonona pamue mibelu mifila pa mushindu wa kulombola dilonga dia mu dîku didi diambuluisha muntu yonso, mifila mu Tshibumba tshia Nsentedi tshia dia 1 Tshimungu 1997, mabeji 26-29. Bonso babidi badi bangata dipangadika dia kuenza muabu muonso bua kukuba dikala-bimpe dia mu nyuma dia bana babu.

Musambu 146 ne disambila dia nkomenu.

Lumingu lua dia 23 Luishi

Musambu 187

Min. 12: Mamanyisha. Akula bua mikanda ituafila mu Luabanya. Tela bualu bumue anyi abidi a mu mukanda wa Buakabuluibua​—Nkomenu ambuluisha mu dileja dia mukanda eu.

Min. 15: “Tuleje kanemu bua muaba wa ntendelelu wa Yehowa.” Diyukidilangana mu nkonko ne mandamuna dilombola kudi mukulu waleja ne buimpe mushindu wa tshisumbu kutumikila malu aa.

Min. 18: Luapolo pa didifila dietu mu mudimu wa bumanyishi wa pa buloba bujima. (Ku diambuluisha dia mukanda wa Mudimu wetu, mabeji 100-101, 106-109.) Muyuki kudi sekretere ne diyukidilangana. Panyima pa mumane kuleja ne: difila pa tshibidilu luapolo lua mudimu wetu didi ne nshindamenu mu Bible, udi ulomba basadidi ba mudimu babidi bua kukonkonona ka-tshiena-bualu: “Tshitudi tufidila luapolo.” Pashishe, sekretere udi ushindika mushinga wa difila pa lukasa luapolo mijalame ne kabidi se: badi ne bua kuyituma dituku disambombo dia ngondo bu dia ndekelu. Pa tshibidilu bisumbu bia mu teritware wetu (tshia bibidi) bitu biyituma matuku mavule mamane kupita, ke bitu bienza ne: batu bapanga kubala luapolo eyi mu ngondo wayi. Udi uzangika tubingila tudi tuleja ne: mbimpe kudifundila bipatshila bia muntu pa nkayende ne udi ukomesha ne mêyi makankamiji pa mabenesha mapeta kudi aba batu badifila tshishiki mu mudimu.

Musambu 189 ne disambila dia nkomenu.